КОКТЕЙЛЬ (Сүйүү, жек көрүү, мансап тууралуу жашоодогу чыныгы окуялардан алынган сериал)

(Башталышы өткөн сандарда)

Диктофондогу сүйлөшүүнү угуп отурду Арсен. Канча айдан бери жасап жаткан иши ушул. Азыр ал Болуштун алдыңкы пландарынын көбүн аки-чүкүсүнө чейин билип алды. Керек болсо ал кандай жайларда, кантип эс алары, канча чөйчөк арак ичкенден кийин мас болуп каларынан өйдө иликтеп койду.
Угуп бүтүп, отургучка чалкалай отурду. Эгер бардыгы алар ойлогондой ишке ашчу болсо... Оо, анда Арсен жомоктогудай жашап баштайт. Акча, бийлик, бир кезде тебелеп-тепсеп өткөн Болуш анын буйруктарын кың дебей аткарган бир байкушка айланмак. Башкысы, баарын идеалдуу ишке ашырыш керек. Саатын карады, Бегимайдын келер убагы болуп калыптыр.
Тык-тык. Эшикти Бегимай кагып жатканын дароо түшүндү.
– Кире бер, сулуу.
– Кандайсың?- кирип келген кыз Арсенди жүзүнөн сүйдү. Бардык таарынычтарды унутуп койгондой. Анткени ичинде үмүт бар.
– Жакшы.
– Билесиңби, Арсен, бул диктофонду кантип катарымдын айласын таппай калдым, столдун алдына жармаштырып келдим, килемдин астына катып жүрдүм, вазанын ичине салдым... Деги сага жардам берип жатабы? Андан эмнелерди угуп жатасың?- Арсендин колундагы диктофонду көрүп заарканып кетти.
– Сен бир да жолу диктофонду өз алдыңча укканга аракет кылган жоксуңбу, Бегимай?
– Жок.
– Эмнеге?
– Жөн эле. Сенин торуңдамын да баары бир. Балким, тапшырмаларыңдын баарын жакшы аткарып берсем, өзүң айткандай, Гелендвагенди, үйдү каттатып, биротоло торунан бошотобу деп жүрөм.
– Гелендваген, үй эле керекпи, ээ?- Арсен жылмайып койду.
– Бир эсе сени менен көрүшүп туруунун бир шылтоосу да бул,- ичиндеги оюн ачык айтып салды.
– Эми диктофонду алып барбай эле койсоң болот. Болуш бардыгын чечип бүттү. Ал тизмеде 3-болуп шайлоого жөнөдү. Менимче, алар жеңишке жетишет. Сен эми башка тапшырманы аткарышың керек.
– Уф-ф!
– Ушуну аткарып бүтөсүң, анан экөөбүз Майамиге учуп кетебиз.
– Хе...
– Ишенбей турасың го. Жигиттик сөзүм!
– Эмне тапшырма?- Бегимай кубанып кеткенин жашырмакка сөздү улады.
– Баягы орус кызды Болуштун коюнуна салып бер. Үйүңө алып бар, тааныштыр, курбум де, айтор, ушундай. Башкысы, Болуш менен Лиза экөө гана калсын. Калганын Лиза өзү аткарат. Эки күндөн кийин ушул жерге мен Лиза менен келем.

ххх

– Тиги каякта жүрөт?- Арсен Чыңгыздан сурады.
– Бөлмөсүнө кирди окшойт.
Жигит Лизанын бөлмөсүнө баш бакты.
– Лизка...
– Оу,- кыз мас окшойт. Араң эле жооп берди.
– Сени менен сүйлөшсөм болобу?
– Аябай сылык-сыпаа болуп кетесиң го. Арс, мен сенин айбан экениңди билем да. Мага антип анткорлонбочу.
– Сенин сөздөрүң мени таарынтып жатат.
– Ошондой де. А сенин кылгандарың адамды тирүүлөй өлүк кылып салганы менен ишиң жокпу?
– Лиза, сага колдон келген жакшылыгымды кылып жатам. Машина алып бердим, каалаганыңды кийип жатасың, түнкү клуб дегенден деле калбайсың. Сага дагы эмне керек?
– Мен сага керекмин. Сен ошон үчүн жасап жатасың мунун баарын. Пайдаланганы жатасың мени.
– 150 миң доллар алганы жатасың.
– Ошол ишти эртерээк бүтүрөлү. Мен кетем. Чыдабай калдым,- Лиза оор үшкүрдү.
– Жуунуп, тазаланып, өзүңө кел. Жакында сен Болуш менен таанышасың.
– Адегенде 150 миң долларды менин эсебиме котор.
– Жок, Лиза, андай болбой калат экен. Мен Эркин байке менен сүйлөштүм,- Арсен Оштогу укук коргоо органдарында иштеген таасирдүү таанышы аркылуу зордуктоо жалаасын ишке ашырабыз деп орус кызды ишендирип койгон болчу.
– Эмнеге болбойт экен?
– Сен ал жакка арыз жазгандан кийин текшерүүлөр башталат. Болуш да таасирдүү киши. Текшере келгенде сенин эсебиңден жанагынча акча чыкса, ит эле болобуз. Баары атайын жасалганы билинип калат.
– Ошондо эмне деген турасың?
– Билбейм, муну кайда катасың? Бирок мен колуңа эле бере алам,- Арсен өз бөлмөсүнө барып кайра келди да, кара баштыктан белинен байланган жашыл акчаларды чыгара баштады. 15 боо.
– Мына, 150 миң.
Кыздын дене бою калтырап чыкты. Ал өмүрүндө мынчалык көп акча көргөн эмес. Соолуга түштү.
– Жок, макул эмесмин мен!- кыз коркуп кетти. Ал эми гана «ушунча акчаны бергенге Арсен макул болуп жатса, демек, ал өтө эле чоң, коркунучтуу иш баштап алыптыр» деп ойлонгонго жетишти.
– Лиза, артка жол жок. Мен Санжар акеге сени макул болду деп айткам. Эгер сен баш тартчу болсоң, ал сени соо койбойт, билесиң. Мен сага жардам кылып жатам, түшүндүңбү? Таптакыр кур жалак калбасын, ушул акча менен четке учуп кетсин деп жатам. Ишти бүтүрүп, арызыңды жазгандан кийин мен айткан жериңе ушул акчаларың менен өзүм жеткирип коём.
Лиза эми туңгуюкта экенин түшүндү. Эгер муну аткарбаса, Санжар чын эле аны соо койбойт. А Арсен... Арсенде дагы эле үмүт бар.
– Сен ушул акча менен четке учуп кетишиме кепилдик болуп бересиңби?
– Жигиттик сөзүм. Кепилдик берем. Эгер сенин талаптарың аткарылбай калса, биздин жасаган иштердин баарын милицияга айтып салып, өч алсаң болот.
– А мен айтам, эгер аткарбасаңар!
– Мен баары бир сени жакшы көрөрүмдү билип кой, Лиза. Сенин талаада калышыңды каалабайм. Сага ишенген үчүн ушул жумуштардын баарын тапшырып жатам.

ххх

«Белгилүү ишкер саясатка аттанды». Бегимай бадырайып Болуштун сүрөтү чапталган гезитти алып окуду.
– Ооба, ошондой,- Болуш күлүп кофесин ууртады.
– Демек, мен жакында депутаттын аялы болуп калат турбаймынбы, ээ?
– Балким, премьер-министр болуп калаттырмын же министр.
– Министрдин аялы. Сонун угулат экен.
– Башкысы, жеңип чыгыш керек эми. Бир жумадан кийин баары чечилет.
– Жеңип чыгасыз. Сиз деген жеңиштен башканы билбеген эркексиз да,- Бегимай эркелеп Болуштун моюнуна асылды.
– Бүгүн үйгө барасызбы?
– Ооба.
– Анда мен депутат күйөөмдүн келишине эртерээк барып даярданайын,- кыз Болушту чоп эттире өөп, анын иш бөлмөсүнөн чыгып кетти.

ххх

Шайлоо иштери Болуштун шайын алып койду. Чоң акча, чоң күч сарпталды. Тизмеде 3-болгону менен, баары эле партиянын көмүскө лидери Болуш экенин түшүнүп жатышат. Ал болсо эч сыр алдырбайт. Утуп келсек башкача оюн башталат деп алакан ушалап турган чагы. Божомолдорго караганда, алар жок эле дегенде 3-орунду алышат. Бирок алдыда эмне болору табышмак. 1 жума чыдасын. Баары айкын болот.
Унаанын арткы орундугунда ар нерсени ойлоп келе жатты.
– Келдик, Болуш Сардарович.
Шашпай унаадан түштү. Кийин үйдүн алдындагы кымбат шарап саткан дүкөндөн ичимдик алмакчы болуп, бирок жакында эле достору Англиядан алып келген вискини Бегимайдыкына таштаганын эстеди. Шарап ичип, денесин жибитип алгысы келген. Өйдө көтөрүлдү.
Бегимай жанатан Болуштун унаасы үй алдына токтогонун көргөн. Коңгуроо басылышын күтпөй эле эшик ачты.
– Кандайсыз? Кечириңиз, күтүүсүз мейман келип калды биздикине.
– Аа, эч нерсе эмес. Ким?- апасы келген окшойт деп ойлоду Болуш.
– Менин курбум Лиза. Ал азыр душта. Жүрүңүз тамактаналы. Куурдак бүгүн бизде.
– Аа...- дал ушул тапта денесине сүлгү оронуп жуунуучу бөлмөдөн Лиза чыга келди.
– Ой, кечиресиз,- деди орус кыз чочуган болуп. Чачтары сууланган, көздөрү көк, сулуу жүздүү, сары чач кызды баштан этек карап алды Болуш. «Буттары сонун экен» деди дароо ичинен. Сүлгү кыздын жамбашын болор-болбос эле жаап турат экен. Кыз бурула берип жакынкы бөлмөнү көздөй жөнөгөндө Болуш ушуну байкады. Жылмайып койду өзүнчө...

(Уландысы кийинки санда)