КРнын вице-премьер-министри Ибрагим Жунусов: «ЭМИ САЯСАТТЫН САХНАСЫНДА БОЛОМ»

Жаңы өкмөт түзүлгөндөн бери “ырчы качан эл башкарчу эле?” деген күбүр-шыбыр сөздөрдү угуп калып жатабыз. Бул Ибрагим Жунусовдун вице-премьер-министрликке шайланып келгенинен улам айтылып жаткан кеп. Андыктан микрофонду Ибрагим мырзага сундук.

– Саламатсызбы? Келе жаткан Жаңы жылыңыз менен!
– Рахмат! Бирге болсун!
– Жаңы түзүлгөн өкмөттүн курамына кандай баа берет элеңиз?
– Бааны мен бербешим керек. Убакыт өтүп, биз иштегенден кийин эл бериши керек. Бул – коалициялык өкмөт, иштейли, анан убакыт баарына баа берет.
– “Өкмөттө Курманбек Бакиев эле жок, калганы бүт мурдагылар келип алышты. Ырчы качан эл башкарчу эле?” деп жатышат...
– Ар кандай сөз айтылып жатат. Эл оозунда элек жок да. Жогорку Кеңешти эл шайлады. Анан алар өкмөттү түздү. Эч кимибизди талаадан алып келип койгон жок. Биз эми кылган ишибиз менен гана кандай экенибизди далилдесек керек. Азыркы өкмөт үчүн элдин талабы, кызыкчылыгы биринчи орунда. Мен болсо маданият, билим берүү, спорт, саламаттыкты сактоо, жаштар саясаты жана миграция тармагына жооп берем. Бул иштер жаатында тажрыйбам бар. 25 жыл мугалим болуп иштегем.
– Вице-премьер катары сиздин биринчи көтөрчү маселеңиз?
– Биринчи көтөрчү маселем – мугалимдердин көйгөйүн чечүү. Бул тууралуу бүгүн эле көрсөтмө бердим. Премьер-министр каражат булактарын караштырып жатат. Буюрса, жакынкы арада чечилип калат деп ойлойм.
Анан да Чыңгыз Айтматовдун айкелин тургузуу маселеси боюнча Маданият министрлигине тапшырма бердим. Шаардын так ортосунан орун бөлүнгөнү жатат.
– Сөзүңүздөн улам бир нерсе оюма келе түштү. Улуу актёр Сүймөнкул Чокморовдун эстелиги качан тургузулат?
– Ооба, туура айтасыз, бул маселе көптөн бери чечилбей келе жатат. ЖКнын мурунку чакырылышында эле бул тууралуу сөз болгон. Каражат бюджеттен бөлүнбөсө да, кыргыздын эр азаматтарына кайрылып, эстелигин тургузууга аракет кылабыз.
– “Ата Журт” партиясынан вице-премьер-министрликке сизден башка талапкерлер бар беле?
– Менин угушум боюнча, Жылдыз Жолдошева, Нарынбек Молдобаев көрсөтүлгөн.
– Өзүңүздү кайгылуу апрель окуялары үчүн күнөөлүүлөрдүн катарына кошпойсузбу?
– Ал күндөрү түнү менен Маданият министрлигин кайтарып отургам. Кароолчу экөөбүз эле калганбыз. Ал эми апрель окуяларына менин түздөн-түз тиешем жок деп эсептейм. Кылган ишим менен элдин адамы экенимди далилдейм. Анан дагы люстрация жөнүндө “мурдагы бийликтегилер иштешпесин” деп айтып жатышат. Мен айтат элем, ким болбосун күнөөсү так далилденсе, алып барып камап салыш керек.
– “Үчүнчү ыңкылап болот” деген сөздөр бар...
– Кудай сактасын. Үчүнчү ыңкылапты Кыргызстан көтөрө албайт. Азыр биринчи кезекте стабилдүүлүктү бекем орнотушубуз керек. Өлкөбүзгө жамандык каалагандар гана ошондой кептерди чыгарып жатышса керек.
– Мурда биздин гезитке “айлыгымдан башка байлыгым жок, менде кайдагы жылкы?” дегениңиз эсимде. Азыр деле жылкыңыз жокпу?
– Кыргызды жылкыдан бөлүп кароо кыйын. Бирок чынында эле жылкым да, жылкыны бага турган адамым да жок. Айлыкка гана жашайм. Андан башка киреше алып келүүчү булактарым жок.
– “Ата Журт” партиясында мамлекеттик башкарууну өзгөртүү максаты жокпу?
– Эми парламенттик башкаруу ишке ашты. Аны да көрөлүк, мүмкүн, туура жолдур. Эгер жакшы жыйынтык болбосо, муну партиянын саясий жыйыны карап көрөт.
– Мындан ары жаңы өкмөт мүчөлөрү журналисттерден качпайбы? Же бийликке келип алгандан кийин мурдагыдай эле артынан чуркатмай башталабы?
– Албетте, баары үчүн жооп бере албайм. Туура эмес иш кылып, ката кетирсе, журналисттерден ар бир эле жетекчи качат. Мен өкмөттүн ар бир мүчөсүн сиздер менен жакын болууга үндөйм. Анткени сиздер аркылуу биздин иш элге жетет.
– Ошондо сахнага такыр чыкпай каласызбы?
– Ырчылыкта өз жолумду басып өттүм. Жаш муундарга жол бериш керек. Саясатта жашмын да. Эми саясаттын гана сахнасында болом го. Бирок элим, күйөрмандарым суранып жатса, эмнеге чыкпайм? Мүмкүн, 50 жылдыгымда отчёттук концерт берем.
– Саясатта жашмын дедиңиз. Андыктан саясий карьераңыз алдыда. Демек, президент, премьер-министр боло турган максатыңыз бар?..
– Жок, андай максатым жок. Бир гана максатым – кыргыз элине кызмат кылуу.
– Жаңы жыл алдында кыргыз элине каалоо-тилегиңиз...
– Негизи, өтүп бараткан Жолборс жылы биз үчүн өтө оор жыл болду. Жолборс азуусун көрсөттү. Андан айырмаланып, Коён тынчтыкты, назиктикти сүйгөн жаныбар. Жаңы жылыбыз коёндун мүнөзүндөй жыл болсун. Элибизде токчулук, тынччылык болсун!
– Айтканыңыз келсин. Сиздин да ишиңизге ийгилик.

Залкарбек Карабалаев
koom@super.kg