БИР БҮРКҮМ. МЕКТЕПТЕР 5 КҮНДҮК ОКУУ ТАРТИБИНЕ ӨТӨТ...

Өлкөдө билим берүүгө жараксыз, кароосуз калган 7 ДИНИЙ БИЛИМ берүү мекемеси жабылды.
Премьер-министр Сапар Исаковдун кеңешчиси болуп КАЛЫКБЕК СУЛТАНОВ, ал эми коомдук башталыштагы кеңешчиси болуп ТАТТУ МАМБЕТАЛИЕВА дайындалды.
Ар бир төрөлгөн балага СҮЙҮНЧҮ ПУЛ керектүү документтерди тапшыргандан кийин 10 жумушчу күндүн ичинде берилет.
Билим берүү тармагын жакшыртуу үчүн ЖАРДАМ ИРЕТИНДЕ Европа биримдиги Кыргыз мамлекетине 10 миллион евро бөлдү. Дагы 33 миллион евро берилиши күтүлүүдө.
Кыргыз өлкөсү «Henley & Partners консалтинг» компаниясынын 2018-жылга карата түзгөн ПАСПОРТ РЕЙТИНГИНДЕ 76-орунду ээледи. Казакстан 65-орунга, ал эми Өзбекстан менен Тажикстан 81-орунга татыган. Аталган рейтинг визасыз режимге шарт түзгөн өлкөлөрдү аныктоо үчүн чыгарылган.
Түркияда 22 жаштагы кыргызстандык кызды ЗОРДУКТАГАН жергиликтүү тургун айыптуу деп табылып, 30 жылга эркинен ажыратылды. Аталган окуя 2017-жылдын күзүндө болгон.
2017-жылдын декабрында ЖОЛ КЫРСЫГЫНАН каза болгон милиция кызматкеринин үй-бүлөсүнө кесиптештери 276 миң сом жардам көрсөтүштү. Аталган жол кырсыгынан 7 адам каза болуп, анын ичинде Токтогул райондук ички иштер бөлүмүнүн аймактык тескөөчүсү Түгөлбай уулу Нургазы, жубайы жана эки баласы да болгон.
Башкы прокуратура «ЭКСТРЕМИСТТИК жана ТЕРРОРИСТТИК маанайдагы маалыматтарды жайылтат» деген шек менен 159 сайттын өлкөдөгү ишмердүүлүгүнө бөгөт койду.
Индиядан алып келинген «Бабатрон II» үлгүсүндөгү НУР ТЕРАПИЯСЫНЫН аппараты 15-январдан тарта оорулууларга пайдаланыла баштайт.
Жогорку Кеңеш МЕКТЕПТЕРДЕГИ окуу жумалыгын 5 күндүк тартипке өткөрүүгө багытталган мыйзам долбоорун үчүнчү окууда жактырды. Эми президент кол коюшу керек. Аталган мыйзам толук колдоо тапса 2018-жылдын 1-сентябрынан тарта ишке кирет.
Кыргыз аялдары биринчи баласын орто эсепте 23 ЖАШЫНДА ТӨРӨЙТ. 2012-жылы аталган көрсөткүч 23,4 жашка барабар болгон. Маалыматты Улуттук статистика комитетинен жарыялашты.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 793, 12-18-январь, 2018-жыл