БИР БҮРКҮМ. АИДА САЛЯНОВА КАМАКТА КАЛДЫ...

Өкмөттүн Чүй облусундагы ыйгарым укуктуу өкүлү болуп Алтынбек Намазалиев дайындалды. Буга чейин ал Аламүдүн районунун акими болчу.
Кыргыз Республикасынын Беларустагы элчиси кызматына Эрмек Ибраимов дайындалды.
Талас облусундагы Кыргыз-Казак чек арасынан 80 тонна күйүүчү майды мыйзамсыз алып кирүүгө шектүү жарандар кармалды. Бул тууралуу Мамлекеттик чек ара кызматы билдирди.
Быйыл жалпы республикалык тестирлөөнүн жыйынтыгы менен жогорку окуу жайга кирүүдөгү босоголук чек 110 балл болот. Бул тууралуу Билим берүү жана илим министрлиги билдирди.
"Манас" аэропортунун директору болуп Мурат Примбердиев дайындалды. Буга чейин ал директордун орун басары кызматын ээлеп келген.
Чуулгандуу «КТ Мобайл» компаниясынын жаңы директору болуп Мураталы Жакыпов дайындалды.
12-июнда Бишкек шаардык соту мурунку башкы прокурор Аида Салянованы №1 тергөө абагында калтырды. Сот Биринчи Май райондук сотунун Салянованы 26-июнга чейин абакта кармоо чечимин күчүндө калтырды.
12-июнда Кыргыз өлкөсүнө Монголиянын президенти Халтмаагийн Баттулга расмий иш сапары менен келди.
Орусия Евразия Экономикалык Биримдигине кирген өлкөлөрдүн эмгек мигранттарына пенсия төлөмөй болду. ЕАЭБге Кыргыз Республикасы, Армения, Орусия, Казакстан жана Беларусь мүчө.
Баткен облусунун Самаркандек айылында каналдагы сууга түшүп кетип 3 жашар кыз каза болду. Бул тууралуу облустук милициянын басма сөз кызматы билдирди.
Кыргызстанда никелер эми атайын журналга катталат. Бул тууралуу Кыргыз Республикасынын мусулмандар дин башкармалыгынын муфтийи Максатбек ажы Токтомушев билдирди.

Кубан Жумамидинов
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 867, 13-июнь - 19-июнь, 2019-жыл