Футбол: "АК ШУМКАРЛАР" СИНГАПУРДУ УТТУ

Бишкекте Дөлөн Өмүрзаков атындагы стадиондо 8-июнда футбол боюнча Азия Кубогуна тандап алуунун тайпалык оюндары старт алды. Алгачкы беттеште Тажикстан курама командасы менен Мьянма курама командасы кез келип, беттеш 4:0 эсебинде Тажикстандын жеңиши менен аяктады. Муну менен Тажикстан алгачкы 3 упайды алып, тайпада биринчи орунга чыкты.

Экинчи беттеште Кыргыз курама командасы Сингапур курамасы менен кез келди. Оюнда эсеп санын 56-мүнөттө Сингапурдун оюнчусу ачты, бул гол кыргызстандыктарды бир силкип алды. Оюн жарымынан дээрлик ооп калганда “Ак шумкарларда” алмашуу орун алып, оюн талаасына чыккан Виктор Майер оюнду жандантты. 77-мүнөттө капитан Валерий Кичин гол жаратса, ага удаа эле 82-мүнөттө Виктор Майер гол киргизип кыргызстандыктарды кубантты. Оюн 2:1 эсебинде “Ак шумкарлардын” пайдасына жыйынтыкталды. Муну менен Кыргызстан 3 упайга ээ болду.

Виктор Майер мыкты оюнчу аталса, оюндун экинчи бөлүгүндө алмашууга чыккан "Барселона" клубунун тарбиялануучусу Эрбол Атабаев улуттук курамда дебют жасады.

Кийинки оюндар 11, 14-июнь күндөрү болот.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 1018, 10-16-июнь, 2022-ж.