КӨК КАРГА – КООЗ КАНАТТУУ

Чоңдугу чөкө таандай болгон көк карга өлкөдөгү кооз канаттуулардын катарына кирет. Денесинин узундугу 27-30, канаттарынын узундугу 17-20 сантиметрге чейин жетет. Салмагы 180-200 граммды түзөт. Ургаачысы менен эркеги сыртынан айырмаланбайт.

Адатта тоо жана токой этектерин, кыркылган токойлорду, дарыя менен көлдөрдүн жарлуу жээктерин, дарыялуу өрөөндөрдү, эски сейил бактарды байырлайт. 200 метр бийиктиктен ары көп уча беришпейт.

Апрелдин аягында, майдын ортолорунда жылуу жактардан учуп келишет. Августтун аягы, сентябрдын баш чендеринде кыштоо үчүн Африканын түштүк аймактарына учуп кете башташат. Айрым маалыматтарда Түштүк Азия өлкөлөрүнө да кыштоого кетет деп айтылат.

Дарактардын коңулдарын, бош калган ийиндерди уя кылып алышат. Жар боорлорун тешкилеп уя салгандары, тоңкулдактын ташталган уясын ээлеп алгандары да бар. Уясынын түбүнө эч нерсе төшөшпөйт. Кургак чөп, жалбырактарды төшөп койгондору аз санда. 3-6 жумуртка тууп, 18-19 күндө басып чыгарат. Балапандары ата-энесинин жанында бир айдай болуп, анан уяларын таштап учуп кетишет. Болжол менен 8-10 жыл жашашат.

Курт-кумурскалар, атап айтсак, коңуз, чегиртке, аары, кумурска, чымын, көпөлөк, өсүмдүктөрдүн данын, уругун, мөмө-жемиштерди жейт. Кээде кичинекей кескелдирик, жыландын балдарын, бака,чычканды да азык катары колдонушат.

Канымжан Усупбекова

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 958, 15-21-апрель, 2021-ж.