САКАЛ-МУРУТ ТУУРАЛУУ КЫЗЫКТУУ ФАКТЫЛАР

Сакал-мурут өстүрүүнү – погонотрофия, аны изилдөөчү адамды – погонологист десе, сакал өстүрүүдөн коркууну – погонофобия деп аташат.

Көпчүлүк эркектер сакал-мурутту аялзатына өзүнүн жетилгенин жана күчүн көрсөтүү үчүн өстүрөрү далилденген.
Эң узун сакал Вашингтондун тарых музейинде сакталган. Анын узундугу 5,3 метр, ал норвегиялык Ханс Лангсетке таандык. Бул рекорд 1927-жылы катталган.
Сакал-мурут суукта жылуулук бере алат. Кытай окумуштууларынын изилдөөсү боюнча, сакал-мурут бар жердеги температура ал жок жерге караганда жогору болору далилденген.
Сакал-мурут аллергиядан, бетке ар кандай так түшүүдөн сактайт. Анткени сакал-мурут мурун-ооз аркылуу кирип аллергияны чакыруучу чаңчаларды тосуп, терини күндүн ультра-кызгылт нурларынан коргойт.
Башка мезгилдерге караганда жайкысын сакал-мурут бат өсөт, анткени бул убакта организмде кан айлануу тездейт.
АКШнын 16-президенти Авраам Линкольн өлкө башына келгиче сакал койгон эмес. Ал президенттикке талапкерлигин койгон учурда 12 жаштагы кыздан кат алган. Катта кыз сакал Линкольнду аялдардын алдында жагымдуураак көрсөтөрүн, алар ушундан улам добуш берүүгө жакындарын да үгүттөшү мүмкүн экенин кеңеш катары жазган. Чынында эле Линкольн жеңишке жетип, ошол учурдан тартып сакал коюп калгандыгы көпчүлүк маалымат булактарында жазылган.
Социологиялык сурамжылоо боюнча, сакал-муруттуу адамды көпчүлүк даражалуу, олуттуу адам деп элестетишет. Бирок “Форбстун” тизмесине катталган эң бай адамдардын 90 пайызы сакал-мурутсуз.
Сакал-муруттагы түктүн саны 30 миңге чейин жетип, айына 1-1,2 сантиметрге чейин өсөт. Эгер адам 70-80 жашка чейин жашап, өмүрүнүн аягына чейин кырбаса 7-8 метрге чейин өсүшү мүмкүн.
Байыркы Египетте фараондор жана алардын жардамчылары гана сакал өстүрүп жүрүшкөн. Бул алардын даражасы бийик экенинен кабар берген.
17-кылымда Пётр I орус улутундагы эркектердин сакал-мурутун алып европалыктардай жүрүшүн каалап, сакал өстүргөндөргө 60 рублдан 600 рублга чейин салык киргизген.
Эркектерде эле эмес, кээ бир аялдарга да сакал-мурут өсөт. Алсак, америкалык аял Вивиан Уилердин сакалынын узундугу 28 сантиметрге жетип, Гиннесстин рекорддор китебине катталган.

Асел Ишенбай кызы

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (2)

Tyttty1990

2021-11-22 12:22:11

Илимпоздордун Изилдегени бир тыйын. Пайгамбарыбыз Мухаммед алейхиссалам мурун эле сакалдын пайдаларын айтып койгон

-2

Tasma2014

2021-11-22 13:00:29

Рублдан дейт го

Комментарий калтыруу үчүн өз ысымыңыз менен кириңиз же каттоодон өтүңүз.

№ 989, 18-24-ноябрь, 2021-ж.