Тауекел Мусилим, актёр, ырчы, алып баруучу: «КҮЙӨРМАНЫМ БАЛАЛУУ БОЛУШ ҮЧҮН МАГА ДОНОР БОЛУП БЕР ДЕГЕН»

Күйөрмандарынын тандоосу боюнча казактардын секс-символу Тауекел Мусилим «30 жашымда үйлөнөм, азырынча карьерам үчүн иштешим керек» дейт. Кыздардын көзүн күйдүргөн «красавчик» тасмага тартылууга, микрофон кармап телеберүүлөрдү алып барууга жана созолонто ырларды ырдоого үлгүрөт. Китеп окуп, спорт менен машыгып сергек жашоо образын тандаган. Миллиондогон жүрөк ээлерин багындырган бойдок мырза менен баарлашуубузду уланттык.

– Саламатсызбы? Аралыктын алыс болгонуна карабай маектешүүгө макул болгонуңузга рахмат. Ушул жыл сиз үчүн ийгиликтер менен башталды өңдөнөт...
– Саламатсыздарбы? 2016-жыл мен үчүн ийгиликтүү болду. Толук метраждуу 2 тасмада роль жараттым. Ал эми жаңырган жылда ал тасмалар кинотеатрларда көрсөтүлдү. Буюрса, ушул жылы чоң долбоорлордун үстүндө иштеп баштадым, жыйынтык жаман болбойт. Ар бир жыл өткөн жылга салыштырмалуу ийгиликтүү болот деп үмүттөнүп жатам.

– Сиз ырчы, алып баруучу, актёр катары таанылып келесиз. Үч чылбырды бир тизгиндөөгө кантип жетишесиз?
– Ооба, учурда 3 багытта иштейм. Баарын бир убакта алып кетүү татаал. Бирок чече турган жолдору бар. Мисалы, көбүнчөсү унаа айдап баратканда ырларды ырдап, репетиция кылам. Актёрдук жаатта болсо дүйнөлүк тасмаларды көрүп, анализ жасап, өзүмдү өстүрөм. Ал эми «НТК» каналында маалыматтык берүүнү, «Казакстан» каналында «Салем, Казакстан» деген көңүл ачуучу көрсөтүүнү алып барам.

– «Махабатым жүрегимде» сериалында байдын уулу Дастандын ролун ойногонсуз. Чындыгында кандай үй-бүлөдө төрөлүп, чоңойгонсуз?
– Ата-энем биз кичинекей кезибизде ажырашып кетишкен. Эжем экөөбүз апамдан тарбия алганбыз. Жашообуз өзгөчө деле болгон эмес. Катардагы жөнөкөй үй-бүлө болчубуз. Апам аракет кылып, бизди эч нерседен кем кылган жок. Ойлоп көрсөм, бала кезде көп нерсени каалачу экем. Бирок материалдык жактан толук камсыз болбогондуктан, айрым каалоо-тилектер арткы планга калып калчу. Үй-бүлөлүк бюджетти үнөмдөп жашаганбыз. Азыр ал күндөр үчүн кейибейм. Себеби талыкпаган эмгектин артында чоң ийгилик турарын билдим. Ыраазы болгонум, даяр ашка ээлик кылбай, өзүмдүн мээнетим менен ийгиликке жетишип жатканым. Атам 2010-жылы каза болгон.

– Тасма талаасында кандай кыйынчылыктар болду эле?
– Алгачкы ирет сериалга тартылып жатканда 2 кыйынчылыкка кабылгам. Биринчиси, тасмадан ата менен баланын ортосундагы пикир келишпестикти көрсөтүп берүү керек болчу. Бул учурду ойноо оор болгон. Мен атасыз чоңойдум, тарбиясын көргөн эмесмин. Ата-баланын мамилеси кандай болуш керектигин билбейм. Анан дагы тасмада атамдын ролун ойногон актёр да, мен да тажрыйбалуу эмес болчубуз. Экинчиси, дикциям аябай начар эле. Айрым сөздөрдү аягына чейин айта албай же так сүйлөй албай калчумун. Кудайга шүгүр, азыр өсүү бар.

– Кыргыз киночулары менен иштешүү сиздин оюңуздагыдай болдубу?
– Кыргыз режиссёру Руслан Акун менен иштешүү аябай жакты. Жакшы тажрыйба топтой алдым. Тажрыйба жагынан баары мыкты экен. Анан дагы кыргыз режиссёру жана продюсери менин толук метраждуу киного тартылуума жол ачкан биринчи кинематографисттер болушту. Эгер дагы сунуштары болсо, дайыма иштешүүгө даярмын.

– Карьераңыздагы кайсы учурду ийгиликтин чокусу деп эсептейсиз?
– Менимче, азыркы учурум сиз айткан ийгиликтин башаты болсо керек. Эгер Голливуд режиссёрлору менен иштешип, тасмага тартылсам, анда ошол ийгилигимдин чокусу болот. Ал эми Казакстанда жараткан ийгиликтеримди бийиктик деп эсептебейм.

– Өзүңүз ырчы болгонго чейин ырчыларга сый-урматыңыз жок болуптур...
– Ооба, чындап эле сыйлачу эмесмин. Эми сыйлабайм дегенде кандай, жергиликтүү ырчылардын ырларын укчу эмесмин. Ойлочумун, атайын программалар менен ырларды жаздырып алышып, фонограмма менен аткарып коёт деп. Көрсө, андай эмес экен. Азыр алардын эмгегин жон терим менен сезип турам. Клипти айтпай эле коёюн, жөнөкөй эле ырды жаздыруу чоң эмгекти талап кылат экен.

– Күйөрмандарыңыз миңдеп саналат эмеспи. Арасынан чектен чыккандары барбы?
– Ооба, бар. Бир күйөрманым «донор болуп бер, сага окшош балалуу болгум келет» деген кызык окуя болгон. Ал айымды туура түшүнөм. Анткени учурда донор болгондорду көрүп эле жүрбөйбүзбү. Ал эми мага сунуштаганы, албетте, туура эмес. Менин канымдан жаралган балдар менин көз алдымда чоңоюшу керек. Менин тарбиямды алыш керек. Башка бирөөнү ата деп, бөтөн үйдө кантип чоңоёт? Ошондуктан бул сунушту кабыл алган жокмун.

– Маектериңиздин биринде бир тууган эжеңизге окшош кызды издеп жүрөм деп айтканыңыз бар. Таптыңызбы?
– Ооба, эжеме окшогон кызды издеп жатам. Эгер болочоктогу жубайым эжемдей болсо, бактылуу болмокмун. Себеби бир тууганым башкаларга үлгү боло турган жакшы аялдардын бири. Мүнөзү оор басырыктуу, ар бир сөзүн, ар бир кадамын электен өткөрөт. Жездеме, айланасындагыларга жасаган жылуу мамилесин, үй-бүлөлүк очоктун отун өчүрбөй сактоого болгон аракетин баалайм. Бул нерселер мени ынандырат.

– Сиздин ысымыңыз ыйгарылган атыр чыккан эле...
– 2016-жылы жаз мезгилинде парфюмдарды чыгарган «mslm company’ден» бизге сунуш келип түшкөн. Алар менин атымды пайдаланып «tauyekel mussilim» деген атыр чыгармак экен. Продюсерим Жанна Абуова экөөбүз сүйлөшүп, макулдугубузду бергенбиз. Бирок көп узабай эле продюсерим менен компания жетекчилиги иштешүүнү токтотушту. Себеби атыр чыгарган тарап келишимдеги жоболорду аткарбай башташты. Азыр атыр сатыкка чыкпай калган.

– Маегиңизге рахмат! Ишиңизди ийгиликтер коштосун!

«Апамды издеп» тасмасын тартуу учурунан».

«Апамды издеп» тасмасында Азамат экөөбүз кыздын да образын жаратканбыз».

Бактыгүл Момбекова
star@super.kg