ИЗДЕЙМ СЕНИ
«АПАКЕ, БИР КӨРҮНҮП КОЮҢУЗЧУ!»
– Мен өзүмдү төрө-гөн апамды издеп келем. Апамдын ким, кандай адам экенин билбегеним менен, ага деген сүйүүм издөөгө түрткү болду. Апам мени 1976-жылдын 31-августунда Бишкек шаарындагы №2-төрөт үйүндө төрөп, таштап кетиптир. Ал жерден Бишкектеги (Фрунзе), анан 1977-жылы 15-мартта Токмоктогу Балдар үйүнө которулуптурмун. 4 жашка чейин Токмоктогу Балдар үйүндө, андан соң 1981-жылдан баштап Таластагы интернатта тарбияландым. Үй-бүлө күтүп, балалуу болуп, ата-эне кадырын билген соң апамды издеп табууну эп көрдүм. Төрөтканага барып, апамдын аты-жөнү Кыдырова Бегайым, 1952-жылы туулгандыгы жана мени 2,500 килограмм салмакта төрөгөндүгү тууралуу маалымат ала алдым. Мындан ашык маалымат бере алышпады.
Апа, мен баарын түшүнөм. Мени таштап кеткениңизге кандайдыр бир жагдай түрткү болсо керек. Билем, сиз мээримдүү эле адамсыз. Кемчиликтер, жаңылыштыктар ар бир эле адамдын башында болсо керек. Бул жашоодо жалгыз болгон эң жаман нерсе экен. “Балам тирүү болду бекен?” деп сиз да мени унутпаган чыгарсыз (сүрөттө менин 4 жаштагы кезим). Ооба, мен тирүүмүн. Учурда Токмок шаарында иштеп, уулумду жалгыз тарбиялап келем. Апа, мен сизден эч нерсе деле сурабайм. Жөн гана сизди таап, баарлашып, мээримиңизге бөлөнгүм келет. Мага бир көрүнүп коюңузчу, апаке!
Уулуңуз Кыдыров Улан. Т.: 0553 141265
«БАЙКЕМ ҮЙҮНӨН КУУЛУП...»
– Тоң районундагы Бөкөнбаев айылынын тургуну, 1971-жылы туулган агам
Шакиров Майрамбекти издейм. Ал айылдагы тамын сатып, Бишкектин Ак-Босого конушуна үй салып, үй-бүлөсү менен көчүп келген эле. Эмне себеп болгонун билбейм, 2000-жылы кайненеси үйдөн кууп чыгыптыр. Ошол боюнча дайынсыз. Угушумча, Бишкекте экен. Тааныштарым 2004-жылы “Аламүдүн”, 2005-жылы “Дордой” базарынан көрүшүптүр. 2008-жылы кызы Толгонай капысынан көчөдөн атасына жолугуп калат. Анан аны апасынын жумушуна ээрчитип келип,
“туруп туруңуз, чакырып чыга калайын” деп кирип кетсе, кетип калыптыр. Жеңеме чоң таарынычы бар окшойт.
Байке, сиз шаарга кеткенде мен жаш элем. Азыр чоңоюп, турмуштун көп нерсесине түшүнүп калдым. Атамдын, чоң энемдин, байкелеримдин көзү өтүп кетти. Эркек балага бир тууган керек экен. Эгер менин издеп жатканымды окуп же угуп калсаңыз, сөзсүз мага байланышка чыгыңыз.
Иниңиз Социалбек уулу Таалай. Т.: 0779 439852
«ЗАРИНА, МАМЛАКАТ ЖЕҢЕ, КАЙДАСЫҢАР?»
– Бир тууганыбыз
Бабаева Заринаны жана жеңебиз
Ташматова Мамлакатты издейбиз. Булар менен байланышпаганыбызга 6 жылдын жүзү болду. Зарина Көк-Жаңгакка турмушка чыгып, бир кыздуу болгон эле. Угушубузча, учурда Бишкекте, “Ош базарында” иштеп жатыптыр. Ал эми жеңебиз лейлектик болчу. Баарыбыз аны Мария жеңе дечүбүз.
Зарина, Мария жеңе, биз менен байла-нышыңыздар. Биз сиздерди сагындык.
Бабаевдердин үй-бүлөсү. Т.: 0779 108667, Учкунбек. 0779 822850, Замирбек.
«ЭЛМИРА, КАБАРЫҢДЫ БИЛДИР»
– Аксы районунун Кызыл-Жар айылынын тургуну курбум Атамкулова Элмира Эргешовнаны издейм. 2007-жылдан бери аны менен байланыша элекмин. Экөөбүз Көк-Жардагы тигүү цехтеринин биринде иштеп, чогуу жашап, бир туугандай болуп калган элек.
Элмира, издеп жатканымды билсең, сөзсүз байланыш. Сени сагындым.
Курбуң Акматбаева Жайна. Т.: + 79264581756
Дамира Арстанова
koom@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (2)
Кыдырова Бегайым эне мээримин корбогон уулунуздун бир тилегин ишке ашырыныз, али да болсо кеч эмес уулунуздан кечирим сураныз... Урматтуу кыргыз кыздары,жалпы эле аял заты жарык дуйного келтирген наристенерди эч качан таштабагыла...
Бегайым эже уулунуз сизди кечирип жаткандан кийин созсуз жолугушунуз керек.
