Санжар Бердибеков, ырчы, куудул: «КОЛУМ МЕНЕН КЫЛГАНДЫ МОЮНУМ МЕНЕН ТАРТЫП АБАК ЖАШООСУН КӨРҮП ЧЫКТЫМ»

Эл арасында куудул Санжар Бердибеков тууралуу ар кандай кептер айтылып жүргөн эле. Ал сөздөрдө чындык бардай куудул өзү да сахнадан көрүнбөй кетти. Куудул менен бетме-бет көрүшүп, маектешели деген оюбуз бир топтон бери ишке ашпай улам артка жылдырылып келе жатты. Көрсө, анын жүйөлүү себептери бар экен.

– Санжар, саламатсыңбы? Маектешели деп сүйлөшкөндөн бери улам бир жумушуң чыгып отуруп, арадан жарым жыл өтүп кетти окшойт. Чын эле жумуштун көптүгүнөн кол бошобой жаттыбы?
– Саламат, жакшы жүрөбүз. Эми бул шылтоо да. Акыркы убакта интервью бергим келбей, чыгармачылыкка деле мурункудай кызыкпай калдым.

– Мындай өзгөрүүгө бир нерсе себеп болуп жаткандыр? Адатта, жан дүйнө ооруп турганда эч ким менен сүйлөшкүң келбей калат го?..
– Акыркы учурда дин жөнүндөгү китептерди окуп жүрөм. Тагдырыңды, жашооңду элге жарнама кылып көп айта берген болбоорун түшүндүм. Жашоодо өйдө-ылдый көп болот турбайбы. Ылдый түшүп кеткенде, сен айтмакчы, эч ким менен сүйлөшкүң да келбей калат экен. Менде ошондой учур болду. Чыгармачылыкка кызыгуумдун кеткени, тентип эле жүргөндөн чарчадым, тажадым. Чыгармачылыкта жүргөнүмө 20 жыл болуптур. Мектепти бүтүп эле "Нур", "Түштүк таланттары" деген топторго кошулуп кеткем. Кошулганда кандай, алардын музыкалык аппараттарын ташыйт элем, афиша чаптачубуз, концерт учурунда эшик тосчумун. Алпаруучусу келбей калса, алпаруучу да кылып коюшат эле. Иши кылып, чоңдордун айтканын кылып жүрүп таасир алып, өз алдымча чыгып, ушул жашка келдик.

– Бир жолу телефон чалганымда "Ошко келип, жашаганымды көргүлө, эң жакшы тургандардын катарындамын" дедиң эле...
– Канча жылдан бери Ошто жашап, кайра Бишкекке көчүп келип, эки жакта тең жүрөм. Акыркы жолкусунда 5 ай жашап, жакында эле борборго келдим. Экинчи жолу үйлөнгөм, жубайымдын аты Айчүрөк. Айчүрөк экөөбүз таарынышып кетип, көнүп калган окшойм, үйдөн чыгып кетмей адатым кармап Ошко кетип калгам. Сени менен ошондо сүйлөшкөм. Оштогу 5 айдын 2 айында Гүлжигит Сатыбеков менен гастролдо жүрдүм. Ошто батирде турдум. Батирде болгонум менен, жакшы жашадым. Кичинемден эле бардар турмушта жашап келем. Таята, таенем колунда бар адамдар эле, ошон үчүн эрке өсүп калгам. Азыр деле эркелигим кала элек. Айтканымды бербейм, кылам дегенимди кылам. Ойлонуп көрсөм, көрүнгөн жакта эле жүргөн болбойт экен. Аялым менен жашайын деп кайра кайтып келдим. Айчүрөк экөөбүздүн 1 жарым жашта Юсуф деген уулубуз бар. Бир канча сериядан турган Юсуф пайгамбар тууралуу кино көргөм, ошол кинодон таасирленип, уулума ушул ысымды ыйгаргам.

– Мурунку жубайыңдан уулдарың чоңоюп калса керек?
– Мурунку жубайым менен ажырашканымда чоң жаңжал деле болгон жок. Эркеликтин айынан ичип кеттим. Ичкенде айлап жок болуп кетем. Мисалы, чакыруу менен 1-2 аптага кетсем, андан ары тааныштар чакырып, ал тааныштын дагы таанышы чакырып отуруп, 1-2 айга калып кетмейим бар. Анан аял кишиге түшүндүрүш кыйын болуп калат экен. Ошентип ажырашып кеттик. Улуу балам 8-классты аяктады. Ал Ак-Талаада таене, таятасынын колунда. Бир жылдан бери көрө элекмин. Экинчиси менин колумда, "сагынычыңды таратып кел" деп апасына жибергем. Каникул бүткүчө жүрөт го, быйыл 1-класска барат.

– Айчүрөк менен каяктан таанышып калдың?
– Бир тойго ырдаганы барып, жактырып калдым. Бир аз сүйлөшүп жүрүп, жакын туугандарыбыздан бата алып үйлөндүк. Жубайым өзү эки окуу жайын аяктаган. Учурунда бир окуу жайда мугалим болуп иштептир. Азыр убактылуу бош.

– Сен тууралуу эл арасында "түрмөгө түшүптүр" деген сыяктуу кептер айтылып жүрөт. Чындыгын өз оозуңдан угалы...
– Ошондой кырсык болду. Той болгон, тойдо сөзсүз ичимдик ичилет дегендей. Балдар арасында түшүнбөстүк болуп, мушташ болуп кетти. Мушташка катышкандардын баары өз жазасын алды. Мен дагы мыйзам чегинде, колум менен кылганымды моюнум менен тартып, СИЗОдо отуруп чыктым. Азыр абакта отуруу мода эле болуп калды окшойт. Саясатчылар деле отурбайбы.

– Ошол окуя сабак болуп, ичкиликти токтоткондурсуң?
– Негизи мен көп деле ичпейм. Бирок ичкенде жеңилирээкмин. Азыр ичпей калгам. Ал эле эмес, бир нече окуя себеп болду окшойт.

– Айрым сахналаштарыңа таарыныпсың, эмне болду эле?
– Мен таарынган жокмун. Тескерисинче, көбүн мен таарынтып алгам. Алардан гезит аркылуу кечирим сурайм. Кээ бирлерин сөгүп, айрымдарын уруп же жаман сөз айтып алышым ыктымал. Мунун баарын ичкиликке шылтабайм. Таптаза турганда деле мага туура эмес сүйлөп коюшса, дароо сөз менен болсо да ордуна коём.

– Ошондо кызуу кандуусуңбу?
– Тез жиним келип, тез тарайт. Мындан 5-6 жыл мурун дароо муштум колдончумун. Мушташка жакшы элемин. Мушташыш керек болсо бир жерин жулуп алам (күлүп). Жылына 2-3 ай спорт залга барчу адатым бар. Азыр кыркка келип калдык, сабырдуу болууну үйрөнүп келе жатам. Ойлоп көрсөм, мурун сабырым жок экен. Китеп окуган илимдүүлөрдүн арасында уруш аз болорун байкадым. Мен да акыркы убакта көп окуй баштадым.

– Кайрадан жаралсаң эмнени өзгөртүүгө аракет кылмаксың?
– Андай болбойт да. Болсо жаштайымдан китепке сугарылып окумакмын.

– "Киного тартылам" деп жаттың эле, съёмка башталдыбы?
– Мен тартылчу тасма комедия жанрындагы тасма экен. Сценарийди деле окуй элекмин, режиссёр "сен ойноп кетесиң, сага ылайыктап жазып жатабыз" деди. Башкы каарман мен, менден сырткары дагы куудулдар бар экен. Кечээ сүйлөштүк, тартуу иштери Көлдө болмой болду.

– Чыгармачылыкка кызыгуу кетип калды деп жатпайсыңбы, башка тармакка кетүү оюңда барбы?
– Дин жолуна түшүп, башка тармакка кетсемби деген тилектерим бар. Ишке ашса, убагында көрөсүңөр да. Учурда ОшТУнун экономика факультетинин студентимин. Бир иш боюнча азыр сүйлөшүүлөр болуп жатат, аны тактап айтпай эле турайын.

Сүйүн Кулматова
star@super.kg

 Кыстарылган видео