КЫТАЙДЫ БАГЫНДЫРГАН ДИМАШ КУДАЙБЕРГЕНОВ

2013-жыл, Чолпон-Ата шаары. Кереметтүү Ысык-Көлдүн жээгинде өткөн "Мейкин Азия" эл аралык музыкалык фестивалы. Казакстандан келген арык, чап жаак, бою узун, келечеги кең жаш жигит булбулдай мукам үнү менен көрүүчүлөрдү таң калтырып, баш байгени эңип кетти. Айрымдар калыстардын чечимине нааразы болгону менен, Димаш Кудайбергенов деген ысымды көпчүлүгү эстеп калышты.

Толук аты-жөнү – Кудайбергенов Динмухамет Канатович
Туулган жылы, күнү – 1994-жыл, 24-май
Туулган жери – Казакстан, Актөбө шаары
Аткарган белгилүү чыгармалары – "Көркемүм", "Дайдидау", "Джамайка", "SOS d'un terrien en d'tresse" жана "Еркелетейүн" (ред.: Нурлан Насиптин "Эркелетсемби?" ырынын казакчасы) жана башкалар
Үй-бүлөлүк абалы – Бойдок

ЫРЧЫЛАРДЫН ТУН УУЛУ

Димаш Кудайбергенов Казакстан Республикасынын маданиятынын мыкты кызматкерлери, ырчылар Канат Кудайбергенов менен Светлана Айтбаеванын тун уулу. Раушан аттуу карындашы жана Абилмансур аттуу иниси бар. Ырчы чоң ата, чоң апасынын улуу небереси болгондуктан алардын колунда тарбияланган. "Алма шагынан алыс түшпөйт" демекчи, 5 жашында ата-энеси уулунун талантын байкап, аны балдардын музыкалык студиясына жетелеп барышып, фортепиано жана вокал классына тапшыртышкан. 2014-жылы Актөбө шаарындагы Ахмет Жубанов атындагы музыкалык окуу жайды аяктап, Казак улуттук искусство университетине тап шырган.

СЫНАКТАР ЖАНА СЫЙЛЫКТАР

Дээринде ырчылык таланты бар Димаш кенедейинен эле сынактарга баймабай катышып, келечектен көптү үмүттөндүрөт. Алсак, 6 жашында "Айналайын" аттуу республикалык сынактын фортепиано багытында 1-орунду багындырган. 10 жашынан тарта ар түрдүү маданий иш-чараларда алпаруучу боло баштайт. Ал эми 2010-жылы "Звонкие голоса Байконура" аттуу эл
аралык фестивалынын лауреаты аталып, 2012-жылы "Жас канат" аттуу жаш аткаруучулардын конкурсунда баш байгени утуп алган. Андан көп узабай, тактап айтканда, 2013-жылдын июль айынын соңунда Кыргызстанда өткөн "Мейкин Азия" эл аралык фестивалынын жеңүүчүсү болуп, чыгармачылыгында чоң секирик жасайт. Чыныгы атак-даңкты ага 2015-жылы Беларустун Витебск шаарында өткөн "Славянский базар" эстрада ырчыларынын XXIV эл аралык фестивалы алып келет. Димаш фестивалдын баш байгесин утуп, 20 миң доллар сыйлык алган. Ошол эле жылы ырчы Түркиянын Стамбул шаарында өткөн "ABU TV song" ("Азия-Тынч океан") аттуу телефестивалга катышып, Казакстандын желегин желбиреткен.

ДИМАШ, "ТӨРГӨ ӨТ", ВИТАС, "ПЕНСИЯГА КЕТ"

2016-жылы маданият тармагындагы лидерлиги үчүн президенттик стипендияга арзыган Димаш бир топ мамлекеттик сыйлыктарга да ээ болгон. Чыгармачылык үчүн төрөлгөн ырчы муну менен гана чектелбестен, 2017-жылдын башында Кытай Эл Республикасынын "Hunan TV" телеканалы өткөргөн "I am a singer" аттуу теледолбооруна катышууга бел байлайт. 14 этаптан турган аталган теледолбоор апрелде аяктайт. Учурда Димаш долбоордун лидерлеринин бири. Мындай сынактан соң ырчынын жылдызы жанып, тез эле популярдуулукка жетип, кытай эстрадасын багынта алды. Табият берген таза үнү, келбети менен кытай жаштарынын жүрөгүнөн орун таап, күйөрман кыздары күн санап өсүүдө. Ал сахнага чыгып ырдаганда айымдар гана эмес, мырзалар да көзүнө жаш алып, мукам үнүнө, тубаса талантына баа беришүүдө. Айта кетчү нерсе, Димаш жогорудагы долбоордун 2-этабында орусиялык ырчы Витастын "Опера №2" аттуу ырын аткарган. Мындан соң Витастын продюсери Сергей Пудовкин Димашты "ууру, пародист" деп атап, уруксат сурабай ырдагандыгы үчүн сотко кайрылышарын билдирген. Бирок Витас өзү ар бир чыгармачыл инсанга сый мамиле кыларын жана сотко кайрылбай тургандыгын айтып, чырга чекит койгон. Чындыгында Витастын продюсеринин чычалоосунун себеби бар. Анткени Витас кытай элинин сүймөнчүгүнө ээ болуп, буга чейин ал жакка байма-бай концерттерди уюштуруп, капчыгын кампайтып келген. Эми Димаш анын ордун басып, Витасты "пенсияга" жиберсе, ким эле жеген нанын тарттыргысы келсин?..

Асхат Субанбеков
star@super.kg