Укуктук кеңеш. «МАЙЫПМЫН, АЯЛЫМДАН АЛИМЕНТ ӨНДҮРӨ АЛАМБЫ?»
Окурмандардын суроолоруна Бишкек шаардык адвокатурасынын жактоочусу Алымбаева Эльнура Сталиковна жооп берет.
«ЖОЛДОШУМ ҮЙДӨН КУУП ЧЫКТЫ, КАНТИП АЖЫРАШЫП, АЛИМЕНТ ӨНДҮРӨ АЛАМ?»
– Жолдошум мени үйдөн кууп чыкты. Эми аны менен ажырашып, 11 жаштагы кызыма алимент кестирейин дегем. Алимент кызымдын окуусуна жетсе болду. Сокулук районундагы Новопавловка айылында үйүбүз бар. Учурда эжемдикинде жашап жатабыз. Күйөөм курулушта иштейт. Мен Нарында катталгам, жолдошум Новопавловкада катталган. Арызды кайсы жакка берсем болот?
Насикат, Чүй облусу
– Жубайлар ажырашып жатканда ортодо 3 жашка чейинки баласы болсо, аял киши өзү катталган райондук сотко кайрылат. Кызыңыз 11 жашта болсо, анда күйөөңүз жашаган аймактын райондук сотуна доо арызы менен кайрылып, өз укугуңузду коргой аласыз. Алимент өндүрүү үчүн арыз гана жетиштүү. Сиз жазган арыздын негизинде 3 күндүн ичинде соттун буйругу менен алимент өндүрүлөт. Сот жолдошуңузду чакырып, анын төлөп же төлөй албастыгын сурабайт. Айыл жергесинде жана шаарда алименттин көлөмү статистика менен аныкталган. Эми үй маселеси боюнча, үйдү жолдошуңуз экөөңүздөр чогуу салган болсоңуздар, сиз анын жарымына ээ болууга укугуңуз бар. Эгерде үйдү сиз турмушка чыкканга чейин жолдошуңуз салган же анын атасы алып берген болсо, анда талаша албайсыз.
«КАЙНЕНЕМ БАЛАМДЫ БЕРБЕЙ ЖАТАТ»
– 3 жылдан бери келинчегим экөөбүз таарынышып жүрөбүз. Келинчегим Орусияда иштеп жүрөт, балам болсо 3 жылдан бери кайненемдикинде. Келинчегим «баланы ал» дейт, бирок кайненем бербей жатат. Кандай кылып алсам болот?
Советбек, Талас облусу
– Эгер келинчегиңиз «ал» деп жаткан болсо, кайненеңиздин үйүнө барып, эч кимден уруксат сурабай эле балаңызды жетелеп кетсеңиз болот. Мындай учурда кайненеңиз укук коргоо органдарына кайрылган убакта дагы баланы сизден ала албайт. Мыйзам боюнча бала атасында же апасында болушу керек.
«КОШУНАМ ҮЙҮМДҮН ТҮБҮНӨ АЖАТКАНА КУРУП ЖАТАТ»
– Кошунам биздин уктоочу бөлмөнүн терезесинин түбүнө ажаткана куруп жатат. Бул жерге курбоону сурансак, көнбөй койду. Кимге кайрылам?
Назгүл, Ак-Ордо конушу
– Кошунаңыз өзүнө тиешелүү жер тилкесин каалагандай пайдалана алат. Бирок ажатканадан жыт чыгып, ал сиздерди тынчсыздандырса, башка кошуналарыңызды чогултуп, кошунаңызга эскертүү бересиз. Ага да көнбөсө, кошуналарыңыз менен акт жазып, доо арыз менен сотко кайрыла аласыз. Сот келип текшерүү жүргүзүп, ажаткана тоскоолдук жаратып жатканын тастыктаса, ошого жараша сот чечим чыгарып берет. Таң калычтуусу, уктоочу бөлмөнүн так түбүнө салышы мүмкүн эмес. Мыйзамга ылайык эки кошунанын үйү сызыктан 1,5 метр алыстыкта салынат. Эгер сизге тиешелүү аймакка кирип кетсе, анда каттоо кызматына кайрылып, ченетип, алар түзгөн акттын негизинде сотко кайрыла аласыз.
«АЯЛЫМ, БАЛДАРЫМДАН АЛИМЕНТ ӨНДҮРӨ АЛАМБЫ?»
– Өзүм 2-топтогу майыпмын. Аялым, балдарым мени таштап кетишкен. Аларга алимент төлөтө аламбы?
Бакыт, Жалал-Абад облусу
– Иштегенге ден соолугуңуз жол бербесе, багар-көрөрүңүз жок болсо, мүмкүнчүлүгүңүз чектелгенге чейин жубайыңыз менен балдарыңызды баккан болсоңуз жана аны тастыктай турган документтериңиз болсо
(мисалы, нике күбөлүгү, балдарыңыздын метрикалары), анда сотко берип алимент өндүрө аласыз. Арызыңызга мунун баарын тастыктоочу документтерди тиркеп, күбөлөрдүн көрсөтмөлөрүнө ылайык, соттон чечим чыгартып алсаңыз болот.
Адвокат Эльнура Алымбаева бардык жарандар үчүн акысыз кеңеш берет. Ал эми үй-бүлөлүк маселелерден жабыр тарткан, зордук-зомбулукка кабылган кыз-келиндер үчүн акысыз адвокаттык кызмат көрсөтөт.
Окурман, сиз укуктук жактан коргоого муктажсызбы? Анда биздин «Адистин кеңеши» рубрикабыз кызматыңызда. Сиздин тынчыңызды алган суроолорго тажрыйбалуу мыкты адистер жооп беришет. Кат жазыңыз, кеңеш сураңыз! Суроолорду (0312) 32 33 26 номери, 0557756319 WhatsApp номери аркылуу берсеңиздер болот же kenesh@super.kg дарегине кат жазыныз.
Перизат Музуратбекова
koom@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (23)
Тообо,"баланызды эч кимден сурабай эле жетелеп кетсениз болот"дептир го.Кандай адис бул?Эптемей.Эртен аялы айнып кайра талашса эмне болот?Кайра аялы жетелеп чыгып кетеби атасынан?Баланы кууратышат го анда!Закондуу турдо,документ жасап алып алыныз дебейби!Тем более аялы макул болуп атса.Арыз-доом жок,опекун атасы боло берсин...деп сот аркылуу документ берет да.Болбойт мындай адис!
ekaterinburg,мен да таң калдым көчөдөгү эле эки дос бири бирине кеңеш бергендей го .Билимдүү адистин берген кеңеши аябай грубо гооо
Майып болуп калса таштап кеткен туура эмеско балдары бой жеткен болсо жардам берип карап коюшса болмок экен
Аялынан алимент сураганды биринчи угуп атам кудая тобоо,эркектер уй-було бакпай эле аялдар багып калды го,кудай сактаса экен бодоо кырсыктан.туура айтып атышат майып болсо окмотко кайрылсын
Кайын синдим деле еки баласы менен ажырашып кеткен алимент алалбай койдук нике куболугу жок екен кеебирлер алса болот дейт кееде керек болот екен акча тооко деле жем керек дегендей
munira-tilen,Балдарын атасын аныктаган куболук болсо алимент алат мен да жолдошум экообуздун нике куболугубуз жок болгон мен сотко арыз жазгам баламдын атасы экендигин аныктаган куболук менен.
Бул эмне болгон адис бала атасында же апасында болуш керек деп андай эмес башкача да болот мисалы баланы таенеси 3жыл баккан болсо атасына караганда көбүрөөк то есть то закон ошо кайнене тарабында болот
Оо Кудай! Эмне шумдук! Admin_superstan башка адис жокпу?, суроо-жоопко. "Аялым айтты" деп эле, эч кимден сурабай, баланы жетелеп кете берсе болмок беле. Баланы уурдады деп, органдарга кайрылса эмне болот? Аялы айткан эмесмин деп танып кетсе эмне болот...?
Snejana,балким биздин закон ошентип жазылгандыр. Ал да окуганын айтат да.
Бул майып кишинин балдары бойго жетип жакшы иштерде иштеп жаткан болсо,озу аларды майып болгуча баккандыр,ошого жардам сураса болмок.Атасы алимент тологуло дегени башкача угулат экен.Майып болсо мамлекеттен эле акча ондуруп жашаса болот,журогу болсо балдары да жардам берээр.
Убагында ден соолугун кетирип балдарын бакса, ичиндирип-кийиндирип адам катарына кошсо, ошолорду деп ысыкта ыссык дебей,суукта суук дебей жанын карч уруп жүрүп,ден соолугунан ажыраса,неге бойго жетип өз алдынча ишке жарамдуу болуп калган баласы Карабаш керек. Ырас атадан баш тартып жүз үйрүп кеттиби, өткөн жашоосун эске алып алиментти мажбурлап болсода толотушсун. Же апасынын ичинен солокмондой бп ишке жарамдуу бп төрөлүп өз киндигин өзү кесип жашап кеттиби?
Баардык онуккон олколордун закондорунда кимиси иштесе, акчасы болсо, иштебегенине алимент толойт. Германияда бир аялды билчумун, куйоосуно омур бою алимент толочу, беш баланы озу баккан, куйоосу майып эмес, сопсоо эле. Болгону аялдын куноосу жакшы айлык алчу.
Ошондуктан алар кобунчосу официально никеге отургандан коркушат. Закон озу ошого такаган.
Тоа кылдым ушундай жашоодон,,,,,теманы окуп алып супер инфо адашып жазганбы депмин.
Эми соо кезинде балдарын багып, окутуп, билим берип чонойтуп койсо. Кетип калганы обидно болотда атасына эркек болсо деле. Алимент эмес озунун совестьти менен жардам берип келип кабар алып турушу керек. Майып болуп калган кезде таштап кетпей. Азыркы жашоодо озундон калба. Ооруп калсан сен уже эч кимге керегин жок.
Уйбуло жана нике кодексинде толук корсотулгон жубайлардын укуктары жана милдеттери.. эгерде жубайлар ажырашкандан кийин материалдык абалы начар болсо сотко алимент ондуруу жонундо доо арыз берууго болот.бул аялдарга гана тиешелуу эмес куйоосунунда укугу
Эльнура эже,мен абдан кубанычтамын сиздин кыргыз элине озунун укуктарын жеткирип, ушундай чон салымынызды кошуп жатканынызга. Ишинизге ийгилик.Сизди терен урматтаган Жанарыктан синдиниз Бермет.
Акча менен окуган адисго бул. Сиздин кеңешиңиз менен баланы уруксатсыз эле үйүнөн жетелеп чыгып кетсе бала уурдалган деп арыз жазып жоопко тартылса эмне болот. Балким аялы ачуу үстүндө эле ала бер деп айтып алгандыр же таптакыр антип айтпагандыр. Же сөзүн танып кетсечи? 2-топтогу майыпмын деген киши мамлекеттен жардам сурап кайрылыш керек. Аялынан алимент сураганы уят. Тем более балдарын аялы багып жатса...Балдарын жакшы тарбиялаган болсо айттырбай бой жетсе келип каралашат...
