ИТ ЖАНДУУ, БАГАЛЧАГЫ КАТКАН, БЕЛ ЧЕЧПЕГЕН... МААНИСИН ТҮШҮНДҮҢҮЗБҮ?

Өткөн саныбыздагы сөз маанилерин чечмелеген темабызды улай бул жолу фразеологизмдерге токтололу. Байкап көрүңүз, сиз бул сөз айкаштарынын маанисин туура түшүнчү белеңиз?..

Алкымын майлоо – пара берип оозун жабуу, паралап коюу.

Алчы таасын жеген – өтө куу, абдан жаман, амалкөй, ар нерсеге өтө эпчилдик кылган, ашкан митаам.

Арааны ачылган, араанын агыткан – арам тамак, алдым-жуттум, ач көз, нысабы жоктук.

Асман-айга түйүлүү – дегеле кепке келбеген, айтылган сунушту четке кагуу, уккусу да келбөө, так секирүү.

Ат жалын тартуу – эр жетип чоңоюу, өз алдынча болуу, бойго жетүү.

Ат соорусун салуу – кайра кетенчиктеп, артын карай бурулуп кетүү.

Ачына айланып, тогуна толгонуу – жамандык, жакшылыкты, бар-жокту бирдей көтөрө билген, чыдамкайлык.

Багалчагы каткан – бойго жетип, чоңойгон.

Балтыр эти толуу – эрезеге жетүү, бой тартып чоңоюу, эр жетип, баралына келүү, күчкө толуу.

Бел чечпөө – тыным албай аракеттенүү, күндүр-түндүр иш үстүндө же жоо бетинде болуу, ар дайым эмгектенген адам.

Баш териси тырышуу – кыжырдануу, ачуусу келүү, жинденүү.

Жаагы катуу – таш боор, ырайымсыз, каардуу, катаал.

Жүрөгүнө муз бүрккөн – ичин муздатып, көңүлүн калтыруу.

Ит жандуу – ар кандай кыйынчылыктарга, кыйноо-кыстоого туруштук бере ала тургандай, чыдамкай.

Коюн-колтук алышкан – бири-бирине абдан жакын, ынак болуу, жакын санаалаш болуп достошуу.

Керки-балтасы колунда – шайдоот, шамдагай, иштегенге даяр.

Каз канаттап туруу – катар-катар, кыркалекей тизилип туруу.

Өң карама – кошоматчы, эки жүздүү, кызматка карап мамиле жасаган, туруктуу эмес.

Чачпагын көтөргөн – бирөөнүн шылтоосу менен ээрчип келген.

Чын тийбес – таарынчаак.

Эгиздин сыңарындай – ынак, жакын дегенди туюндурат.

(Фразеологиялык, түшүндүрмө сөздүктөрдөн алынды)

Гулийпа Маметосмон кызы

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 967, 17-23-июнь, 2021-ж.