Якутиянын токоюнда асылган абалда табылган мекендешибиздин эжеси: «ИНИМДИ КИМ ӨЛТҮРГӨНҮН БИЛИП ТУРСАК ДА, КҮРӨШҮҮГӨ АЛЫБЫЗ ЖЕТПЕЙ ЖАТАТ»

Ушул жылдын 12-августунда Якутиянын Усть-Нера шаарчасынын жанындагы токойдон Ысык-Көл облусунун Түп районуна караштуу Токтоян айылынын 21 жаштагы тургуну Илгиз Алмазбек уулунун асылып турган абалдагы жансыз денеси табылган. Ал ошол шаарчада ашпозчу болуп иштеп жатканына болгону 3 гана күн болгон. Маркумдун сөөгү 18-августта мекенине алынып келинип, жерге берилди. Туугандары Илгиз киши колдуу болуп каза болду деген ойдо.

«АКЧАСЫН АЛА АЛБАЙ КОЖОЮН ЭКӨӨНҮН ОРТОСУНДА ЧЫР БОЛГОН ЭКЕН»

Маркум эжеси Айдана менен Якутияда чогуу иштеп, батирде чогуу жашашчу. «Иним киши колдуу болуп каза болду» деген Айдана Алмазбек кызы буларды айтып берди:
– Мен ушул жылдын май айында Якутияга иштегени баргам. Бир айдан соң ал жактан жолдошум менен иниме куруучу болуп иштей турган жумуш таап, жаныма чакырып алгам. Экөө бир айдай ошол курулушта иштешти. Бирок иним эс-учун билбей жыгылып, анын белинин 5 жеринде грыжа бар экенин ооруканага барганда гана билдик. Иним үйдө бир айга жакын жатып калды. Кыргызстанга кетирейин десем иштеген жеринен акчасын бербей кармалып калды. Акчасын ала албай жүргөндө ал ишкананын жетекчиси менен сүйлөшүп, ортосунда уруш болуптур. Акчасын бербей жүргөн армян улутундагы адам иниме «Жол салуу боюнча тендер утуп алдым. Ошол жерге ашпозчу болуп иштеп бер, белиңе дагы күч келбейт, маянасы да жакшы» деп сунуштаптыр. Ошентип Илгиз 9-август күнү жумушка кеткен.

«БИРГЕ ИШТЕГЕН АРМЯНДАР ЖАЛГАН АЙТЫШТЫ»

– 12-август күнү саат 4 жарымда иним менен телефондон сүйлөшкөм. Кечки 8дерде «иниң саат 6ларда асынып алыптыр» деген кабар келди. "Мени каза болгон жерине алып баргыла" десем, «азыр тергөөчүлөр келет, чогуу барасың. Алар сурак жүргүзүп, окуяны иликтешет» дешти. Бирок тергөөчүлөр келген жок. Эртеси «денесинде тактар жок, өзү асынып алган. Ошондуктан кылмыш иши козголбойт» деген жоопту уктум. Тергөөчү мага «Илгиз орус улутундагы бир кыз менен сүйлөшүп жүргөн. Экөөнүн үйлөнүшүнө кыздын ата-энеси каршы болгондуктан муунуп алган» деп айтты. Иним менен чогуу иштегендер аны «Лена аттуу кыз менен сүйлөшчү» деп коюшса керек. Негизи иним ал кыз менен сүйлөшүп калчу, бирок ортосунда үйлөнүү маселеси тууралуу сөз болгон эмес.
Иштеткени алып кеткен адам биз жашаган жердин бай адамы, укук коргоо кызматкерлерин да колго алып койгон киши болчу. Иним иштеген жерге барсам, ал жактагылар «Илгиз түшкү тамакты берип, идиштерди жууп жүргөн. Биз жол салып жаткандыктан, бир канча метр алыстыкка кеткенбиз, келип эле таппай калдык. Издесек дайыны чыкпайт, бир кезде ит жаныбызга келип үрүп жолду көрсөттү. 120 метрдей барып, тизелеп асынып алганын көрдүк» дешти. Ал эми ишкананын жетекчиси өзүн жок дедиртип коюп, аны менен сүйлөшө албай калдым. Ал жакта иним менен бирге иштеген армяндар мага «эртең мененки саат 8де каза болгон» деп айтышып, аягында «биз нес абалында сүйлөп алдык» деп кутулушту.

«ДЕНЕСИНДЕ ОКШОШ ТАКТАР БАР ЭКЕН»

– Оюбузча, ишкана жетекчиси өч алуу максатында инимди ашпозчулук жумушка чакырган окшойт. Себеби барганына 3 күн болгондо «асынып алды» болуп жатат. Экспертизанын жыйынтыгына ишенбей турганымды диаспоранын өкүлдөрүнө айттым. Алар «анда кайра экспертиза жасаталы, дагы 20 күндөй сөөк кармалат» дешти. Инимдин өлгөндүгү тууралуу кабар ата-энеме жеткендиктен, сөөктү күтүп ансыз деле соолуп калышкан болчу. Айтсам, алар «Кудайга койдук, баланы кыйнабай алып келе бергиле» дешкендиктен сөөктү алып келе бердик.
Сөөк жууган кишилер Илгиздин төшү менен бөйрөгүнүн үстү жагында окшош болгон көк-ала эки такты көрүшүптүр. Киши колдуу эле болгон окшойт. Инибиздин өмүрүнө кол салган адамдарды Кудайга койдук. Биз кимдин колунан келгенин билип турсак дагы, аны менен күрөшкөнгө алыбыз жетпей жатат.

«БАЛАМ ТЫНЧ ЖАТСЫН»

Илгиздин апасы Майрамкүл Сыдыкова буларды кошумчалады:
– Мен энемин да, баламдын сөөгүн кайра-кайра ачтырып кыйнагым келбей жатат. Эми жок дегенде тынчыраак жатсын. Акыркы жолу уулум менен 9-августта сүйлөшсөм, «апа, 2 айга ашпозчу болуп иштемек болдум» деген. «Белиң ооруса кыйналасың, аман-эсен кел» деп айттым эле. Кызым «жетекчисинин эле колунан келди» деп какшап жатат, бирок жөнөтсөм анын колунан эмне келет?..
Балам эрежесиз эр уруш менен машыкчу. Эми классташтары ай сайын анын элесине арнап айылда спорттук мелдеш өткөрүп турмай болушту.