КЫЗМАТЫМ – АЯЛДАРДЫН КӨКСӨӨСҮН КАНДЫРУУ»

Шум заман

"Чымыр денелүү эркек аялдарга өз кызматын сунуштайт. Сиздин интимдик жашооңузга өзгөчөлүк киргизип, каалаган эротикалык фантазияңызды ишке ашыра алам". Мындай жарнамаларды азыр гезит беттеринен, интернет булактарынан да кездештиресиң. Бүгүнкү менин маектешим – дал ошондой жарнама ээлеринин бири. Бирок аны интервью берүүгө макулдатуу оңой болгон жок. Узакка жана көшөрө сурануулардан кийин гана 32 жаштагы Тима (лакап аты) маектешүүгө ынанды.

– Мындай кызматта канча жашка чейинкилер иштешет?
– Бизде 25-32 жаштын тегерегиндегилер иштешет. Үй-бүлөсү барлардан экөөбүз, калгандары бойдоктор. Төшөккө өздөрү чакырган аялдардын кынуусун алып калган бойдоктордун кээси үйлөнгүсү келбей калат.
– Сыр болбосо айтсаң, бул ишке кантип келип калгансың?
– Жыргаганымдан келди дейсиңби?! Үйдө 4 бир тууган элек. Анан апам каза болуп калды. Балдардын улуусу катары мектепти бүткөндөн кийин атама жардамдашканы алгач базарда жүк түшүрүп иштедим. Бирок андан кыйналып, жүдөп кеттим. Атам да "кийин бел оорулуу болуп калба" деп наабайканага орноштуруп койду. Анда деле тапканым жарытылуу болгон жок. Ошондой күндөрдүн биринде бирөөлөр аркылуу биздин шеф менен тааныштым. Шеф менин сырткы келбетимди карап көрүп, ичкиликке жана тамекиге жок экенимди уккан соң ушундай ишти сунуш кылды. Көрсө, тамеки чегип, ичкилик ичкендердин организми анчалык кубаттуу болбойт экен. А бизге аялга "отказ" бербей, кычуулары канганча, "грубо" айтканда, көчүгү кургагыча кызмат көрсөтүүгө туура келет.
Ошентип, сойкулукту сунуштаганда алгач жаман болдум. Анан "барса барып көрөйүн. Анын үстүнө сен аялга эмес, ал сага төлөп жатса" деп кызыктым. Бирок дароо эле ишке киришип кеткен жокмун. Алгач мени үйрөтүштү. Секс ыкмаларын, өзүңдү маданияттуу алып жүрүүнү, аялга жагынып, дүүлүктүрүүнү, төшөк сөздөрүн арноону, өбүшүүнү, жыныстык жактан жугуучу ооруга кабылбоо үчүн кайсы дары-дармекти колдонууну, массаж жасоону...
Биз порнофильмдер менен дамамат камсыз болуп турабыз. Ошолорду көрүп, улам жаңы нерселерди үйрөнөбүз. Кыскасы, секс-робот болуу үчүн өзүңдү абдан карап, сексуалдык маданиятты үйрөнүп, дене чымыр болушу үчүн спорт менен алектенип (мен чуркайм), анан "алигиңди" багып-карооң керек экен. "Алигиң" менен жан багуу! Кызык бекен?
Ошентип, денемди сатууга аралаштым. Ии, анан чыдамкай, сабырдуу болууга аргасыз үйрөнөсүң. Антпесең, акча төлөгөн аялга жакпай калдың дегиче иштен кетесиң.
– Порнофильмдерден эмнелерди үйрөн­дүң?
– Бизге, кыргыздарга өөн көрүнөт го, ошолорду. Эми айтсамбы, айтпасамбы? Ээ, мейли эми, айтайын. Техникалык жөндөмдү, аялдын жука чурайын өпкөндү, чарчаганыңда колуңду ишке салууну, арткы көтөн чучук менен кошулууну... Аны кээ бир аялдар баалашат.
– Аялдын жилкинин суутууда сен айткандардын баарын колдоносуңарбы?
– Бизде техникалык жөндөм (ыйкоонун түрлөрү) башкы орунда. Көп аялга эркектин "эметкени" эмес, катнаштын түрү, мамиле түзө билүү, эркелетүү маанилүү.
– Күндө ушундай иш менен алектенсеңер, кийин ден соолугуңарга зыяны тиет деп коркпойсуңарбы?
– Албетте, коркобуз. Тааныш врач байкенин айтуусуна караганда, кийин бел, кан басым боюнча баш оору жаралышы жана жыныстык жактан эрте кубатсыз болуу коркунучу бар экен. Анткени күнүгө бир нече ирет дүүлүгүп, "алигибизге" кан толуп, чыңалып иштейбиз. Дүүлүккөндө жүрөгүң катуу согуп, кан тамырлар локулдап, нервдер чыңалып чыгат эмеспи. Элестетиңиз анан, бул күнүгө тынбай кайталанып жатса...
– Корксоң анан таштайын деген оюң барбы?
– Акча топтоп алсам, анан кетем. Сыртыңдан сыр бербегениң менен, жүрөгүңдүн түпкүрүндө “сойку эркекмин” деген жагымсыз сөз турат да. Ушунун өзү эле канчалык басынуу?!
– Силерге кандай аялдардан заказ түшөт?
– Бизге ким чалат? Ар кыл аялдар. Күйөөсү жоктор же ойнош күтүп кеткен күйөөлөрүнө таарынган, өчөшкөн аялдар. Күйөөлөрүнө канааттанбагандар, анан байлыгына карап экинчи, үчүнчү аял болуп тийип алгандар... Алар көбүнчө үйлөрүнө же саунага чакырышат. Кээде эс алуучу же массаж жасалуучу жайларга өздөрү келишет.
– Силерге сулуусу да, бучугу да, жашы да, картаңы да чалышса керек?
– Ооба, кемпирлерден тартып, арыгы, семизи, сулуусу, түрү суугу, маңкасы деле чалышат. 11-класстын окуучулары да чалган учурлар кездешет. Өзүн таза алып жүргөнү да, колоңсосу бары да, терчили да чалат. Алардан жийиркенип турсаң да, төшөктө болушуң керек. Анткени бизди акча башкарат. Төлөдүбү, болду, унчукпа. Көксөөсүн канааттандырып, эсин оодар. Сулуу, анан өзүн таза алып жүргөнү болсо, кийин да сени заказ кылгыдай болуп жагын, каалаган ыкмасында кошул, ширин сөздөргө көмүлт. Өбө турган жерлерин өп. Кыскасы, сени менен болгондо “Миң бир түн” жомогуна түшүп калгандай болсун.
– Кайсы улуттагылар көбүрөөк чалышат?
– Мурун башка улуттагылар көп чалышса, азыр кыргыздар алардан кем калышпайт.
– Силер кардар менен алгач сүйлөшүп, таанышып, эмнени талап кыларын билип, анан ишке өтөсүңөрбү же...
– Албетте, алгач сүйлөшүмүш этип, эмнени каалаарын билүүгө тырышабыз. Анан алар менен 1-2 "рейс" болгондон кийин эс алабыз. Айрымдар ичкилик ичишет. Анан кызуу болуп калганда ички сырларын айтышат.
– Ошол аялдардын сырларынан бөлүшсөң. Эркектерди жалдоого эмнелер себеп болот экен?
– Күндө түрдүү аялдардын коюнуна кирип, кээ биринин сырларын уга берип, сексолог да болуп калат экенсиң. Заказ бергендеринин себептери көп. Муну өзүмдүн сөзүм менен айтайын.
Негизи, эркек аялын сүйүп, барктап, төшөктө көңүлүн таап турушу керек. Төшөккө даярдап, дүүлүктүрүп, анан кошулганда оргазмга жеткирип турса, андайдын аялы башка эркекти карап койбойт. Анткени көңүл көксөөсүн күйөөсүнөн алып жатат. Бирок бизде жыныстык басмырлоого кабылган аялдар көп. Эри каалаган учурда аялын даярдабай туруп баса калат да, анан туруп кете берет. Аялдын көңүлү, самоосу менен эсептешүү деген жок. Андай аял канбай калат. Дайыма канбай калуу ооруга алып келет экен. Бул мүнөзүнө да таасир этип, аял ачуулуу, туталанма болуп кетет.
Кээ бир эркектер көп ичишип, өзүн таза алып жүрүшпөйт. Андай эркектин аялы таза, анан жийиркенчээк болсо, эри менен кошулмак түгүл, өбүшүүдөн да качат. Анан кантсин, оозу сасып, денеси ачыткы-кычыткы жыттанып турса?! Акыры башка эркекти көксөбөгөндө өлмөк беле?!
Кээ бир эркектер өзүн карабай, убагында дарыланбай жүрө берип, жыныстык жактан эрте шал же уругу эрте түшө турган болуп калышат. Алардын аялы оргазм ала албай, акырында жан кумарды башкадан издөөгө өтөт.
Мени бир байдын токолу көп заказ кылат.
"Мурун күйөөм берки аялынан качан бошойт деп күтүп отурчу элем. Кийин ал катынын акыштатып жаткан учурда мени бирөө жыргатып жаткандай болсун дегенге өттүм",- дейт.
Кээде заказ кылган аял кошулууну талап кылбай эле, массаж жасатып туруп коё берет.
– Силерди аялдар кандайча тандап алышат?
– Бизде каталог уюштурулган. Анда ар кимибиздин анкетабыз бар. Анкетада жылаңач түшкөн сүрөтүбүз, жашыбыз, салмагыбыз, боюбуз, "аспабыбыздын" өлчөмү жана кандай ыкмаларды билерибиз көрсөтүлгөн. "Оорусу жок" деген медициналык тактамабыз кошо тиркелген. Ошого карап тандап алышат.
– Бир саатка же түнгө "ставкаңар" канча?
– Ачыгын айтпайм, бирок жакшы төлөшөт.
– Заказды кайдан, кантип аласыңар?
– Бизде атайын агент бар. Ошол жана интернеттеги жарнама аркылуу заказдар табылып турат.
– Чакыргандарга бирден барасыңарбы же 2-3тү бир заказ кылган аялдар да барбы?
– "Бешеная матка" деп коюшат, андайларга эки-үчөөбүз бир барабыз. Алар түк "тойдум" дебегендер. Буларды башында "сойкулардан ашкан немелер го..." деп жаман көрчүмүн. Кийин түшүнүп калдым. Көрсө, бул оору экен да. Болгону, бир балчыктуу көлчүккө улам кире бергендей болобуз. Ошонусу жагымсыз.
– Экөөбүздүн үй-бүлөбүз бар дедиң. Аял­дарыңар эмне иштеп жүргөнүңөрдү билишеби? Аларга оору жуктуруп алсаңар кантесиңер?
– Үй-бүлөлүүлөр "командировкага" көп кеткендерге киребиз. Мурун бизде иштеген бирөөнүн аялы билип калып, чатакташып ажырашып кеткен. Ошондон кийин сак болуп калганбыз. Бир-эки жолу аялыма оору жуктуруп алгам. "Суукта, сызда отурган элем, ошондон" деп эптеп кутулгам. Негизи, презерватив биздин досубуз. Ансыз ар кандай ооруга чалдыгасың.
– Эмнелерди жеп, бел кубатыңарды көтөрөсүңөр?
– Чучук, казы-карта, балык, каймак, жаңгак, сабиз, койдун этин көп жейбиз. Анан да кочкордун умасын саткандардан алып, бышырып жеп турабыз.

Бул маектен кийин заманга жараша кесип түрү да өзгөрүп, көбөйөт деген ушул окшойт деп калдык. Минтип денесин саткан эркектердин пайда болуп, алтургай санынын өсүп баратканына ким күнөөлүү? Батыштын таасириби, жумушсуздукпу же адамда ыймандын кетип баратканыбы?

Венера Камалова
koom@super.kg