СИРИЯДАН КАЙТКАНДАР КЫРГЫЗСТАНГА ДА КОРКУНУЧ ЖАРАТАБЫ?

Орусиянын Федералдык коопсуздук кызматы «май майрамдарында Москвада бир нече жардырууларды пландашкан» деген шек менен кыргызстандык жарандарды кармады. Коопсуздук кызматынын маалыматына ылайык, жардыруулар Сириянын жана Түркиянын аймагындагы террордук уюмдардын жетекчилеринин тапшырмалары боюнча ишке ашырылмак. Кылмышка шектүүлөр жашаган жайлардан куралдар жана жардыруучу заттар табылган.
Орусиялык басылмалардын берип жаткан маалыматтарына ылайык, кармалган террордук топтун 3 мүчөсү Кыргызстанда туулган, бирок учурда Орусиянын жарандары болсо, бирөө Кыргызстандын жараны экени айтылууда. Кармалган Форхаджон Муратов, Сирожидин Эргашев жана Анваржон Тоджболтаев «Ислам мамлекети» террордук тобунун мүчөлөрү деген маалымат таратылды.
Сириядагы жарандык согушка, террорчулардын сөзүнө азгырылып кетип жаткан кыргызстандыктар, айрыкча өлкөбүздүн түштүк жергесинен чыккан өзбек улутунун өкүлдөрү жүздөп саналат. Алар бүгүнкү күндө Орусия же башка мамлекеттерге эле эмес, кайтып келишсе, эң ириде Кыргызстандын коопсуздугуна коркунуч жаратары толук мүмкүн.

Мирлан Өмүралиев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 706, 13-май-19-май, 2016-ж