КЫРГЫЗ “БАКТЫЛУУ ЖАРАН” РЕЙТИНГИНДЕ АРТТА КАЛДЫ...
8-сентябрь, жума намаз учурунда өлкөнүн бардык мечиттеринде МЬЯНМАДА каза болгон мусулмандарга арналып куран окулат. Маалыматты муфтияттан таратышты.
Мамлекеттик БАЖЫ КЫЗМАТЫ 8 айдын жыйынтыгы боюнча бажы төлөмүнөн 20,9 миллиард сом жыйнаган. Бул 2016-жылга салыштырмалуу 2,6 миллиард сомго жогору.
Өлкөнүн Волейбол федерациясынын президенти болуп кайрадан мурунку башкы прокурор ЭЛМУРЗА САТЫБАЛДИЕВ шайланды.
КЫРГЫЗ ЭКОНОМИКАСЫН жакынкы 3 жылда 4,5 пайызга көтөрүү пландалды. Аталган маалымат 2018-2020-жылдарга карата республикалык бюджеттин долбоорун талкуулоо учурунда айтылды.
Сентябрь айына карата өлкөдө ЖАРАТЫЛЫШ ГАЗЫНЫН 1 м3 14,39 сом деп белгиленди. Август айында да баа ушундай болгон.
“ДҮЙНӨНҮН БАКТЫЛУУ ЖАШООЧУЛАРЫ жашаган өлкө” рейтингинде Кыргыз мамлекети 122 өлкө ичинен 98-орунга татыган. Казакстан 60-орунга чыккан. Ал эми эң бактылуу адамдар Норвегияда жашаары аныкталды. Маалыматты “The Spectator” журналы жазып чыкты.
Түштүк Корея инвесторлору Кыргыз өлкөсүнө жаңы ИНФЕКЦИЯЛЫК КОРПУСТУН курулушу үчүн 10 миллион доллар берүүгө даяр. Мындай маалымат 4-сентябрда эки өлкөнүн саламаттыкты сактоо өкүлдөрүнүн жолугушуусунда айтылды.
2016-жылы “ТЕЗ ЖАРДАМ” кызматынын дарыгерлерине жарандар тарабынан 17 кол салуу болгон. Бул тууралуу Бишкектин Медициналык "Тез жардам" кызматынан билдиришти.
Өлкөнүн 450дөн ашуун айыл аймагындагы 9 гана айылда АЯЛ КИШИ жетекчилик кылат. Мамлекеттин башкаруусуна аялдар аз тартыла баштады. Мындай пикирин Жогорку Кеңештин депутаты Аида Касымалиева парламент жыйынында билдирди.
Бишкектин муниципалдык БАЛА БАКЧАЛАРЫНДА 2017-жылы 1252 окутуучу эмгектенет. Бул былтыркыга салыштырмалуу 33кө аз. Бул тууралуу калаанын Билим берүү башкармалыгынан кабарлашты.
Кыргыз өлкөсүндө 2017-жылдын январь-август айларында курулуштарды жүргүзүү үчүн 730 компанияга СЕРТИФИКАТ берилген.
2017-жылдын 7 айында 2016-жылкыга салыштырмалуу ДОЛЛАР 2,8 пайызга, евро 4,8 пайызга арзандаган. Маалыматты Улуттук статистика комитети таратты.
Өлкөдө Д.С. аттуу жаран "ИСЛАМ МАМЛЕКЕТИ" террордук тобунун мүчөсү" деп кармалды. УКМКнын маалыматына караганда, ал учурда аталган мекеменин тергөө абагына киргизилген.
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.