САЛАМАТТЫКТЫ САКТОО МИНИСТРИ АЛМАШТЫ

Гүлнара Баатырова саламаттыкты сактоо министринин милдетин аткаруучу болуп дайындалды. Аны кызматка дайындоо тууралуу жарлыкка президент Садыр Жапаров 23-августта кол койгон. Эми саламаттыкты сактоо министри кызматына дайындоо үчүн Баатырованын талапкерлиги Жогорку Кеңешке макулдашууга киргизилет.

58 жаштагы Гүлнара Баатырова Борбордук шайлоо комиссиясынын мурдагы мүчөсү. 2016-2021-жылдары БШКда иштеген. Жогорку билимдүү, 1986-жылы Кыргыз мамлекеттик медициналык институтун бүтүргөн.

Өткөн жумада президенттин буйругу менен Алымкадыр Бейшеналиев саламаттыкты сактоо министри кызматынан бошотулган. Ага ачылган кылмыш иши кылмыштын курамы жок деген жүйө менен токтотулду. Мындан кийин Алымкадыр Бейшеналиев министр кызматына кайтып баруу ниетин билдирген. Бирок көп өтпөй ал Чолпон-Атадагы “Алтын балалык” реабилитациялык борборунун жетекчиси болуп дайындалганы белгилүү болду.

Бул арада Алымкадыр Бейшеналиев министр кезинде кызматтан бошоткон өзүнүн 3 орун басарын сот кайра кызматына орноштуруу жана компенсация төлөп берүү чечимин чыгарды.

Бейшеналиев кылмышка шектелип кармалгандан бери саламаттыкты сактоо министринин милдетин аткаруучу болуп Жаркынбек Касымбеков иштеп жаткан.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1029, 26-август-1-сентябрь, 2022-ж.