Мирлан Абдулаев: «КЫЙЫНСЫНГАН КЫЗДАРДАН КАЧАМ»

Кийинки кезде тасма горизонтунда пайда болуп, активдүү эмгектенип келе жаткан актёр Мирлан Абдулаевди «Уурунун махабаты», «Стоп-трафик», «Чыңгызхандын ак булуту», «Аят» тасмаларынан көргөнсүз. Сырдуу жигит, жакшы актёр, апасынын мээримдүү баласы, кыскасы, «красавчик» Мирлан өзү тууралуу баяндайт.

Туулган жылы – 1983-жыл, 6-октябрь.
Жактырган машинасы – Спорттук машиналарды жакшы көрөт, өзү Лексус айдайт.
Билими – Юрист. Мурун адвокат болуп иштеп жүрүп, азыр баш-оту менен актёрлукка берилип кеткен.
Жакшы көргөн жаныбары – Ит, бирок коңшусу итин ууландырып салган соң ит баккысы келбей калган.
Кыялы – Мээримдүү ата, мыкты күйөө болуу.

– Мирлан, балалыгыңдын элеси кайда калган?
– Токмок шаарында. Үй-бүлөдө жалгыз бала болгондуктан, эрке өстүм. Бирок кичирээк кезимде менден да эрке бир баланы көрүп, мага ушунчалык жаман таасир калтырган. Ошондон баштап эрке болбойм деп өзүмө-өзүм сөз берип, жакшы балага айлангам.
– Актёрлук сага кимден жуккан?
– Мен бул жаатта үй-бүлөдө биринчи карлыгачмын. Ата-энем, туугандарым искусстводон алыс адамдар. Атам менен апам мен кичине кезимде эле ажырашып кетишкен. Мен апам менен таенемдин колумда өстүм. Атам менен жолугуп турганым менен, анчалык деле жакын эмесмин. Азыр анын өзүнүн үй-бүлөсү бар.
– Анда «баары эмнеден башталды?» деген суроо менен кайрылгым келип турат...
– Менин досум – Адил Кайыпов деген жигит, фокусчу, тааныйт чыгарсыз... Аны менен жүрүп бул чөйрөгө туш болдум. Бир күнү экөөбүз Мырза Айдаралиевге жолугуп калдык. Ал «Стоп-трафик» деген тасманы тартып баштаган экен. Мен күн ысып кеткендиктен чачымды кырдырып жүргөн элем. Ал мени карап туруп: «Сен сакал өстүрө аласыңбы?»- деди. Мен «өстүрө алам» дедим. Ошондон баштап чачы кырылган, сакалчан бандит жигиттин образы мага жабышты да калды. Кийин «Уурунун махабаты» тасмасында кастингге катышкам. Негедир мага көңүл бурбай калыштыбы, андан өтпөй калгам.
Бир күнү досум Азамат Арыков экөөбүз жолугуп калдык. Ал Эрнест Абдыжапаров ооруп калганын, ооруканага тамак алып баратканын айтты. Мен ээрчип алгам. Эрнест байке менен таанышып отуруп, ал мага «тасмага тартыласыңбы?» деп калды. Мен кастингден өтпөй калганымды айтсам, таң калып: «Сен турган турушуң менен мен элестеткен бандитке окшош экенсиң. Кантип байкабай калдым?»- деди. Экинчи роль ошентип колума тийген. Эң чоң роль катары орустар тарткан «Чыңгызхандын ак булуту» тасмасында Эрдененин ролун ойногонум болду.
– Тасмада дайым бандиттин ролун аткарган жигит жашоодо кандай адам?
– Өтө мээримдүү, жумшак адаммын. Болгону, тасмага өзгөчө мамиле кылып, образга кирип кеткендиктен катаал көрүнсөм керек. Мисалы, азыр бир тасмага даярданып жатам. Анда врачтын ролун аткарам. Ошол ролду ийне-жибине чейин үйрөнүш үчүн врачтар менен сүйлөшүп, бул кесипти түшүнгүм келип жатат. Бандиттин ролун ойноо үчүн да көп изденгем. Баатырдын, кыялкеч жигиттин да ролун аткаргам. Азырынча аткара элегим – комедиялык роль.
– Кыздарга кызыктуу болгон суроону бербей койсом болбостур, жүрөгүңдүн ээси барбы?
– Жок, сулуулар ушунчалык көп, арасынан тандай албай жатам. Мен элдей болуп «мага бою узун, сулуу, модель кыздар жагат, ошолорду гана сүйөм» деп айта албайм. Бир күнү издегениме жолугарыма ишенем. Көргөндө жүрөгүм «тыз» деп, «ах, мына, мен сени издеп жүргөм» деп эле колдон алам да, анан...
– Демек, жүрөгүң буга чейин бир да жолу “тыз” дей элек...
– Ха-ха-ха... «Тыз» деген, бир-эки жолу. Бирок «не в ту сторону» болуп калган...
– Актёр бардык эпизодго даяр болуш керек эмеспи... Эротикалык эпизоддорго тартылууга туура келсе кандай кыласың?
– Биздин режиссёрлор андай ачык тасма тартышпайт деп толук ишенем. Төшөк жаатындагы эпизоддорду тартса да, ушунчалык сезимталдык менен аярлап бериши мүмкүн. Эгерде мага жакпаган эпизод болсо, албетте, баш тартам.
– Режиссёрлук иш менен да алек болуп жатыптырсың...
– «ГМу Чжун Пёго кантип турмушка чыгуу керек?» деген тасмада экинчи режиссёрлук милдетти аткарып жатам. Мен Кореяда бир аз жашап келгем. Биздин кыздар чет жерге барышса же чет элдик бирөөгө турмушка чыкса эле бактылуу болуп кетебиз деп ойлошот. Бирок андай эмес. Кыздар көздөрүн жакшы ачып карашса, бактысы жанында эле. Ушул максатта биз бул тасманы тарттык. Жакынкы арада көрсөтүлөт деп турабыз.

АДАШТЫРГАН АЛТЫ СУРОО

Өзүңдү “красавчик” деп ойлойсуңбу?

А) Албетте
Б) Жок, таптакыр сулуу эмесмин +
В) Сулуу окшойм, кыздар кылчайып калышат

Өзүнүн комментарийи
– Көрүп турасыз го, сулуу эмесмин. Бирок мени менен баарлашкан кыздарга негедир жагып калам. Ушундай жаман адатым бар.

Эң жаман адатың?

А) Фаст-фуд жемей +
Б) Сөгүнүү
В) Сагыз чайноо

Өзүнүн комментарийи
– Иш кычаган маалда гамбургер, самса жеп курсак тойгузгандан башка айла жок. Ашказан байкуш катуу эле кыйналат.

Кайсы режиссёр менен иштесем деп кыялданасың?

А) Эрнест Абдыжапаров
Б) Нурбек Эген
В) Жеймс Кэмерон

Өзүнүн комментарийи
– Мындай кыялым жок. Мыкты режиссёр менен иштешүүнү кааласам керек. Бирок кыялданбайм.

Сен кандай кыздан алты метр алыс качасың?

А) Уялчаак кыздан
Б) Тамеки чеккен кыздан
В) Өзүнө өтө ишенимдүү, кыйынсынган кыздан +

Өзүнүн комментарийи
– Кыйынсынып, өзүн ааламдын ханышасы сезген кыз менен таптакыр мамиле курбайт элем.

Сен кимдин кеңешин дайым угасың?

А) Ата-энемдин
Б) Досторумдун
В) Жүрөгүмдүн +

Өзүнүн комментарийи
– Жакындардан, достордон көп кеңеш угам. Бирок өзүмдүн оюмдагыны кылам. Жүрөгүм мага мыкты кеңешчи.

Ишенбейсиңер, бирок Мирлан өзү бул иштерди жасайт:

А) Өз колу менен лагман чоёт +
Б) Күндө гүлдөргө суу куюп турат
В) Базарга барып өзү азык-түлүк алып келет

Өзүнүн комментарийи
– Мурун чоюп көргөм. Бирок баары бир аялзатынын колунан сапаттуу чыгат.

Нуржамал Жийдебаева
star@super.kg

 Кыстарылган видео