МУРАТБЕК БЕГАЛИЕВ МЕНЕН МАДАНИЯТ МИНИСТРИНИН ЧЫРЫ ЭМНЕДЕ?

Кыргыз улуттук консерваториясынын ректору, Кыргыз эл артисти, композитор Муратбек Бегалиев «Кыргыз Эл баатыры» наамына көрсөтүлбөй калды. Буга маданият ишмерлерин мамлекеттик сыйлыкка көрсөтүү боюнча 14-июлда өткөн коллегияда коллегия мүчөлөрүнөн жетиштүү добуш албай калганы себеп. Муратбек Бегалиев бул үчүн коллегиянын төрагасы, маданият, маалымат жана туризм министри Султан Жумагуловду айыптап чыкты. Бул боюнча ал оюн super.kg порталына билдирди.

– Мындан бир жарым ай мурда Султан Жумагулов «сизди коллегиянын мүчөлүгүнөн алып салдым, капа болбоңуз» деп телефон чалган. Бирок өкмөт «Бегалиевсиз коллегия өтмөк беле?» деп мени кайра кошуп коюптур. Андан кийин коллегиялар өтүп жатты, бирок мени чакырышкан жок. 13-июлда коллегиянын аксакал мүчөсү чалып «эртең сага наам берүү боюнча отурум болот, келип жакшынакай болуп отуруп бер» деди. Эртеси коллегияда министр Султан Жумагулов мага ар тараптуу кыр көрсөттү. Добуш берүү маселеси каралып жатканда «Кочкорлук белеңиз?» «Кара-Кулжалык эмессизби?» «сиз бул наамды алуу үчүн 5 жылдан кийин орден алышыңыз керек, андан кийин дагы бир орден алышыңыз керек» деп мага асылып, башкача мамиле жасады. Мындай мамилеге чыдабай, ал жерден чыгып кеттим. Султан Жумагулов төмөн баа бергенден кийин коллегиянын бардык мүчөлөрү колдобой коюшту.

Ал эми министр Султан Жумагулов:

– Муратбек Бегалиевди коллегиянын мүчөсүнөн мени алып салды деген кеп калп. Мен жаңыланган курамда композитор жок экенин көрүп, кайра коштургам. Бул үчүн андан кечирим сурап да чалгам. Окуя жарым жыл мурда болгон.

Ал эми композиторду наамга көрсөтүү боюнча жашыруун добуш берүү өткөн. «Кыргыз Эл баатыры» наамы тууралуу менин жеке пикирим бар. Мен өз оюмду добуш берүү учурунда айткам. Искусство, маданият адамдары атак-даңкка кызыгат эмеспи. Искусство адамдары бул наамды өтө сейрек алат экен, ошондуктан татыктуусун өткөрөлү дедим. Коллегиянын мүчөлөрү дагы өз пикирлерин билдирип, Муратбек Бегалиев жетиштүү добуш ала албай калды. Бегалиевдин «Жумагулов коллегия мүчөлөрүн кысымга алды» дегени туура эмес. Эмне, коллегияда отургандар көчөдөн келген кишилер бекен? Алардын дагы пикири болот. Муратбек Бегалиев экөөбүздүн ортобузда конфликт болгон эмес. Ал киши эмне десе дей берсин.

Аталган коллегиянын мүчөсү, Маданият, маалымат жана туризм министрлигинин алдындагы Маалымат жана массалык коммуникация департаментинин директору Бактыгүл Норузбаева ал күнкү коллегияны мындайча баяндап берди:

– Султан Жумагулов коллегиянын төрагасы катары өз пикирин айтты. Ал «Кыргыз Эл баатыры» аябай чоң даражадагы наам. Олуттуу карап, жакшылап ойлонуп добуш бергиле» деген. Бул сөз кысым эмес. Өтпөй калгандан кийин Бегалиев «министрлигиңизди кылдыңыз» деп айтып туруп кетейин дегенде, Жазуучулар союзунун төрагасы Акбар Рыскулов «Коюңуз, добуштар саналып бүтө элек. Күтүп туруп, кол коюп кетиңиз» деп суранды. Бегалиев бир аз отурду да, «кийин деле кол коё берем» деп чыгып кетти. Бул кылыгын биз да түшүнбөй калдык. Жерлик боюнча, ал сөз мага тамаша иретинде айтылган болчу. Бегалиевге тиешеси жок. Ал эми кайсы эмгектери үчүн наамга көрсөтүлүп жаткандыгы бизге тааныштырылбайт.

Белгилей кетсек, «Кыргыз Республикасынын Баатыры» Кыргыз Республикасынын эң жогорку артыкчылык даражасы жарандарга Кыргыз Республикасынын эркиндиги, көз карандысыздыгы жана гүлдөп-өркүндөшү үчүн жасалган баатырдык менен байланышкан, мамлекет жана коом алдында өзгөчө сиңирген эмгеги үчүн ыйгарылат.

Кыргыз Эл баатыры наамына Түгөлбай Сыдыкбеков, Чыңгыз Айтматов, Сабира Күмүшалиева, Асанкан Жумакматов, Сүйүнбай Эралиев, Төлөгөн Касымбеков жана башка коомдук, маданий ишмерлер ээ болушкан.

star@super.kg