Эрнест Уметалиев, продюсер: "ЧОЛПОНАЙ ЭКӨӨБҮЗДҮН ЗАМАНБАП ТОЮБУЗ ДУБАЙДА ӨТӨТ"

"Ак шоола" балдар хорунун катарына кошулганда Чолпонай 2-класста окуган секелек эле. Ошол кезде аталган хордун жетекчиси Гүлмира Эсенгулова бул тестиер кызга кийин ак жоолугун салып келин кылып аларын билбесе керек. Ырчы кыз анын тун уулу продюсер Эрнест Уметалиевге турмушка чыгып, Жаңы жылды расмий түрдө жаңы статус менен баштады.

– Куш бооңор бек болсун! Адатта жаштар баш кошор алдында бул маалымат менен бөлүшөт эмеспи. Силер үйлөнгөндөн кийин гана жар салдыңар. Мунун себеби барбы?
Чолпонай: – Мен жайында берген маегимде "биз үйлөнүү тоюбузду пиар кылбайбыз, эч кимге айтпайбыз" дегем. Себеби жеке жашообуз сыр бойдон калганы оң деген принцибибиз бар. Мындан ары да ушундай болот. Бул биздин жубайлар катары жеке жашообуз боюнча берип жаткан биринчи жана акыркы маегибиз. Экөөбүз тең чыгармачыл адам болгондуктан чыгармачылыгыбыз тууралуу гана сөз кылгыбыз келет.
Эрнест: – Мен толуктап кетейинчи, орустардын "бакыт тынчтыкты жактырат" деген жакшы сөзү бар. Биз ошол нерсени кармангыбыз келет. Анткени жеке жашообузду элге жарыялап "биз мындай, тигиндей" деп мактангыбыз келбейт. Жеке жашоо биздики, бизге гана тиешелүү.

– Жашооңорго бурулуш алып келген кайсы дата болду?
Ч.: – Үйлөнүү тоюбуз 2016-жылдын күз айларында өттү. Кайненем ак жоолугун салып, көшөгөгө киргизди. Кайын журтум күлүктүн көкүлүнө ак була байлап келип ата-энемдин алдына түшүп, кыргыздын салты менен жакшы той өткөрүштү. Ошондуктан ата-энебизге ыраазычылык билдиргибиз келет. Анан тойду өткөрүп алган соң расмий түрдө арыз жазып, 1 ай кезек күтүп күбөлүгүбүздү алдык.
Э.: – Кайын журтум, ата-энем да салтты бийик туткан адамдар. Ошондуктан биз дагы аларга баш ийип каада-салтты туура аткарганга аракет кылдык.

– Кыргыздын салты демекчи, Чолпонайдын калыңына тогуздап мал берүү сыяктуу жөрөлгөлөр да аткарылдыбы?
Э.: – Калыңдын баары төлөндү. Тогуздап мал берүү 19-кылымга таандык салттар окшойт. Азыр жеңилирээк, ошол жолдор менен бүтүрдүк.
Ч.: – Биз мамилебизди мал менен эсептебейбиз. Эка мен үчүн малдан көп нерсени берем деп турат.
Э.: – Бергем дагы (күлүп).
Ч.: – Ооба (күлүп). Ата-энебиз өз алдынча сүйлөшүп алышты. Эң башкысы эки үй-бүлө достошуп, бири-бирине ыраазы болушканы бизди кубантты.

– Чолпонайды алып кетип жатканда кайната, кайненең кандай кеңештерин айтты?
Э.: – Атам "кызымды таарынтпа, бактылуу кыл, сени өз баламдай жакшы көрөм" деди. Буюрса, атам айткан аманаттарды аткарам деген ишеничтемин.

– Чолпонай, башка үй-бүлөгө баратканда толкунданып, көзүңдөн жаш тегеренсе керек?
Ч.: – Апамды көрүп кичине ыйлагым келди, бирок кармандым. Анын үстүнө Эканы көптөн бери тааныгандыктан өзгөчө толкундануулар болгон жок. Өзүмдүн башка үйүмө кетип бараткандай эле болдум (күлүп).

– Келиндик милдеттерди кантип өздөштүрө баштадың? Кайненең кеп-кеңешин берип жатабы?
Ч.: – Апам 2-классымдан баштап өзү тарбиялап өстүргөндүктөн, мени жакшы билет. Билбеген нерсени апамдан үйрөнүп жатам. Мурдатан тааныгандыктан бири-бирибизге "сүрүлүп" стресс болгон жокпуз. Апамды "кандай кайнене болот экен?" деп баары сурап жүрүшөт. Мен үчүн алтын кайнене болуп жатат.

– Экөөң тең бири-бириңен кем калбаган чыгармачыл инсансыңар. Эки кочкордун башы бир казанда кайнашы мүмкүнбү?
Э.: – Ушуну эми мен айтып коёюнчу (күлүп). Элге маалым болгондой, Чопа экөөбүз 10 жылдан ашуун кыз-жигит мамиледе болгонбуз. Бул жылдарда эки кочкордун башы кантип казанга салынарынан өйдө, бышырылышына чейин билип койгонбуз. Бардык этаптардан өтүп, түшүнүшүп ушул жакшылыктарга келип отурабыз.

– Заманбап тойду качан өткөрөлү деп турасыңар?
Э.: – 3 жыл мурун Чопага шакек салсам, апам барып сөйкө салып кеткен. Ар бир нерсенин убагы, буюрган күнү болот экен. Ал күн дагы келди. Заманбап тойдун дагы убак-сааты келет, буюрса, жакында өткөрөбүз.
Ч.: – Заманбап той өткөргөнгө ата-энебиз макулдугун беришти. Жакынкы күндөрү досторубуз менен Дубайга 15 күнгө барып келели деген пландарыбыз бар. Убакыттын өтүшү менен досторубуз иргелди. Жаныбызда бизди түшүнгөн, түгөй экенибизге ишенген, чын дилинен колдогон досторубуз калды.
Э.: – Досторубуз менен Дубайдан чакан той өткөрөлү деп турабыз. Азыр даярдык көрүлүүдө. Датасы чечилери менен эле учуп кетебиз.

– Узак убакыт мамиле куруунун сыры эмнеде?
Э.: – Адам өзү, акылы, жашоого болгон көз карашы бышышы керек. Биздин башыбыздан көп нерсе өттү. Бирок ал күндөр артта калды. Биз компромисске барганды, сыйлаганды, кыял-жоругубузду көтөрө билгенди, жакшы көргөндү үйрөндүк. Мунун баары убакыт менен келет экен.
Ч.: – Менин жаш кыздарга кеңешим бар. Турмуш курууга такыр шашпаш керек. Жумушта, окууда, чыгармачылыкта болобу кандайдыр бир деңгээлге жетип, өзүңдүн ордуңду таап, жаштыкты, балалыкты калтырган соң турмушка аттаныш керек деген ойдомун.

– Бири-бириңерде сыймыктанчу сапаттарды санай аласыңарбы?
Ч.: – Экада мен сыймыктанган сапаттар көп. Ал мага эч качан кызганууга себеп берген эмес. Кээде калп эле берип коюшу мүмкүн же өзүм ойлоп таап алам (күлүп). Эка адамдардын ички дүйнөсүнүн сулуулугуна, жүрөгүнүн тазалыгына суктанат. Кыздардын келбетине карабайт, жумушу менен эле алек. Үй-бүлөсүн, мени жакшы көрөт. Өзүнүн кесибинде эң чоң даражага жетти десем болот. Президентибиз менен иштешкенге чейин эле шоу чөйрөдөгүлөр №1 деп келишчү, эми аны расмий түрдө айтып калышты.
Э.: – Чолпонай менен 10 жылдан бери кыз-жигит катары сүйлөшүп, "Ак шооладан" бери эле жакшы көрөм. Ыймандуу адам, апам каалаган келин. Айла жок апам каалаган келинди алып келүүгө туура келди (күлүп). 10 жылдан бери менин тандоом болсо, кийин апамдын тандоосу болду. Азыр үйдө Чопадан өткөн келин жок. Апам "Чолпонай эң жакшы келин" деп мактап турат.

– Канча балалуу болууну каалайсыңар?
Э.: – Апама чакан топ түзүп берели деген ойлор бар. Өзү аларды акырын тарбиялап, жамаат кыла берсе жакшы да (күлүп).

– Маегиңерге рахмат. Бактылуу болгула!

Динара Абдыкадырова
Адилет Топчубаев
star@super.kg

 Кыстарылган видео