САСЫК ТУМООНУ ЖЕҢҮҮГӨ ЖАРДАМЧЫ ЧАЙЛАР

Кышында суук аба ырайы, витамин жана күн нурунун жетишсиздиги иммунитетти, ишке жөндөмдүүлүктү төмөндөтөт. Андыктан адам сасык тумоо, ОРВИге бат-бат чалдыгат. Бул маалда дарылык касиети бар чайларды ичүү пайдалуу.

БАЛ, ЖАЛБЫЗ КОШУЛГАН ИМБИРЬ ЧАЙЫ

Мындай чайдын курамында C витамининин өлчөмү көп болгондуктан суук тийгенде, ОРВИде бат айыгууга жардам берет. Имбирь чайы негизи жүрөк-кан тамыр системинин жана мээнин иштешине жакшы таасир этип, боорду тазалайт, мээни тынчтандырып эс алдырат.

Керектүү азыктар: 3 сантиметр имбирь тамыры, 1 чай кашык жалбыз, 5 кесим лимон, 3 чай кашык бал, 1 литр суу.

Даярдоо: имбирди жука, ичке тилимдерге кесип туурайбыз. Чайнекке имбирь, лимон, жалбызды салып, үстүнө кайнак сууну куюп, 7-10 мүнөт демдейбиз. Эми бал кошуп иче бересиз.

КОРИЦА КОШУЛГАН АЛМА ЧАЙЫ

Мындай чай вирус жана микробго каршы касиетке ээ. Андан тышкары эс-тутумду, көрүүнү жакшыртат, кандын курамындагы холестериндин өлчөмүн азайтып, витаминдер менен камсыздайт.

Керектүү азыктар: 2 алма, 1 литр суу, 1 аш кашык көк чай, 2 таякча корица, 1 литр суу.

Даярдоо: Алманы данектеринен тазалап, кесимдерге бөлөбүз. Чайнекке алма, корица, көк чайды салабыз. Үстүнө кайнак сууну куюп, 7-10 мүнөт демдейбиз. Чай даяр!

АНАР ЧАЙЫ

Мындай чайдын анемия, вирус жана бактерияга каршы таасири бар, жүрөк-кан тамыр системин жакшы иштетүүчү, организмдеги ууларды чыгаруучу касиетке ээ.

Керектүү азыктар: 1 анар, суу 700 грамм, каалоого жараша кант, имбирь тамыры 2 сантиметр.

Даярдоо: Имбирди жука кесип, аны майдалап туурап, үстүнө кайнак суу куябыз. Анарды кабыгынан ажыратып, анан ширеси көбүрөөк болушу үчүн дандарын атайын идиште талкалап алабыз. Даны менен ширесин имбирдин үстүнө кошуп 5 мүнөттөй демдейбиз да, сироп же кант кошсок чай даяр болот.

Канымжан Усупбекова

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 989, 18-24-ноябрь, 2021-ж.