ААЛАМ АПТА ИЧИНДЕ

Казакстан

НАЗАРБАЕВ КАЙРАДАН «ЭЭРГЕ МИНДИ»
3-апрелде кечки саат 9да Казакстан Республикасынын Президентин мөөнөтүнөн мурда шайлоо аяктады. Учурда 9 миллион 180 миң шайлоочусу бар казак эли шайлоону тынч өткөрүп алганына сүйүнүп отурушат. Президенттикке 4 талапкер: мамлекет башчы, «Нур Отан» партиясынын лидери Нурсултан Назарбаев, «Казакстан Коммунисттер» элдик партиясынан Жамбыл Ахметбеков, «Патриоттор» партиясынын лидери, сенатор Гани Касымов жана «Табигат» экологиялык бирикмесинин жетекчиси Мэлс Елеусизов ат салышышкан. Алдын ала жыйынтык боюнча, 95,55 пайыз добуш менен 70 жаштагы Нурсултан Назарбаев 4-жолу катары менен Казакстандын президенти болуп шайланды.

Пакистан

СУФИЙЛЕРДИН СЫЙЫНУУЧУ ЖАЙЫ ЖАРДЫРЫЛДЫ
Дера Гази Хан шаарындагы суфийлердин сыйынуучу жайындагы жан кечтилердин жардыруусунан 42 адам каза таап, жүздөн ашууну жаракат алды. Жардырууну «Техрик-и-талибан Пакистан» экстремисттик кыймылы моюнуна алып, «бул өлкөнүн түндүк-батышындагы талибдерге каршы согушуп жаткан өкмөттүк аскерлердин иш-аракетине жооп иретинде болду» деп билдиришкен. Эскерте кетсек, сыйынуу учурунда эки жан кечти храмга кирип келип өздөрүн жардырып жиберишкен. Ал эми үчүнчү жан кечти полиция тарабынан колго түшүрүлүп, жардырууга үлгүрбөй калган.

Ооганстан

КУРМАН БОЛГОНДОРДУН САНЫ ЖҮЗДӨН АШТЫ
Кандагар провинциясында митингге чыккан эл Ооганстандагы БУУнун жана жергиликтүү администрациянын имаратына кирүүгө аракеттенишип, бир офицерди ур-токмокко алышкан. Ошол учурда укук коргоо кызматкерлери толкуган элге ок чыгарып, анын натыйжасында жүздөн ашуун адам набыт болду. Ушул тапта шаардагы абал тынч, жаракат алгандар ооруканаларга жаткырылды. Алардын арасында жаш балдар көп.
Ооган бийлиги баш аламандыкты уюштургандарга издөө салды. Америкалык диний кызматкер Терри Жонсон негизги күнөөкөр экенин баары билишет. Эскерте кетсек, бул адам өткөн аптада АКШнын чиркөөлөрүнүн биринде коомчулуктун алдында куран китебин өрттөгөн. Мына ушул акциядан кийин Ооганстанда эл көтөрүлүп, Мазари-Шарифтеги БУУнун кызматкерлерине кол салышкан. Анда БУУнун 7 кызматкери курман болуп, 20дан ашыгы жабыр тарткан.

Түндүк Корея

ЭКС-МИНИСТРЛЕР ӨЛҮМ ЖАЗАСЫН АЛДЫ
Корей элдик демократиялык республикасынын мурунку министрлери өлүм жазасын алышты. Алар аталган өлкөнүн мурдагы Жол каттамы министри Ким Ен Сам жана мурунку Каржы министри Мун Иль Бон. Аталган министрликти 1998-2008-жылдар аралыгында жетектеген Ким Ен Сандын 2004-жылы темир жолдогу жардырууга тиешеси бар. Тактап айтканда, «КЭРдин лидери Ким Чен Ир Кытайдан иш сапары менен кайтканда темир жолдон кол салууну уюштурганга шектүү» деген негизде күнөөлөнгөн. Ал эми Мун Иль Бонго болсо 2009-жылдагы туура эмес каржы реформасынын негизинде айып тагылган.

Франция

АВИАКЫРСЫКТАН КАЗА БОЛГОНДОР ОКЕАНДАН ТАБЫЛДЫ
Франциянын Анализ жана изилдөө жүргүзүү бюросу 2009-жылдын июнь айында Парижден Рио-де-Жанейрого учуп баратканда Атлантика океанына кулаган Airbus A 330 учагынан каза болгон жарандардын сөөгү табылганын маалымдайт. Адистер суу түбүнө түшүрүлгөн роботтун жардамы менен бир нече адамдын сөөгү тартылып алынган сүрөттөрдү көрүшкөн. Изилдөө ошонун негизинде болуп, эми океандан сөөктөр алынып чыгып көмүлөт жана авиакырсыктын анык себеби аныкталмакчы. Бул кырсыктан 32 мамлекеттин жараны каза болгон. Анын 72си француздар, 59у Бразилия жарандары эле. 50 кишинин сөөгү бир ай өткөндөн кийин океандан табылган болчу.