Тынар Курбаналиев, куудул: “Үмүтай Абдышова мага ашык болсо, ойлонуп көрүш керек...”

Сахнада чукугандай сөз таап, элди күлдүргөндөн ырахат алган Тынар Курбаналиевге чыгармачыл чөйрөдөгү бир катар адамдар суроо узатышты. Куудул мырза алардын суроолоруна кандай жооп бергенин төмөндөн окуңуз.

ҮМҮТАЙ АБДЫШОВА, ырчы:
– Сизди бир нече жолу үй-бүлө курган дешет. Ошондой болсо да тымызын башка селкиге ашык экениңизди уккан элем. Эгер ошол селки макулдугун берсе, ага дагы үйлөнөт белеңиз? Же буга окшогон “кезектеги сүйүүлөр” концерт же гастроль сайын алмашып турабы? Деги эле сезимиңиз туруктуубу же туруктуу эмеспи?

– Бир нече жолу эмес, бир эле жолу үйлөнгөм. Ал эми бирөөгө ашык экенимди келинчегим жакшы билет, ошол макулдугун берип, ошол адамдын күйөөсү болуп иштеп жатам. Менин сезимимди башкалар кандай айтышат билбейм, бирок өзүм туруктуу деп эле айтам. Гастролдо же болбосо талаада сүйүүм алмашпайт. Бирок Үмүтай өзү ашык болгон болсо, анда ойлонуп көрмөкмүн...

ДОБР, рэп ырчысы:
–Бир ирет мен телеканалдардын бирине эфирге барып калып, менден кийинки эфирге келчү конокторго тапшырма бер дегенде “эфирден соң полду жууп кетсин” дегем. Менден кийин Тынар байке барган эле. Тынар байкеге суроом – түз эфир убагында студиянын полун жууп көрдүңүз беле?

– Болгон. Бир жолу телеканалдардын бирине эфирге барып калып оюндун шарты ушундай беле же көрүүчүлөр суранды беле, айтор, эфирден пол жуугам.

ТАЛАНТ КАДЫРОВ, ырчы:
– Тынар байке, “мен ырчы болгудай анчалык деле жинди эмесмин, акыл-эсим жайында” деп сахнадан тамашалап калат. Өзү жакында ырдайм деп жүрөт. Эми менин суроом мындай. Ошондо сиз жинди болуп калдыңызбы же кандай болуп калдыңыз? Ырчы болуңуз же куудул болуңуз. Эгер ырчы болсоңуз анда ырчыларга тийишпей жүрүңүз.

– Ооба, сахнада ошентип тамашалап калам. Негизи колунан келген адам ырдаса жакшы болмок. Ар бир адам колунан келген ишти кылса жакшы да. Ал эми мен жакында ырдайын деп жаткан ыр жөн гана менин 40 жашыма арналып жазылган чыгарма. Ошол ырды жаздырып туугандардын, жоро-жолдоштордун арасында, отуруштарда гана ырдап коёюн дегем. Ошонун артынан эле ырчы болуп, клип тарттырып жиберейин деген оюм жок. Талант коркпой эле койсун эми. Мен ал ыр менен эле ырчы болуп кетсем Талант өчүп калбайт го.

РОЗА ШАКИРОВА, ырчы:
– Автомат машинаны бүт баары бир буту менен эле айдашат го. Тормозду, газды басыпчы. А мен 2 бутум менен айдайм, сол бутум менен тормозду басам, оң бутум менен газды басам. Эмне үчүн?

– Розанын суроосу таң калыштуу экен го (күлүп). Негизи Розанын унаа айдоо жөндөмдүүлүгүнө жараша да. Бирок автомат унааларды бир бут менен эле айдайт, эки бут менен айдаганды Розадан эле угуп жатам.

ЭРНЕСТ БӨРҮБАЕВ, тамада:
– Тынар, эгерде мен жок жерде сенин көзүңчө мени бирөө жамандаса эмне кылмаксың?

– Сенин жакшы сапаттарыңды айтып коргомокмун, себеби сенин кандай адам экениңди мен жакшы билем.


АСКАТ СУЛАЙМАНОВ, актёр:
– Тынар менден 3-4 жыл мурун фуфайка алды эле, ошол бойдон бере элек. Фуфайканы качан алып келип бересиң?
– Интермедияга керек болуп Аскаттан фуфайка алгам. Кийин гастролдо колдонуп, ортодо балдар да кийип, айтор, ал фуфайка жоголуп кетти. Анан Аскат жайында чалып алып "Досум баягы фуфайка эмне болду?" деп сурап жатпайбы. "И-ий, элдин баары футболка-шортачан жүрсө, сен фуфайка кийип каякка барасың?" деп тамашаласам каткырып күлгөн. Ошонун фуфайкасын берип коюшум керек, карызмын. Качан Аскат куудул болуп интермедия ойногонго керек болгондо алып барып берем.

АМИР АСКАРОВ, ырчы:

– Өзүңүздү Амир Аскаровго окшош “красавчик” эсептейсизби?
– Амир Аскаровду мага окшош “красавчик” деп эсептейм.



НУРБОЛОТ ТЕҢИЗБЕК, ырчы:
– Ааламда жалгыз эркек болуп калсаңыз эмне кылат элеңиз? Кыздарга кантип түтөт элеңиз?
– Эми андай болушу мүмкүн эмес го, бирок ошондой болуп кала турган болсо жолукса билет эле да эмне болорун (күлүп). Сен алгач мага ошондой шарт түзүп берчи, анан көрөсүң.

Асхат Субанбеков
star@super.kg