АПТА ХРОНИКАСЫ

102 билдирет

ҮСӨН СЫДЫКОВ МЕНЕН ИСХАК МАСАЛИЕВДИН СОТУ ЖЫЛДЫРЫЛДЫ
Президенттин администрациясынын экс-жетекчиси Үсөн Сыдыков жана Коммунисттер партиясынын мурдагы лидери Исхак Масалиевдин соту жылдырылды. Буга Сыдыковдун дарыланууда жүрүп, сотко келбей калганы себеп болгон. Сот иши 10-декабрга калтырылды.

ШИРИН АЙТМАТОВАНЫН УНААСЫН ТОНОП КЕТИШТИ
Милицияга берген арызында айтылгандай, ЖКнын депутаты Ширин Айтматованын автоунаасын 26-ноябрь күнү саат 20:30да белгисиз адамдар тоноп кетишкен. Окуя депутат Бишкек шаарынын Турусбеков-Киев көчөлөрүнүн кесилишинде жайгашкан “Народный” дүкөнүнө кирип кеткенде болгон. Кылмышкерлер машинанын алдыңкы каптал терезесин талкалашып, ичинен сумканы алып кетишкен. Анда документтер жана телефон болгон. Иликтөө жүрүп жатат.

3 АДАМ КАЗА БОЛДУ
28-ноябрда саат 20:20да Тоң районундагы Оттук айылында Фольксваген автоунаасы жолдун чекесинде токтоп турган КамАЗ машинасына барып урунган. Жыйынтыгында 1965-жылы туулган Фольксваген машинасынын айдоочусу К.Койгелдиев, жүргүнчүлөр 2006-жылы туулган Курманбек уулу Дастан жана Жамал аттуу аял (толук аты-жөнү такталып жатат) каза болушкан.

КЫРГЫЗСТАНДЫК ЖАРАН КАРМАЛДЫ
27-ноябрь күнү Казакстандын аймагында Бишкек-Новокузнецк поездинен 2 килограмм героин табылган. Баңгизат Кыргызстандын жараны К.Ш. аттуу айымдын жүктөрүнүн арасында болгон.

МАШИНА ЭКИГЕ БӨЛҮНҮП КЕТКЕН
26-ноябрда саат 19:30дар чамасында Бишкек-Ош жолунун 448-чакырымында 23 жаштагы С.Ш. Мазда автоунаасы менен Мерседес Бенц унаасын коюп кеткен. Кырсыктын кесепетинен Мазда машинасы экиге бөлүнгөн. Натыйжада 47 жаштагы П.Х. аттуу аял жана 2 жашар А.Т. аттуу кыз каза болгон.

АВТОБУС КЫЗДАРДЫ СҮЗҮП КЕТТИ
1-декабрь күнү эртең менен Бишкек шаарындагы Ак үйдүн тушунда жол кырсыгы катталган. Жүргүнчүлөрдү ташуучу №7-автобус жолдун жөө жүргүнчүлөрү өтүүчү жеринен эки студент кызды коюп кеткен. Кыздар, бактыга жараша, аман калышкан.

АШКАЗАНДАГЫ БАҢГИЗАТ
26-ноябрда “Ак жол” чек ара постунан Чүй облусунун 43 жаштагы тургуну Т.А. кармалган. Ал адам ашказанында героин салынган 63 даана капсуланы алып бараткан жеринен кармалды. Медициналык жол менен Т.Анын ашказанынан бардык капсулалар алынган. Анын Орусиянын шаарларынын бирине баратканы анык болду.
Иликтөө иштери жүрүп жатат.

101 билдирет

ҮЙЛӨР ӨРТКӨ КЕТТИ

• 30-ноябрь күнү саат 15.15те Ноокат районунун Ак-Чал айылындагы К.Токуровдун үйүнөн өрт чыккан. Кырсыктын кесепетинен 144 метр аянтты ээлеген үйдүн чатыры толугу менен күйүп кеткен. Ага кошумча 2 тонна чөп да күлгө айланды. Өрт 1 сааттын ичинде өчүрүлгөн.
• 30-ноябрда саат 21:50дө Кара-Суу районунун Жар-Ооз айылындагы И.Азимжановдун үйүнөн өрт чыккан. Анын айынан үйдүн 40 чарчы метр аянты күйүп кеткен. Ага кошо 400 түк чөп күйгөн. Өрттү өрт өчүрүүчүлөр бир жарым саатта өчүрүшкөн.
• 28-ноябрь күнү саат 14:15те Таш-Көмүр шаарынын Достук көчөсүндөгү М.Чоноровдун үйүнөн өрт чыгып, үйдүн 34 метр аянты күйүп кеткен. Өрттүн чыгышына колго жасалган электр меши себеп болгон. Өрт 5 саатта өчүрүлгөн.
• 29-ноябрда саат 05:26да Талас районунун А.Огомбаев айылындагы М.Айталиевдин үйүнөн өрт чыккан. Кырсыктын кесепетинен үйдүн 149 чарчы метр аянтты ээлеген чатыры күйүп кеткен. Андан сырткары үйдөгү буюмдар да өрткө кабылган.