ГҮЛЗИНАТ МЕНЕН МИРБЕК "БЕШ ЖЫЛДЫЗ" КОНКУРСУНА БАРАТ

Акыркы убакта эл аралык сынактарга катышуу менен кыргыз элинин намысын коргогон жылдыздарыбыздын саны күн санап көбөйүүдө. Алгач Орусия мамлекетинин ичинде гана өткөрүлүп келаткан "Беш жылдыз" конкурсу эми эл аралык конкурска айланды. Бул конкурска катышуу укугуна КМШ жана Балтия өлкөлөрүнүн ырчылары да ээ болушту. Ошол себептен Орусиянын Биринчи каналы менен биздин УТРК тыгыз кызматташууда. Аталган конкурска жолдомо алуу үчүн ырчылар арасындагы тандоо туру кыргыз телевидениесинин концерттик студиясында болуп өттү. Калыстар тобунун мүчөлүгүнө Муратбек Бегалиев, Түгөлбай Казаков, Ассоль Молдокматова, Ырыскелди Осмонкулов, Мелис Эшимканов, Кыялбек Урманбетов, Рафаэль Сарлыковдор кирип, конкурс үч этаптан турду.
Акырында калыстар алгачкы эки турдан ийгиликтүү өткөн ырчы талапкерлердин арасынан жаш ырчы Мирбек Атабековду жана "Шантелл" тобунун солисткасы Гүлзинатты "Эларалык фестивалдын жүрүшүнө татыктуу" деп тандап алышты. Бул эларалык "Беш жылдыз" сынагы 2008-жылдын 28-30-август күндөрү Орусиянын Сочи шаарында өтүп, гала концерт менен жыйынтыкталмакчы.

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (0)

Комментарий калтыруу үчүн өз ысымыңыз менен кириңиз же каттоодон өтүңүз.

№ 298, 18-24-июль, 2008-ж.