ОЛЬГА БУЗОВА БИШКЕКТИ ДҮРБӨЛӨҢГӨ САЛДЫ
Инстаграмдын жылдызы, клиптери интернетке жүктөлөрү менен 10, 20, 40 миллиондоп көрүлгөн ырчы, телеалпаруучу, Орусиянын атактуу “блондинкаларынын” бири Ольга Бузова биринчи жолу Бишкекке келип, лаунж-барда концерт берип кетти. Ошол концертке биз да күбө болдук. Көргөн-билгендерибизди сизге да баяндап берели.
КҮТТҮРҮП КҮЙӨРМАНДАРДЫН ЧЫДАМЫН КЕТИРДИ
Ольга Бузова. Бул ат көпчүлүктүн кыжырын кайнатат да, кайра ошончо адамдын кызыгуусун жаратат. Кыжырыңыз келеби же суктанасызбы, айтор, сиз бул адамды тааныйсыз. Жок эле дегенде бир жерден атын угуп калгансыз. Уга элек болсоңуз, анда акыркы жумада сөз жок бул ысымды кулагыңыз чалып, аны Google’дан издеп же Инстаграмдан сүрөттөрүн барактап чыктыңыз. Кыскасы, Орусиянын «блондинкаларынын» сап башында турган бул айым кандай болсо да өзүн массага таанытканды жакшы билет. Бузованын ар бир кадамына Инстаграм баракчасында 16 миллиондон ашык катталуучу баам салат. ТНТ телеканалындагы «Дом 2» берүүсүнөн улам таанылган алып баруучу, акыркы кездерде өзүн ырчы катары таанытып жүргөн Бузова биринчи жолу Бишкекке келди да, аны дүрбөлөңгө салып кетти.
Алгач, Бузова Бишкекке келет деген жарнамалар интернет бетин каптады. Ал келген 19-июль күнү, ал кеткенден кийинки бир канча күн эл чогулган жерде Бузова талкуудан түшпөдү. 19-июлдун таңында «Манас» аэропортуна түшкөн ырчы мейманканага келе жатып жолдон Кыргызстандын жаратылышынын сулуулугуна суктанды. Ал таң атып келаткандагы көз ирмемдерди кармап калып, сүрөткө түшүп, Инстаграмдагы баракчасына жүктөдү. Постто «Кутман таң, Бишкек! Саат таңкы жети болгону калды. Мейманканага бараткан жолдо мен укмуштуудай таңдын атышына күбө болдум. Айланада тоолор, таза аба, кандай гана жаратылышыңар бар!» деп жазды.
Кызыктым. Бузованын өзүнө, анын концертинин жүрүшүнө, көпчүлүктүн кыжырына тийгенди жакшы өздөштүрүп алган жаш ырчынын концертине барчу адамдарга кызыктым. Бул күнү ырчы Бишкектеги "Oblako53" аталышындагы лаунж-бардын ачылышына конок катары чакырылган. Ачылыш аземге кирүү акысы 1500 сом болду. Баннерлерде Бузова катышкан иш-чара кечки саат 20:00дө башталат деп жазылып турган. Башкалар да мен сыяктуу эле ырчы саат 20:00дө чыга калып ырдай калат деп ойлосо керек. Жок, ал күйөрмандарын көпкө күттүрдү. Көптөр "таланты жок" деп сындаган ырчынын күйөрмандарын мен ушул жерден көрдүм. Таң калдым. Көп концерттерге барбай, билбей калышым мүмкүн. Бирок мен ырчыга берилип, ушунчалык сүйүүсүн арнаган, сахнага жулунуп кол сунуп, аны чыдамсыздык менен күтүп, көрүүгө ашыккан күйөрмандарды кыргыз ырчылары Султан Садыралиев, Мирбек Иманбеков, Темир Назаровдор жылдыз болуп турган кезде кезиктиргем. Андан бери мынчалык фанаттарга кезиге элек болчумун. Анын үстүнө ар кандай шоу программаларда шылдыңга айланган Бузованы көрүүгө ашыккандар аз болсо керек деп ойлогом. Жаңылыптырмын. Кызыгы, атактуу «блондинканын» Бишкектеги күйөрмандарынын дээрлик көпчүлүгү айымдар экен. Бузова сахнага чыкканча чыдамы кетип, улам анын чыгышын алып баруучудан суранып жаткан кыздар. Мырзалардын көпчүлүгү жанындагы кыздардын көңүлү үчүн эле келгендей. А балким, так ошол жанындагы кыздар үчүн атайылап кайдыгер көрүнүштү...
АР БИР ЫРЫН ЖАТКА БИЛГЕН, КЫЙКЫРЫП-ӨКҮРҮП КОЛДОГОН ФАНАТТАР
Күттүк. Бузованын сахнага чыгышын саат 23:30дарга чейин күттүк. Албетте, бул дагы ырчыга көбүрөөк кызыгуу жаратуунун ыкмасы. Анткени анын сахнага чыгуусу канчалык кечиккен сайын күйөрмандар ошончолук көрүүгө зар болуп, кызыгуулары арта баштады. Мына, ал чыкты. Кыйкырык-өкүрүктөн кулагым тунуп калды. Күзөтчүлөрдүн кыздарды сахнадан алыс кармоого күчү жетпей калды. Бири-бирин түртүшүп, бири-биринин буттарын тебелеп, сахнага үйүлүп, Бузованы сүрөт, видеого тартып жаткан кыздардын ырчынын ар бир ырын баштан-аяк кошулуп ырдап, ар бир ырдын аягында токтобой кыйкырып колдогондорун көрсөңүз... Концерттен кийин бир кыздын
«кыйкырып отуруп тамагым ооруп калыптыр» деген постуна көзүм түштү.
Мындай колдоону көргөн ырчы да сахнада өзүн 100 пайыз ишенимдүү алып жүрдү. Даярдыгына сын айта албайм. Бизде айрым учурда ырчылар көчөдөн өтүп баратып эле Спорт сарайына кайрылып, концерт берип койгондой сезим калтырышат. Бузованын эки бийчиси менен синхрондуу бийлегени, тердеп-кургап ырдаганы анын көрүүчүлөрүн, күйөрмандарын сыйлай турганынан кабар берди. Сахнада өзүн эркин алып жүрүп, угармандарынын сүйүүсүнө ал да кайра жылуу сөздөр менен жооп берип жатканы жагымдуу болду. "Үнү жакшы, таланттуу ырчы" деп кесипкөйлүк жагынан бул ырчыга баа бергендерди кезиктире элекмин. Бирок анын аракети ушундай күйөрмандары менен бааланып жаткан өңдүү. Бир саат сахнада күйөрмандары менен чогуу «Водица», «Мало половин», «Wi Fi», «Танцуй под Бузову», «Привыкаю» жана башка ырларын ырдады. Чындыгында, Бузованын мынчалык көп ыры бар экени мага жаңылык болду.
Концерт аяктады. Бузова Бишкекке кийин да жеке концерт менен келерин убадалады. Уюштуруучулар сахнадан ырчыга белектерди берип, үстүнө кыргыз кемселин жабышты.
Ырчы кийин Инстаграм баракчасына Айзада аттуу кыздан келген открытканын сүрөтүн бөлүштү. Ал кыз ырчыга көйнөк тигип белекке бериптир. Бузованы көргөнүнө бактылуу болгон кыздардын постторун окудум. Пай-пай..
«ЧАПАН МЕНЕН КАЛПАК БУЗОВАГА ЭМЕС, ПРОДЮСЕРИНЕ БЕРИЛГЕН»
Концерттен кийин Ольга Бузова кыргыз чапанын, ак калпагын кийип, колуна камчы кармап алып, бийлеп, ырдаган видеосун Инстаграм баракчасына киргизди. Анын Бишкекке келүүсүнүн өзү бишкектиктерди дүрбөлөңгө салса, бул посту эки эсе чуу жаратты. Эл улуттук кийимибиздин баркы кетип бараткандыгын айтып коңгуроо кагышты. «Кыргыз качан эле кыз балага калпак, чапан кийгизчү эле? Ошончолук белек бергиңер келсе, көйнөк кийгизип, жоолук салуу туура болмок» деген пикирлер арбын айтылып, жазылды. Буга чейин UFC чемпиону Валентина Шевченко Кыргызстанга келгенде ага да чапан, ак калпак кийгизилген болчу. Ал кезде да бул көрүнүш коомчулуктун сынында калган. Ооба, балким, спорттун катаал түрү менен машыгып, мырзалар менен тең тайлаша аралаш согуш өнөрлөрүн өздөштүрүп, чемпион аталып өлкөнү тааныткан сыймыгыбыз Шевченконун үстүнө чапан жабылып, башына ак калпактын кийгизилишин туура эле чечим катары кабыл ала алмакпыз. Бирок Бузовага чапан, калпактын кийгизилиши, камчынын берилиши эң эле түшүнүксүз жагдай. Уюштуруучулар чапан менен калпак ырчыга эмес, анын продюсери Арам Арчерге белек катары берилгенин айтып түшүндүрүштү.
Иш-чарадан кийин эле Ольга Бузова Орусияга, Санкт-Петербург шаарында өтчү концертке учуп кетти. Анын Бишкектин мейманканасынан башка жерлерин көрүүгө убактысы болгон жок.
Перизат Музуратбекова
star@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (3)
Бузованы эл сындап жаман коргону менен ошончо кайра куйорманы бар,Бузованы Колго,Чункурчака алып барганда кыргызстанды канча адам коруп кызыкмак.
Блондинка эмес брюнетка го бул шмара
Журналист Перизат башында жазгандарын жакпады эркекче сын пикирди туура кабыл алып,озун окуп корчу
