СУПЕР-ИНФО
- Саясат
- Шоу дүйнө
- К-рор дүйнөсү жана корей тасмалары
- Маданият
- Иликтөө
- Турмуш
- Крим-инфо
- Спорт
- Жан дүйнө
- Түркүн дүйнө
- Алтын балалык
- Укуктук кеӊеш
- Илим жана техника
- Ден соолук жана сулуулук
- Психология жана үй-бүлө
- Тиричилик, бизнес
- Ашкана сырлары
- Жылдыз төлгө
- Маалымдама
- Супер-Инфо 20 жашта
- Көз караш
- Эмгек жарчысы
Кыргыз-Совет кинорежиссёру, Кыргыз ССРинин жана СССРдин Эл артисти, СССРдин Мамлекеттик сыйлыгынын лауреаты, Кыргыз Республикасынын Эл артисти Болот Шамшиев катуу оорудан улам 78 жаш курагында дүйнө салды. Кыргыз киносуна айтып бүткүс салым кошкон, «Кыргыз кереметин» жаратуучуларынын бири, атактуу режиссёр Болот Шамшиевди акыркы сапарга узатуу зыйнаты 24-декабрь күнү Бишкекте Абдылас Малдыбаев атындагы Опера жана балет театрында өттү. Бүтүндөй кыргыз журтунун көөдөнү бөксөрдү, дагы бир легендасынан айрылды.
– Кыргыздын бир чыгааны Болот Шамшиевди акыркы сапарга узатуу зыйнатында турабыз. Болот абдан акылдуу, интеллекти бийик, ойчул адам эле. Азыркыга чейин анын тарткан тасмаларынан деңгээли бийик тасма тартыла элек. «Кыргыз кино кереметтерин» жараткан авторлор экөө болсо, анын бири Болот болчу. Менин бир гана арманым – артында окуткан окуучулары калбады. Анын акыркы жылдары тасма тартпай калгандыгы жөнүндө али көп арман, көп сөз болот го. Мындай чоң талант кылымда бир жаралат.
– Кино дүйнөсүнүн эшигин ачып берген эки инсандын бири Чыңгыз Төрөкулович болсо, бири Болот байке эле. 1970-жылдардан бери жанында жүрдүм. Мага атамдай эле болуп калган. Өмүрүнүн акыркы 29 жылында тасма тарткан жок. Бул өкмөт улуу инсандын талантын толук колдонуп кала алган жок дегенди билдирет. Бирок эми баары кеч болуп калгандан кийин айта берүүнүн кажети жок го деп ойлойм. Акыркы күндөрү китеп жазып жаткан эле, 4 даяр сценарийи бар болчу. Айланып келип эле каражат маселесине такалып токтоп калып жаткан. 
– Болот Шамшиевдин режиссёрлугу алдында тартылган канча тасма болсо, ар бири чоң ачылыш болчу. Болгону 25 жашында «Караш ашуусундагы атышууну» тарткан. Мындай кино эми жаралбайт. «Ак кеме» тасмасын алалы. Элдин баары аны «Чыңгыз Айтматовдун деңгээлине жете алган бирден-бир тасма» деп айтышат. Айтматов кандай ойлонуп жазса, ошол ойду Болот Төлөнович Шамшиев так өзүндөй тасмага түшүргөн. Анын кыргыз киносуна кошкон салымы тоодой.
– Негизи жашоонун өзүнүн агымы, өзүнүн багыты болот экен. «Булбул учса тал калат, бул дүйнөдө ким калат? Өрдөк учса көл калат, өлбөй тирүү ким калат?» дейт. Адам өмүрү өткөн соң бул дүйнөдө «элине эмне калтырды?» деген ой жаралат. Артында кино искусство тармагында ошондой тарых жарата алган, маданиятта из калтырган адамдардын бири менен бүгүн коштошуп турабыз. Аттиң, Болот Шамшиевдин акыркы жылдарын максаттуу пайдалана албай калдык дейт элем. Бийик-бийик ой-максаттары бар эле, жашоо ушундай экен. Кыргыз эли учукту улаган таланттардан кур эмес деп жакшыдан үмүт үзбөйбүз. Ал эми Болот аганын жаткан жери жайлуу болсун!
– Улуу режиссёр Болот Шамшиев менен жакындан тааныш болбосом дагы, анын бийик дүйнө таанымы менен сырттан тааныш элем. Кечээ Маданият министрлигинен чалып “Болот Шамшиевдин “акыркы сапарга узатуу зыйнатымда манас айтылсын” деген керээзи бар экен. Манас айтсаңыз туура эле болобу? Болсо келип манас айтып берсеңиз” деп сурап калышты. Илгертен кыргызда мындай нерсе бар экендигин айтып, дароо макул болдум. Каза болгон адамдын сөөгү үч күн үйдө түнөтүлгөн, ошол убакта жаны тиги дүйнөгө коркпой, Манас атанын деми менен аралашып алсын деп манас айтышкан. Буга чейин да Чыңгыз Айтматовдун, Турсун Уралиевдин, Тууганбай Абдиевдин акыркы сапарга узатуу зыйнатында манас жаңырып турган эле.