БИР БҮРКҮМ

Республика боюнча жогорку окуу жайларга БЮДЖЕТТИК негизде кабыл алуу аяктап, 5440 орундан 421 орун бош калган. Ал эми контракттык негизде окууга кабыл алуу 25-августта аяктайт. Бул тууралуу Билим берүү жана илим министрлигинен кабарлашты.
АЖЫЛЫК САПАРГА барчулардын алгачкы тобу 7-августта Бишкек жана Ош шаарларынан учуп кетет. Бул тууралуу муфтияттан кабарлашты.
1-сентябрдан тарта Бишкектин 11 мектебинде КӨП ТИЛДҮҮ билим берүү программасы пилоттук негизде ишке ашырыла баштайт. Ал үчүн атайын 132 окутуучу даярдалган.
1-сентябрда өлкө боюнча 100 жаңы БАЛА БАКЧА ишке берилет. Алардын 20сы Чүй облусуна таандык. Аталган объекттер Дүйнөлүк банктын каржылоосу менен курулууда.
2017-жылдын алгачкы 5 айында ТЕМИР ЖОЛ транспорту аркылуу жүк алмашуу көлөмү 2016-жылга салыштырмалуу 10 пайызга өскөн. Ал эми жүргүнчүлөрдү ташуу 6,7 пайызга жогорулаган.
Ички иштер министрлигинин жарым жылдык ишинин жыйынтыгы боюнча, жалпы 12 миң 908 КЫЛМЫШ ИШИ катталып, анын 12 миң 209уна кылмыш иши козголгон. Маалыматты ИИМдин башчысы Улан Исраилов ачыктаган.
Жыл башынан бери республика боюнча өрт кырсыгынан 39 адам КӨЗ ЖУМГАН. Маалыматты ӨКМдан таратышты.
ЖАРАТЫЛЫШ ГАЗЫНА август айында метр кубу үчүн 14,39 сом төлөйбүз. Маалыматты “Кыргызстан Газпром” ишканасынан таратышты.
ПРЕЗИДЕНТТИК ШАЙЛООНУ өткөрүү үчүн республика боюнча 2369 шайлоо участкасы ачылат. Анын 37си чет өлкөдөгү жарандарды тейлейт. Аталган чечимди БШК 31-июлда кабыл алган.
Жарым жылдыктын жыйынтыгы менен КОРРУПЦИЯЛЫК кылмыштуулук боюнча өлкөгө 139,7 миллион сомдук зыян келтирилген.
Июль айында Кыргыз өлкөсүнүн МАМЛЕКЕТТИК КАРЫЗЫ 24 миллион долларга өскөн. 31-майга карата берилген маалыматка караганда, жалпы мамлекеттик карыз 4 миллиард 243 миллион 52 миң долларды чапчыган. Бул тууралуу Каржы министрлигинен таратышты.
10-июлда өлкөбүздөгү ТЕЗ ТАМАКТАНУУЧУ жайлардын 75 пайызы текшерилип, 720 объект нормага жооп бербегендиги үчүн жабылган. Маалыматты Саламаттыкты сактоо министрлигинен кабарлашты.
2016-жылдын май айынан тарта 300 жаран арзандатылган ГЕМОДИАЛИЗДЕН пайдаланган. Бул тууралуу саламаттыкты сактоо министри Талантбек Батыралиев билдирди.
Өлкө аймагындагы Талас, Лейлек, Базар-Коргон, Аксы, Жети-Өгүз, Нарын райондорунун токойлорунда ӨРТ чыгышынын коркунучу жогору. Маалыматты ӨКМдан таратышты.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 770, 4-10-август, 2017-ж.