СУРООМ БАР, ЖООБУҢУЗЧУ?

Эл көзүндөгү адамдардын аркалаган кызматы эле эмес, алардын баскан-турганы, жеке жашоосу да кызыгууну жаратпай койбойт. Бизди кызыктырган айрым суроолор менен атактуулар айылына баш багып, аларга собол таштадык.

– “Өзбек байыса там салат, кыргыз байыса катын алат”
дегенге кандай карайсыз?

Өзбек ажы Чотонов, "Дил мүрөгү" адеп-ахлак,
маданият борборунун жетекчиси:
– Өзбектер мурдатан эле байлыкка көбүрөөк көңүл бөлүшөт. Кыргыздарга келсек, “Манастан” эле көп аялдуулук боюнча канчалаган далил келип чыгат. Ата-бабаларыбыз илгертен туура стратегияны кабыл алышкан. Баатыр, даанышман адамдардан тукум калтырыш үчүн бир нече никеге турушкан. Көп аялдуулук көпкөндүк эмес, тескерисинче, сооп иш. Азыр аял менен аял, эркек менен эркек үйлөнүп, ойнош күтүп жүргөндөрү канча? Бул – абийирсиздик. Ага караганда канча аял алсаң да никеге турсаң, жетим-жесирлердин саны азаят, тукумубуз көбөйөт, бул соопкерчилик эмей эмне? Көп аялдыкка каршы чыгуу – колонизаторлордун закону.

– Кайсы ушактан катуу “удар” жегенсиз?

Динара Акулова, ырчы:
– Көбүнчө үй-бүлөлүк, жеке турмушума байланыштуу ушактардан жапа чегем. Күйөөм менен ажырашып кеткенден кийин канча деген кара ит-ак итке мингизишпеди. Биздин жумуш оор, көрүнгөн жакка чуркап, жан тынбаган учурлар болот.
Эркек балдар чыдамдуу, ары-бери жумшаганга ыңгайлуу деп иштешсем, мени алардын ар бирине турмушка чыгарышты го, чиркин! Кийин кыздар менен иштешкенимде алардын дарегине да жаман-жакшы сөздөрдү айтышты. Ушундай ушактардан көңүл калып, чүнчүп, сахнага чыккым келбей калган учурларым көп эле болгон.

– Спорттук карьерасы бүткөндөн кийин
спортчулар же машыктыруучу,
же бандит болуп кетишет дешет...
Муштум менен өз оюңузду таңуулап көрдүңүз беле?

Мирлан Асеков, эрежесиз эр уруштун чебери:
– Бардык эле спортчулар машыктыруучу болсо болот, бирок бандит болбойт. Бандит болуп кеткендердин өзүнөн болсо керек. Эрежесиз эр уруш мен үчүн хобби десем болот. Ал эми келечекте өз кесибим менен бажы кызматкери болуп иштесем деген оюм бар.
Өзүмдүкүн муштум менен таңуулаганды рингде гана колдонуп келем. Ал эми рингден сырткаркы муштумдар бардык эле эркектерде болсо керек.

– Айлыгыңыздын канча бөлүгүн аялыңыздан кымтып каласыз?

Кутман Жолдошев, ырчы:
– Жеңеңден кымтып алгыдай деле акча таппайм. Акча жагын экиге бөлүп коём. Той-топурдан тапкан акча, албетте, жеңеңдин чөнтөгүнө түшөт. Ал эми айлык акымды өзүм алып, балдарымды сейил багына алпарып эс алдырып, балмуздак, оюнчук сатып берем дегендей.

– Токол болууга даярсызбы?

Айнура Салахидинова, ырчы:
– Мен табиятымдан ач көз адаммын. Жадакалса өзүмдүн эжелерим менен кийим-кечелеримди бөлүшкүм келбейт. Анан кантип сүйүктүүмдү бирөө менен бөлүшмөк элем? Миң сүйүп, ансыз жашоо жоктой сезилсе да ал адамды башка айым менен бөлүшкөнүмдү элестете албайм. Буга ата-энем дагы каршы болушса керек. Токол эмес, жалгыз көрөр көзү болгум келет.

– Мугалимдин айлыгына жашай аласызбы?

Бакыт Төрөбаев, ЖКнын депутаты:
– Албетте, мугалимдердин алган айлыгы жетишсиз. Мен 4-чакырылышта депутат болуп жүргөндө эле бул маселени көтөрүп чыккам. Алардын койгон шарттарынын бардыгын туура деп эсептейм. Азыр өзгөчө тоолуу райондордо шарт жок, билим деңгээли төмөндөп баратат. Буюрса, 1-майдан кийин мугалимдердин орточо айлык акысы 6-7 миң сом болуп калат. Бул аз болсо да мугалимдердин жашоо шартын жеңилдетет.

Асыл Орозбекова
star@super.kg