Кенже Көбөкова, ырчы: "ОШКО ТОЙГО БАРЫП 4 МИҢ ДОЛЛАР ТААП КЕЛГЕМ"
"Кечиккен сүйүү", "Кечирип кой" деген ырлары менен белгилүү болгон Кенже Көбөкова аттуу ырчы айым бар. Жакында эле филармониянын 80 жылдык мааракесинде Мыскал Өмүрканованын ролун жаратты. Эстрада менен фольклорду айкалыштыра ырдаган ырчынын тагдыры кызыктуу экен.
Туулган жылы, күнү – 1985-жыл, 22-апрель Туулган жери – Нарын районунун Эмгекчил айылы Билими – Жогорку Кесиби – Фольклор ырчысы Учурда – Улуттук филармонияда "Эл шайырлар" тобунун ырчысы, бир уулдун апасы
"ИШ БАШТАЛГАНДА КОМУЗДУ КУЧАКТАЙ КАЛЧУМУН"
– Атым айтып тургандай эле 13 бир туугандын кенжесимин. Кичинемде комуз черткенге кызыгып, Кундуз деген жеңемден үйрөнүп алгам. Ошондон кийин үйдүн "эл артистине" айландым. Ата-энем "ушул кызыбыздан чоң ырчы чыгат" дешсе столдун үстүнө чыга калып ырдап кирчүмүн. 6-классымда таякелерим келин алып, ошол жакта тойдо ырдасам акча кыстарып кызыгуумду арттырып коюшту. Атам Султек элдик дарыгер, чөп менен дарылап көп адамдарды айыктырып келет. Жаш кезинде бийлеп, жакшы ырдачу экен. Апам Сайракан куудул аял. Кичинемде өтө эрке болчумун, ичем дегенимди ичип, кием дегенимди кийип чоңойдум. "Эжелеримдин эскисин кийбейм" деп чыр салсам, апамдар жерди чукуп болсо да тыйын таап жаңы кийим сатып беришчү. Үйдө иш башталганда эле комузду кучактап ырдап калчумун. Эжелерим "башталды мунуку" деп тултуңдап калса, апам "менин кызым ырдайт" деп аларды урушуп калар эле. Эсимде, сулуулар сынагына катышып эжелерим формаларымды, жеңем тамак-аш көтөрүп мени коштоп баргандары. Ошондо апам өтүнөн операция болот деп жаткан, барбай эле кой десем болбой "орун албай калса Кенжемдин шагы сынып калат" деп ооруп жатканына карабай өзү жетелеп барган.
"АЛА КАЧЫП КЕТИП, КЫЯЛДАРЫМ ТАЛКАЛАНДЫ"
– 11-классты бүтөрүм менен "бул кыз бизге керек" деп Нарын театрына алып кетишти. 18 жашымда дасыккан артисттердин колуна түштүм. 2 күндөн кийин Таласка 1 айга гастролго жиберишти. Жаш болсом да ырымчыл экенмин, тушоом Манас атамдын жеринен кесилип жатат, чыгармачылыгым Чыңгыз агабыздын айылынан башталды, буюрса, эл сүйгөн ырчы болом деп тилек кылгам. Ошентип театрда иштеп жүргөн күндөрүмдүн биринде коңшу айылга ала качып кетип, пландарым, кыялдарым талкаланды. Жогорку окуу жайга окуйм десем, окутабыз деп убада беришкен. Тилекке каршы, убада аткарылган жок, 2 ай гана жашап мамилебиз келишпей кетип калдым. Ата-энемдикине келип, уулумду төрөп 3 ай үйдө отуруп калдым. Ошондо "буулугуп, сыздап, булуттар арасынан сени издедим" деген саптары бар "Кечиккен сүйүү" деген ырымды жазып, обонун чыгарып, комуз менен сыздап ырдай берчүмүн.
"КАРА КАЗАНДЫ КУЧАКТАП ОТУРУП КАЛГЫМ КЕЛБЕДИ"
– Баламды 3 айында апама таштап, шаарга окуганы келе бердим. Шаардыктар баласын сейил бакта арабага салып жүргөнүн көрүп, баламды сагынып эмчегиме сүт толуп, сыздап ооруйт эле. Ошентип жүрүп мастит болдум, жүдөдүм, кыйналдым. Сагынганда айылга телеграмма жиберип сүйлөшчүмүн, апам "алло" дегенде "бала жакшыбы?" десем, "баладан мурда мени сурасаң боло, аа кокуй, эне деген ушундай да" деп калчу. Мен ызам менен эле бардык кыйынчылыкка чыдадым окшойт. Анткени мектепте активист кыз болчумун да, кара казанды кучактап отуруп калгым келген эмес. Азыр ойлосом күчтүү, чыйрак болгон экенмин. Студент кезде орозо убагы болчу, курсагыбыз ачып жарамазан айтып жөнөдүк. Үйлөрдү кыдырып жүрүп туптуура муфтий Мураталы Жумановдун батирине ооз ачтырып жатканда кирип барыптырбыз да. Ал киши ырдатып, курсагыбызды тойгузуп, тыйынын берип узаткан. Далай жолу ачка калып кыйналсам да Б.Бейшеналиева атындагы Маданият жана искусство университетинин салттык музыка бөлүмүн кызыл диплом менен аяктадым. Окуу жайдын каржылоосу менен Австралия, Түркияга ырдаганы барып келгем. Устаттарым Роза Аманова, Замирбек Үсөнбаев, Улукмырза Полотов агайлардан сабак алганыма сүйүнөм.
"БАЛАМДЫ ЖЕТЕЛЕП КАЙДА БАРАРЫМДЫ БИЛБЕЙ КАЛГАМ"
– 6 жашка толгондо баламды колума алдым. Окууну бүтүп, вокалдан сабак берип иштеп жүрдүм. Батирге төлөгөнгө акчам жок болгондуктан жатаканада жашачумун. Бир күнү "жатаканада студенттер жашайт" деп чыгарып салышты. Оокаттарымды көтөрүп, баламды жетелеп кайда барарымды билбей турсам балам "мама, айылга эле кетеличи" деп мени аяп тегеренип жүрөт. Ошондо Ошко бир белгилүү инсандын тоюна чакырып калып, оокаттарымды таанышыма таштап тойго кетип калдым. Ал жакта өнөр адамдарын өтө баалап, аябай акча кыстарышат турбайбы. Ошентип 4 миң доллар таап келип батирге чыктым, ырларды жаздырып чыгармачылыгымды уланттым. Кыйынчылыктын баары артта калып, учурда жашаганга үйүм, айдаганга унаам бар. Балам болсо №5-гимназияда 6-класста окуйт.
"ДҮЙНӨДӨ КЫРГЫЗ КЫЗДАРЫНАН ӨТКӨН БЫШЫК КЫЗ ЖОК"
– 14 жыл болду, ошол кеткен боюнча баламдын атасына кезиге элекпиз. Ал эми турмуш куруу боюнча айтсам, азыр чыгармачылык менен эле алекмин. Аны убагы келгенде көрө жатарбыз. Эң негизгиси чыгармачылыгымды колдогон, мени түшүнгөн адамым бар. Кыйынчылык учурда чайханада ырдап баламды баккан күндөрүм болгон. Эми Кудайдын куттуу күнү тойго чакыруу болуп, каражат жагынан да шүгүр. Учурда "кыргыздын кыздары түрккө тийди", "кытайга кетти" деп кыздарды жамандап эле жатышат. Негизи кыргыздын кыздарынан өткөн бышык кыз жок дүйнөдө. Түйшүктүн баарын кыргыздын кыздары көтөрөт. Колунан баары келет, ийкемдүү болушат. Ошон үчүн кыргыздын кыздарын жаман жагынан эле карай бергендерге сабак болсун деп Жогорку Кеңештин депутаты Аида Салянованын апасы акын Майрам Курбаналиеванын "Мен кыргыздын кызымын" деген ырын ырдадым.
"Ата-энем мени жайлоодо бээ, уй саадырып, шырдак, кийиз жасатып турмушка бышырып тарбиялады".
"Балам мени түшүнүп, аяп турат. Акыркы кезде "апа, кыз эмес, эркек төрөчү" деп көп айтчу болду".
К.Көбөкова: "Ажырашкандан кийин чыгармачылыкка кириштим"
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (21)
meni_kut
2017-01-25 11:10:59
Которумдуулугу жок эки ай жашап ажырашып кеткен учун кыйынчылыктарды кордун..Балага эле кыйын
-17
guliakg
2017-01-25 16:49:39
meni_kut,бироонун жашоосун талкулоо оной, мумкун себеби болгондур. Бактылуу болунуз!!!
+7
Gulnur1980
2017-01-25 11:12:00
"Бакыттын эрте кечи жок"---деген соз бар эмеспи,так что желаю женского счастья!!!
+9
Jaken
2017-01-25 11:27:45
Студент кезинде группалаштарын менен жатаканага кочургон болчум. Анда такси кылып жургон кезим. Ошол кезден бери жакшы таанып калгамын жана ырларынды кызыгып угам. Сага чыгармачылык ийгилик каалайм. Кыргыз элинин суйкумдуу кызы болуп, кызмат кылып журо бер. Ийгиликтер коштосун.
+7
Gulzat86
2017-01-25 12:34:00
Жакшыжакшы
+2
Nuura-shirin
2017-01-25 14:16:02
Жашынан чон деп ойлочумун, ийгилик болсун!
0
azamat.k
2017-01-25 14:31:48
Качыра коём деп 2 ай эле жашап кетирип жиберген адам аябай адам экен го.Жаш кыздын турмушуна балта чаап,жашагысы келген адам жашап кетет эле.Эми оздору билет экен да,мен да кызыкмын алардын турмушун талкуулаган.
+10
diamond1111
2017-01-25 16:17:54
Мырзалар кунообузду унчукпай мойнубузга алышыбыз керек. Канча кыздын ою, максаты, кыялы менен эсептешпей уурдап кетебиз. Анан ушундай мамилеге чыдаган кыздарга рахмат.Эгер биздин максатыбыз менен бир аял заты эсептешпей койсо, баарылап жаман айтып отуруп калабыз. Бар болгула кыргыз кыздар.
+15
Aygul777
2017-01-25 16:24:48
Бактылуу болгула. Баланыз тай энесине окшош экен.
+2
DNurgiza
2017-01-25 22:43:39
"булуттар арасынан сени издеймин"- деген ыры жагат.
+3
Kamchybekova.Ch
2017-01-25 23:40:20
Колдогон адамым бар дейт,эми турмуш кургула. Бактылуу болгула.
+3
Djal1987
2017-01-26 01:48:51
Мага канча рустар деле айткан кыргыздын кыздары аракетчил чыдамкай иштерман келесинер. Даже тааныбаган эле бир орус киши да айтып атпайбы силер озб-тажиктерге караганда созго тушуносунор а алар более дикий келишет деп. Анан элее озубуздун эркектер эле басмырлай беришет тооба. Канча кыздар иштеп ата энесинин эски уйлорун жанылап берип жатышат уйбулоосун да багышып жатышат, аны эч кимиси байкагысы келбейт. Конечно бар анча мынча женил желпи кыз жигиттерибиз деле бар эми андайлар башка улутта деле
+12
Djal1987
2017-01-26 01:58:48
Ош шаары жонундо Юля Руцская дагы инстасына коп жазат го жакшы жер эли мейман дос кочолору таза, барсан озгочо тосуп алышат деп. Озу чондор дагы Ошко барганда куржундары толуп келишет экен да анан эле бурмалай беришет кээ бири. Бекеринен айтышпайт да берекелуу жер деп. Болгону эки уч завод фабрикаларды иштетип коюшса болот эле креслодогулар. Жаштарга жумуш орун болуп кыргызстанды багып коюшат эле жон эле ак уй кок уйду кошуп.
+13
cezim01
2017-01-26 13:03:24
3 айлыганда тайнесинде калган экенда байкуш бала. Мен 3 айлык баламды таштап бир жака кетишти элестете албайм Аллах андай кунго туш кылбасын. Эмнеси болсо да азыр баласы жанында экенго
+7
Asyl10
2017-01-27 16:32:13
cezim01, Тайнесине таазим!!! Ошо бала чон жигит болуп албетте тайнесин кадырлап-сыйлап алат. Тайнелер бар болсун, кыздары ажырашса байкуш апалар ооруп турушса да неберелерин багып карашат.
Кенже сага аял затына тиешелуу бардык бакытты каалайм. Башына кыйын кундор тушкондо дайыма жанында болгон, жардамдарын аябаган, сен учун,балан учун санаа тартакан ата-эненди дайыма кадырлап журо бер. Чыгармачылыгын артып кыргыздын сыймыгы болуп жур.
+4
mikoo
2017-01-26 22:54:30
Айий мен бул ырчыны 69или70чи жылкы ойлочумун 85экен да)) Бирок семьянызды сактап калып, анан ушул ийгилике жетишкенде мындан да жакшы болмок экен.. Голосунузга соз жок,соонун..
0
ZHaziko
2017-02-01 21:36:14
Кенже эжени жакшы тааныйм. Абдан жакшы кичи пейил токтоо кыз. Сыз жакшы жашоону заслужили эми буйруса баары жакшы болот бар болунуз
+2
Комментарий калтыруу үчүн өз ысымыңыз менен кириңиз же каттоодон өтүңүз.
"Кечиккен сүйүү", "Кечирип кой" деген ырлары менен белгилүү болгон Кенже Көбөкова аттуу ырчы айым бар. Жакында эле филармониянын 80 жылдык мааракесинде Мыскал Өмүрканованын ролун жаратты. Эстрада менен фольклорду айкалыштыра ырдаган ырчынын тагдыры кызыктуу экен.
