ПРЕЗИДЕНТТИК АДМИНИСТРАЦИЯНЫН ӨКҮЛҮ 170 МИҢ СОМ ПАРА МЕНЕН КАРМАЛДЫ

18-октябрда президенттик администрациянын кызматкери пара талап кылууга шектелип кармалды. УКМКнын маалыматына таянсак, кылмышка шектүү – президенттик администрациянын ырайым кылуу боюнча комиссиясынын жооптуу катчысы Таалайбек Апенов.

Улуттук коопсуздук комитети мамлекеттик органдардагы коррупциялык көрүнүштөрдү жок кылуу боюнча жүргүзүлүп жаткан иш-чараларды жүргүзгөн. Анда ырайым кылынууга жана эркиндигинен ажыратуу жайларынан мөөнөтүнөн мурда бошотулууга тийиш болгон адамдарды тактоо жана бекитүү тартибинде коррупциянын белгиленген схемасынын түзүлгөнү такталды.

Жооптуу катчы соттолгон адамдын маселесин оң тарапка чечип берүүнү, ырайым кылынуучу адамдардын тизмесине киргизип берүүнү убадалап жарандардын биринен 170 миң сом талап кылганы айтылат маалыматта. Аталган сумманы алып жаткан учурда кармалып, УКМКнын убактылуу кармоочу жайына киргизилди.

Кызматкер “кызмат абалынан кыянаттык менен пайдаланган” деп айыпталып жатат. Тергөө иштери жүргүзүлүүдө.

Лунара Бекиева

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 985, 21-27 октябрь, 2021-ж.