Жол кырсыгынан 10 айда 602 адам каза тапты

Жол кыймылынын коопсуздугун камсыздоо башкы башкармалыгынын билдиришинче, өлкөдө 2024-жылдын 10 айында 5851 жол кырсыгы катталды. Бул былтыркы жылдын 10 айындагы көрсөткүчкө салыштырганда 3,5 пайызга көп. Жыл башынан бери жолдогу унаа кырсыктарынан 602 адам каза тапканы айтылат маалыматта. Акыркы 4 айда эле автокырсыктан көз жумгандардын саны 300дөн ашып кеткенин статистика көрсөтүүдө. Анткени аталган башкармалыктын мындан 4 ай мурун берген маалыматына таянсак, өлкөдө жол кырсыгынан каза тапкандардын саны 300гө жеткен эмес. Жол кырсыктарынын санын азайтат деп түрдүү чаралар көрүлүүдө (мисалы, автомектептерди текшерүү, айдоочуларга айып пулдун суммасын көбөйтүү), бирок көрүнүп тургандай, жыйынтык сезилерлик эмес. Президент Садыр Жапаров жол кырсыктарынын башкы себеби айдоочулук күбөлүктөрдүн сатылышы деп билдирген.

– Айдоочулук күбөлүктү сатууну кан буугандай токтотмоюнча жол кырсыктарынын саны өсө берет. Токтоткон күндө да айдоочулук күбөлүктү сатып алып унаа айдап жүргөн жарандардан дагы 50-60 жылдан кийин гана арылабыз, анткени алар учурда 24 гана жаштагы жарандар,- деген президент быйыл сентябрда.

Эскерте кетсек, 2023-жылы Кыргызстанда 6945 жол кырсыгы катталып, анын кесепетинен 783 адам көз жумган. Аталган башкармалык автокырсыктардын 92 пайызы айдоочулардын айынан болорун билдирип келет.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 1146, 21-27-ноябрь, 2024-ж.