КҮЧТҮҮ АНТИБИОТИК БАКАДАН ЖАСАЛАБЫ?

Кызык экен

Химиктер тарабынан күчтүү антибиотиктер баканын терисинен алынды. Андай антибиотиктердин бири стафилококк оорусун козгоочу бактерияларды өлтүрөт.
Кийинки кезде бактериялардын антибиотиктерди анча тоотпой калышы дүйнөдөгү ири маселеге айланууда. Андыктан оорулуулар таасири жок болуп калган антибиотиктердин ордуна жаңысын колдонууга муктаж. Андай антибиотиктердин булагы баканын териси болуп калышы мүмкүн. Мындай антибиотиктер башкаларга караганда анчалык уулуу эмес жана бактериялар менен жакшы күрөшөт.
Американын Калифорния жана Орегон штаттарында кезигип, азыр жок болуу алдында турган кызыл бут бакалардын териси өзгөчө бааланууда. Анткени анын териси стафилококк оорусунун бир түрүн (кан оорусун жана пневмонияны козгоочу) дарылап айыктырууда натыйжалуу каражат болуп табылган.

УЛУТТУК ООРУЛАРДЫН ӨЗГӨЧӨЛҮГҮ

Чектелген гана улуттарга таандык оору түрлөрү болот. Ал эми кээ бир жерлерде улутуна эмес, жайгашкан жерине жараша оору түрлөрү кездешет. Кыскасы, оорулар элдин тамак-ашына, жайгашкан жеринин климатына, суусу менен топурагынын курамына жараша болот.
Жер Ортолук деңизинин калтыратма оорусу. Бул оору менен армяндар, арабдар, еврейлер оорушат. Оорунун себепкери белок-амилоид. Ал ички органдарда топтолуп (көбүнчө бөйрөктө), ооруга чалдыктырат. Оорунун белгилери аппендицит, холецистит, ашказан оорусунун белгилерине окшош болгондуктан, так диагноз коюу кыйынга турат.
Талассемия. Бул тукум куучулук анемия. Ооруга гемоглобиндин синтезделишине жооп берүүчү гендин аномалиясы күнөөлүү. Азербайжан, Грузия, Армения, Өзбекстан элинин басымдуу бөлүгү ооруйт. Оору эрте жаштан башталып, оор өтөт. Андыктан аталган оорудан жапа чеккендердин арасында узак жашагандары сейрек учурайт.
Депрессия, ичимдикке жакындык...
Климатка байланыштуу (күн нурунун аздыгынан)Түндүк элине депрессия, ушундан улам ичимдикке жакындык, өзүн-өзү өлтүрүүчүлүк таандык.
Түштүк элинде (күн ысыктан улам)жугуштуу оорулар, мите курттар оорусу көп учурайт.
Туз аз жерде кан басым оорусу жок...
Жаңы Гвинеяда, Пил сөөктөрү аралында аш тузу тартыш болгондуктан, кан басым оорулары дээрлик кездешпейт.
Рак оорусунун мекени...
Тери рагынын ордосу – Австралия. Орусияда, Түндүк Кавказда, Орто Азияда эмчектин рагынан жабыр тарткандар көп. Ашказан оорусунун рагы ачууну көп колдонгон Кавказ менен Орто Азияда басымдуулук кылат.

Канымжан Усупбекова
kenesh@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 412, 24-30-сентябрь, 2010-ж.