УКУК КОРГОО ОРГАНДАРЫНДА РЕФОРМА ЖҮРӨТ

4-июлда Коргоо кеңешинин кезектеги жыйыны болуп өттү. Жыйын жабык форматта өтүп, анда укук коргоо органдарында реформа жүргүзүү боюнча сөз болду. Кеңештин катчысы Темир Жумакадыров реформалар ушул жылдын аягына чейин ишке ашырыларын белгиледи.
Анын айтымында, бул реформалар укук коргоо органдарында коррупцияны жоюуга, окшош функцияларды аткарган кызматтарды кыскартууга, кадрларды даярдоо ишин жакшыртууга жана органдардын жоопкерчилигин күчөтүүгө багытталган. Ошондой эле укук коргоо органдарын реформалоонун максаты – жеке ишкерлерди жана жергиликтүү бийлик органдарын сансыз текшерүүлөрдөн коргоо. Прокуратура органдарынан тергөө функциялары алынып, Улуттук коопсуздук мамлекеттик комитети жана Экономикалык кылмыштар менен күрөшүү боюнча мамлекеттик кызматка берилет. Бирок прокуратура органдарында кылмыш ишин козгоо функциясы калат.
"Мындай өзгөрүүнүн мааниси – прокуратура өзүнүн салттуу негизги көзөмөлдөө функциясын аткарышы керек. УКМК экономикалык кылмыштар боюнча иш алып барбайт. Мындан тышкары УКМК кылмыш ишин козгобойт. ИИМдин түзүмүндө да өзгөрүүлөр болмокчу. ИИМде 5 жаңы кызмат түзүлөт: Коомдук коопсуздук боюнча кызмат, Кылмыш милициясы, экстремизм жана мыйзамсыз миграция менен күрөшүү боюнча кызмат, Баңгизаттарды мыйзамсыз жүгүртүү менен күрөшүү боюнча кызмат жана Ички коопсуздук боюнча кызмат", - деп билдирди Жумакадыров.
Өз кезегинде президент Алмазбек Атамбаев реформаларды туура ишке ашыруу керектигин баса белгиледи. "Биздин укук коргоо органдары мыйзамдуулукту камсыз кылууга аракет кылып келишет. Бирок азыркы абал коррупционерлер үчүн ыңгайлуу болуп жатат, а биз адилеттүү кесипкөй адистерди колдойлу деп жатабыз",- деди президент.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 714, 8-июль-14-июль, 2016-ж