СЫН АЙТКАНДАН СЫЙ КЕТПЕС
Жылдыздар турмушунан
Кыргыз элинде "дос күйдүрүп айтат, кас сүйдүрүп айтат" деген макал бекеринен айтылбаса керек. Досуна, жакынына сын айтууну анын жаман адаттардан арылуусуна жол көрсөтүү, кеңеш берүү деп түшүнсөк болот.
Кыргыз шоу дүйнөсүнүн өкүлдөрү бири-бирин кантип сындаганына көз жүгүртөлү.
Канат Кадыржан: "ИСЛАМ ЧОЮЛУП СҮЙЛӨЙТ"
– Ар бир адамдын кемчилиги болбой койбойт. Кесиптешим Исламды (Сатаров) “сын тегирмениме” салсам, биринчиден, анын чоюлуп шашпай сүйлөгөнүн жактырбайм. Экинчиден, бир нерсени макулдашып жакшы эле баш ийкешип кетет да, эртеси унутуп калмайы бар.
Мүнөзүнөн сырткары келбетине да сын айта кеткеним туура эле болсо керек. Мага Исламдын узун чачы жакпайт. Кыскартып алса, менимче, ага жарашмак. Жаш жигит болгондон кийин салмагына да көңүл буруп, бир аз арыктаса. Унутуп бараткан турбаймынбы, жанагы колунан түшүрбөй көтөрүп жүргөн тоголок сумкасын алмаштырып алса дээр элем. 
Ислам Сатаров: "КАТУУРААК БОЛСО..."
– Канаттын (Кадыржан) көп нерсени ичине катып сырдуу жүргөнүн көп жактыра бербейм. Мисалы, бир нерсе сурасаң, “жок” же “бар” деп кыскача эле жооп берип коёт. Жаман көрүп жатканын же жакшы көрүп жатканын түшүнө албай кыйнала берем. Сүйлөсөмбү, сүйлөбөсөмбү деп маалкаткандай көрүнөт. Өзүнчө мамлекет болуп ойлонуп жүрө бергени одоно көрүнөт. Радиодон сүйлөгөнүн угуп, сөзмөр, шайыр жигит экен деп ойлойсуң. Бирок сүйлөшө келсең, таптакыр башка адам болуп чыга келет. Мүнөзү өтө эле жумшак. Дайырга (Исмадияров) “минт, тигинт” деп продюсерлик кылбай, тескерисинче, ал Канатка үйрөтүп жаткандай сезиле берет. Ошол себептен кичине катуураак бол деп кеңеш берер элем.
Чыңгыз Мырзаев: "НУРЗАДАНЫН СУМКАСЫ – "НАРОДНЫЙ" ДҮКӨНҮ"
– Кесиптешим Нурзада Жолдошова, негизи, абдан жакшы кыз. Бирок анын элде жок эки кыялы мага жакпайт. Кандай кыялы дейсизби? Нурзада бир окуяны берилип узакка чейин айтып берет да, бүткөндөн кийин “кандай дейсиз?” деп сурайт. Ошондо “ак” же “көк” дей албай эле отуруп калам. Кээде “Нурзада мени менен чогуу иштеп калганы үчүн ага эстелик тургузуш керек” деп тамаша-чынга аралаштырып айтып калам.
Анын көтөрүп жүргөн сумкасын “Народный” дүкөнү деп койсок да болот. Баарын салып алат. Курсагы ачканда сумкасынан бирден сууруп алып, кытыратып жей баштайт. 
Нурзада Жолдошова: "ЧЫҢГЫЗ – "КӨЗ БООЧУ"
– Чыке – чыныгы кыргыз да. Эфирге жок дегенде 15 мүнөт кечигип келет. Бир жолу мен сынак тапшырып, ага ишенип жумушка кечигип келдим. Келсем, ал да жумушка келе элек экен. Ошондо жинимдин келгенин айтпай эле коёюн. Жумушка кечиккени аз келгенсип, уюлдук телефондун жаагын айрый сүйлөшө бергени жакпайт. Баса, баарынан да айтпай эле дайынсыз жоголуп кетмей "көз боочулук" адаты бар.
Зарина Хасанова:"АЛЕКСЕЙ АШЫКЧА КӨП СҮЙЛӨЙТ"
– Мурда Лёша (Филатов) стилдүү, ачык түстөгү кийимдерди кийчү. Азыр классикалык стилге өтүп албадыбы. Классикалык стиль ага көп жараша бербейт. Баса, анын көп сүйлөгөнү жинимди кашайтат. Айрыкча бир нерсени айта баштаганыңда оюңду бөлүп, сөз талаша бергени төбө чачымды тик тургузат. Алексей “көп сөз – бок сөз” деген макалды билип алса жакшы болмок. 
Алексей Филатов: "ЗАРИНАНЫН ЧАЧЫ ТАЖАТТЫ"
– Мага Зарина Хасанованын көп жылдан бери бир эле чач жасалгасы менен келатканы жакпайт. Бул мени гана эмес, элди деле тажатса керек. Чачы коюу, өзү болсо жаш. Ошого жараша чач жасалгасын ай сайын болбосо да жылына бир жолу өзгөртүп турса, эң сонун болмок.
Анын дагы бир кыжырга тийген нерсеси – иши чыгып калган адамдын жанын сыгып алганга чейин алпарганы. Көгөрүп жатып эле өзүнүн максатына жетет. Мындай мүнөз кыздарга көп жараша бербейт.
Сема: "ДОБРДУН МУЗЫКАЛЫК БИЛИМИ ЖОК"
– Мен рэпер Добрду сындап көрөйүн. Ашыкча "туздап" жиберсем, ал таарынбаса керек. Сынды уга билген кишиге айтуу керек. Добрдун музыкалык билими жок. Кээде ырларын угуп отуруп, үнүнүн тембри жетпей калган жерлерин көп байкайм.
Экинчиден, кийинүү стили жакпайт. Нукура кыргыз баламын деп эле, чөп чапканы чыккансып калпакты баса кийип жүрө берген болбойт да. Мисалы, чет элдик репэрлер ырдаган ырынын маанисине карата кийинишет. Ошондуктан Добрга музыкалык билимге ээ болуп, анан жакшы стилисттерге кайрылуусуна кеңеш берип кетер элем. 
Добр: "СЕМА АЛГАНЫН КАЙТАРБАЙТ"
– Сема байкенин бийлегени өзүнө таптакыр жарашпайт. Айтылган тамашаларды өзүнө кабыл алып, таарынып калмайы бар. Акыркы учурда жалкоолуктун сазына малынып алды окшойт. “90-60-90” деген ырынан кийин бир да хит ыр жарата элек.
Ии, баса, Сема байкенин алган нерсесин убагында кайтарбаган жаман адаты бар. Баягы “Супер-Инфо” гезитинин кубогу үчүн өткөрүлгөн футболдук таймашта тизеге таккан “щиткимди” алган болчу. Ошону азыркыга чейин кайтарып бере элек.
Бахияна Сатылганова
forum@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (5)
ii SEma ozundu karap al4y! Ozundun vkusu Perfek bolgonsup bashkany aityp koiboi!
anan dagy ununun tembri jetpey kalat deyt.ozu4u?Mirbek uyuwturgan rozygriwta janduu yrdoodon korkup kele albaym degen go ozu tuz efirde!
Нурзада кечигип келуу ж.б. ушуга окшогон жаман сапаттар болсо эмне Кыргызчылык болуп калат бекен.Бул сапат баардык эле улутта бар да.Жаман сапаттардын баарына эле "КЫРГЫЗЧЫЛЫК" деш акылсыздык ко.
Negizi Kirgizdar erte ele keliwet birok kirgiz kanina bawkalar aralawip kalsa ke4igip kele bawtayt. Men ke4ikkendi jaman korom owonu u4un erte kelem(4inigi Kirgizmin da :)). A kizdardin ke4igiwin al atayin ele dep bilem jigitterdi kutturgondu jakwi koruwot.(Baari emes kobu)
Сема,алган буйумду кайтарып берет да.Бул эн жаман адат. Жоопкерсиздик
