БИР БҮРКҮМ

Маданият, маалымат жана туризм министрлиги АПРЕЛЬ АЙЫНДА байланыш кызматы үчүн 26 миллион 841 миң сом короткон. Ал эми Жогорку Кеңеш 426 миң сом жумшаган. Аталган маалыматты Каржы министрлигинен кабарлашты.
Эл аралык жарандык коргонуу уюмунун аткаруучу кеңешинин төрагалыгына өзгөчө кырдаалдар министри КУБАТБЕК БОРОНОВ шайланды. Мындай чечим 8-майда Швейцариянын Женева шаарында аталган уюмдун 50-сессиясында кабыл алынган. Маалыматты Өзгөчө кырдаалдар министрлигинен кабарлашты.
БИШКЕК–КАРА-БАЛТА унаа жолунун оңдоп-түзөө иштери 20-майга чейин бүтүшү керек. Тендерден утуп алган компанияга өкмөттөн ушундай эскертүү берилди.
Бишкек шаарында "АККУЛА" ат майданын оңдоп-түзөө үчүн 300 миллион сом каражат керектелет. Бул боюнча премьер-министр Сооронбай Жээнбеков ипподром тууралуу болгон жумушчу топтун жыйынында айтты.
Кыргыз өлкөсүндөгү 315 миң адам жашаган 326 айыл САНАРИПТИК ТЕЛЕРАДИОБЕРҮҮ менен камсыздалган эмес. Бул жалпы калктын 5 пайызын түзөт. Эске салсак, 15-майдан тарта аналогдук берүүлөр өчүрүлөт. Мындан улам калктын 5 пайызы телеберүү көрүү мүмкүнчүлүгүнөн ажырашы мүмкүн.
Бишкек шаарындагы "Кудайберген" базарынын жанында Мерседес-Бенц үлгүсүндөгү унаанын айдоочусу 10-майда 15 жаштагы баланы сүзүп кетип, натыйжада ал ооруканада КАЗА БОЛДУ. Унаа ээси 11-майда кармалды.
Билим берүү жана илим министрлиги автоунаа айдоочуларды даярдаган 210 мектепти текшерип, анын 102сине ЭСКЕРТҮҮ БЕРДИ. Буга алардын материалдык-техникалык базасынын начардыгы себеп болгон.
2017-жылдын 5-июлунан 30-августуна чейин Ташкент– Тамчы–Ташкент жана Новосибирск–Тамчы–Новосибирск багыттары боюнча УЧАК КАТТАМЫ иштейт. Ошондой эле жакынкы күндөрү Казакстандын Астана, Чымкент жана Алматы шаарларынан Тамчыга түз каттамдар уюштурулмакчы.
Республика боюнча көчөлөргө 306 "ЭВАКУАТОР" белгиси орнотулат. Анын 135и Бишкек шаарынын борбордук көчөлөрүнөн орун алат. Патрулдук милициянын маалыматына караганда, жол эрежесин бузган автоунаалар май айынын аягынан баштап эвакуациялана баштайт.
8-майда өкмөттүн жарандар менен байланыштыруучу kattar.kg порталынын иши ҮЗГҮЛТҮККӨ УЧУРАГАН. Маалыматты өкмөттөн тастыкташты.

Бектур Токтоноев,
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 758, 12-18-май, 2017-ж.