2022-ЖЫЛЫ БАНАНДЫН 83 ПАЙЫЗЫ ЭКВАДОРДОН ТАШЫЛГАН

Кыргызстан 2022-жылы банандын 83 пайызын Эквадордон импорттогон. Мындай сан Улуттук статистика комитетинин маалыматында айтылат. Ага таянсак, былтыркы жылдын 11 айында Эквадордон 23,7 миң тонна банан алынып келген, бул 2021-жылдын 11 айына салыштырганда 9,6 пайызга көп. Акчасы 11,9 миллион долларды түзгөн же 1 тонна банандын баасы орточо 504 доллардан айланган.

Банан – күнүмдүк турмушта көп колдонулган жемиштердин бири. Расмий маалыматка таянсак, Кыргызстандагы соода борборлорунун биринин филиалдарында күнүнө 10 тонна банан сатылат.

Түштүк Америка чөлкөмүндө жайгашкан Эквадор дүйнөгө банан экспортоочу негизги өлкөлөрдүн бири. Ал жактан атайын контейнерлерге жүктөлгөн банан Орусиянын Санкт-Петербург порту аркылуу Кыргызстанга жеткирилет. Эквадордон Орусияга контейнер жүктөгөн кемелер 26-28 күндө жетет, ал эми Орусиядан Кыргызстанга оор жүк ташуучу унаалар менен 10 күндө жеткирилет.

Айта кетсек, жакшы быша элек (жашыл түстүү) бананды тийиштүү температурада 90 күнгө чейин сактаса болот.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1052, 3-9-февраль, 2023-ж.