ТӨРТ АЯЛ АЛУУНУН ТӨРТ СЕБЕБИ

Кыргызстандагы кылмыш-жаза кодексинин 153-статьясында “эки же андан көп аял алгандар эки жылга чейин эркинен ажыратылат” деген жобо бар. Бирок, сот өкүлдөрү бул статья менен практикада эч кимди эркинен ажыратып көрө электигин айтышат. Негизи, көп аял алуу маселеси учур-учуру менен актуалдуу маселеге айланып келет. Эми бул маселе кайрадан козголуп, коомчулуктун бүйүрүн кызытып, түрдүү талаш-тартыштарды жаратууда. Эгер эркектин мүмкүнчүлүгү болсо, анда шарият ага төрт аял алууга уруксат берет. Эми биз диний жана медициналык жактан «эмне үчүн төрт аял алса болот?» деген суроого жооп издегенге аракет кылсак.

1. Бардык эркектер сүйгөнү менен баш кошуп жатып: “Өмүрүбүздүн аягына чейин жакшылыкта да, жаманчылыкта да бирге болобуз” деп көпчүлүктүн көзүнчө бири-бирине убада беришет. Бирок, белгилүү убакыттан соң эгер жубайлар балалуу болбой калышса, (эгер аялы тукумсуз болсо) же жалаң кыз төрөлүп, уул болбой калса, анда эркектердин көпчүлүгү тез эле ажырашууга шашышат. Үйлөнүп жаткандагы сөзүн, убадасын унутуп, аялынын эртеңки тагдыры тууралуу терең ойлонбостон башка тарапка баса беришет. Кээси аялы менен ажырашкысы келбесе, аялынын макулдугу менен экинчи аялга үйлөнөт.
2. Мындан тышкары, эркектердин экинчи аялга үйлөнүүсүнүн дагы бир чоң себеби бар. Баарыбыз жакшы билгендей, аялзаты бир айда төрт күн же беш күн (аялзатына гана тиешелүү себеп менен) ооруп калышат. Бешти 12 айга көбөйтсөк 60 күн болот экен. Мындан тышкары, аялзатынын боюна бүтүп калганда жана андан кийинки учурду эске алсак, 4-5 ай күйөөсүнүн сексуалдык муктаждыгын канааттандыра албай калат. Мындай учурларда эркектер аялынан башкаларга барып күнөөгө батып, же сойкулардын кызматын көрөм деп жанагы бир балээни жуктуруп алышса, анда иштеринин бүткөнү ошол. Ушуга окшогон көрүнүштөрдү болтурбоо максатында эркектер экинчи аялга үйлөнүшөт.
3. Согуш мезгилинде эле эмес, азыркы учурда да кыз баланын саны эркектерге салыштырмалуу кыйла эле өсүп кеткендей. Дүйнөлүк статистиканын маалыматына таянсак, бир эркекке үч кыз туура келет экен. (АКШда эле айымдарга салыштырмалуу эркектердин саны 8 миллионго аз). Жарык дүйнөгө жаралган ар бир адамдын максаты үйбүлө куруп, бакубат турмушта өмүр сүрүү болуп саналат. Ким эле карыганда жалгыз бой калууну кааласын? Башкача айтканда, эркектердин аздыгынан кара далы болуп калган айымдар арыз-арманын кимге айтышат? Дал ушундай терс көрүнүштөрдөн коомубузду арылтуу максатында эркектер үчүнчү кадамга барышат.
4. Аялзаты 18 жаштан 35 жашка чейин эркектерге салыштырмалуу темпераменттүү келишет да, ал жаштан курагы өтө баштаганда сексуалдык мамилеге каалоолору сууй баштайт. Ал эми 60-65 жашка чейинки эркектердин каалоолору суумак тургай, суу чачса өчпөй жалындап күйгөндөрү бар. Ушул өңүттөн алсак, эркек үч аялынын макулдугу менен төртүнчү аялга үйлөнөт.

Эң негизгиси, көп аял алган эркектер физикалык жактан эле эмес, материалдык жактан да күчтүү болуп, жубайларынын баарына бирдей мамиле жана бирдей буюм, кийим сатып берүүсү зарыл. Эмесе, ортодо чыр чатактар чыгып кетиши ыктымал. Андыктан, ар бир аялынын өзүнчө жашаган үйү болуусу керек.
Шарият «сөзсүз түрдө көп аял аласыңар» деп эркектерди милдеттендирбестен, жөн гана ага уруксат берип койгон.
Биз болсо жогорудагы материал менен мекендештерибизди көп аял алууга үндөп чакыруудан алыспыз. Бир гана анын себептерин түшүндүрүп берүүгө умтулдук.