ВАГОНДО ЖАШАП, ӨЗҮНҮН 4 БАЛАСЫНА КОШО КӨЧӨДӨ КАЛГАН 9 АДАМДЫ БАККАН АЯЛ
Үстүндө үйү, бүтүн кийими, алдында ашы болгонуна карабай "тиги жок, бул жок" деп барга шүгүр кылбагандар көп. Биздин бүгүнкү каарман Айчүрөк Закирова 4 баласы менен вагондо жашаганына карабай көчөдө калган 9 адамды кошо багып келе жатат. Бирок 40 күндөн ашкан карантин буларды күнүмдүк таап жеген тамагынан айрып, кыйынчылыкка салууда. Эскирген вагон жана 2 күркөдө оор шартта күн кечирип жатышат.
– Айчүрөк айым, алгач өзүңүз тууралуу маалымат берсеңиз…
– Аты-жөнүм Айчүрөк Зикирова, көп жылдан бери Бишкекте жашайм. Өзүмдүн 4 балам бар. Тагдыр ар түрдүү болот экен, 4 баламды өзүм жалгыз багып, окутуп келе жатам. Балдарыма кошуп түрдүү себептер менен көчөдө калган 10 адамды да жаныма алып, аларга эне ордуна эне болуп келе жатам.
– Алар кимдер, кандайча болуп сиздин колуңузга келип калышты?
– Жашоо кандай болорун эч ким алдын ала билбейт экен да. Турмуш аларды ары калчап, бери калчап, акыры ар кандай себептер менен көчөдө калышкан. Аларга боорум ооруп чогултуп отуруп, саны 10го жеткен. Адамдай болуп жашашсын, ысык-суукта талаалап ооруп калышпасын, ушуларга башпаанек кылып берейин деп өз акчама 2 күркө сатып келип, өзүм жашаган вагондун 2 жагына койдуруп, үй кылып бердим.
Алар мени экинчи апабыз деп калышат. Учурда 8 эркек жана Гүлгаакы деген келин, менин 4 балам болуп ушул короодо күн кечирип жатабыз. Бир жигитибизди жакында үйлөнттүк, ал келинчеги менен батирге чыгып кетти.
– Өзүңүз жашаган вагон канча бөлмөлүү?
– Кире бериште бут чечүүчү жай, анан чакан 2 бөлмө бар. Анын бирин мага сиңди катары болуп калган Гүлгаакыга бошотуп бергем. Берки бөлмөсүндө мен 4 балам менен жашайм. Албетте, тар, бирок айла жок.
– Короого киргенде эле чоң мүшөктөргө толгон желим бөтөлкөлөр көзгө урунду...
– Ооба, башынан эле желим бөтөлкө чогултуп өткөрүп жан багып келебиз. Мен деле 4 баламды ошентип чоңойтуп, окутуп жатам. Ар кимиси ар жактан таап, чогултуп келишет. Мен аларды өткөрүп, акчасын алып келем. Анан баарыбызга деп тамак-ашка акча алып калып, калганын ар кимисине бөлүп берем. Гүлгаакы баарыбызга күн сайын 2 маал 1 казандан ысык тамак жасайт. Ошону бөлүп ичебиз. Коронавируска байланыштуу карантин болгондон бери желим бөтөлкө алчу пункттар иштебей, тамак-аштан кыйналып кеттик. Биздин абалыбызды уккан бир жигит 2 күн катарынан келип азык-түлүк таштап кетти. Эми ал деле ушунча адамга канча күнгө жетерин билбейм. Жаныбыздагы дүкөндөн карызга тамак-аш алып отуруп көп карыз болуп калдык.
– Сиздин бакма балдарыңыздын жашы канчада?
– Алды 54тө, арты бой жетип калган жигиттер. Жашоонун оор тузун татып калган немелер бул жерге келип, адамдай болуп жашап башташканда кадимкидей эреркеп, мага алкыштарын айтып ыйлап калышат. Азыркыга чейин «сиз болбосоңуз жашообуз кандай болмок эле билбейбиз» деп калышат. Бир үй-бүлөдөй болуп калганбыз, баарыбыз бири-бирибиздин мүнөзүбүздү билебиз. Мен кимисинин ичинде кандай күйүт бар экенин билем, ошого аларды аяп турам.
Учурда өзүмдүн 2 балам студент, 2 балам мектепте. Студент балдарымдын контракттарын да желим бөтөлкөлөрдү чогултуп өткөргөн акча менен төлөп келе жатам. 2 күркөдө эски болсо да телевизор бар, ошону көрүшөт. Биздин вагондо болсо телевизор жок, силер көргүлө деп балдарга бергем.
– Бул жерде ушундай абалда канча жылдан бери жашап жатасыздар?
– Мурун башка жакта баш калкалачубуз. Бул жерге келгенибизге 3 жыл болду.
– Бул короо эмне болгон короо? Шаардагы мекемелердин бирине караштуу жерби?
– Бул нан заводго караштуу короо. Бул жерде жашаганыбыз үчүн айына 7000 сом төлөйбүз. Кээде убагында бере албай калсак "чыккыла, бошоткула!" деп кубалашат. Андыктан чакан да болсо жер тилкебиз болсо, баарыбыз батып жашай турган там тургузуп алат элек. Негизи эле оюмда кароосуз калгандар үчүн атайын жай ачайын деген оюм бар. Бул боюнча атайын жазган долбоорум да бар.
– Жер тилке алуу үчүн аракет кылып көрдүңүзбү?
– Мурун мэрияга 2-3 жолу кайрылгам. 5 сотых болсо да жер тилке бергиле, үй-жайсыз адамдарды кошо багып жашаганга деп. Берилбейт деп коюшкан. Өкмөттөн жардам болушунан түңүлүп, өз арабабызды өзүбүз тартып келе жатабыз.
– Ооруп калганда кайда кайрылып дарыланасыздар? Алардын шаарда каттоосу жок болсо…
– Көбүнчө жеке клиникаларга алып барып текшертип, дарылатам. Кымбат алышат, бирок айла жок. Бир врач бар, ошол кээде келип текшерип турат.
– Өзүңүз вагондо жашасаңыз да 9 адамга башпаанек таап берип, аларга жол көрсөтүп келе жатыпсыз. Кайрымдуу адамдарга айтар сөзүңүз барбы?
– Биринчиден, «Супер-Инфо» гезитине рахмат, биздей адамдардан кабар алган. Нускаңыздар көбөйө берсин. Анан албетте, кайрымдуу адамдар чыгып жер тилкесин алууга жардам берсе деген үмүтүм бар. Жер алсак, эптеп үй салып алат элек.
Жардам берүүнү каалагандар үчүн Айчүрөк айымдын телефон номери: 0770467790
Канымжан Усупбекова
koom@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (16)
Күчтүү айым экен.Аллаахым жар болуп, үй тургузуп алыңыздар.
Окмот ушундай адамдарга жардам бериш керекда.Боор ооруй турган акыбалда жашашат экен.
Тиги эркектер дени сак, күч-кубаты бар эле немелер экен, өздөрү деле иштеп үй жай салып чыгып кетсе болмок экен цыгагдардын эркегиндей болуп бир аялдын көзүн колун карабай!
Тенирим ден соолук берсин.
Баккан балдары Өспүрүм балдар кыздарбы десе баары эле сөөгү каткан чоң кишилер экенго, аларды неге багат түшүнбөдүм өзү араң жашаса... дагы талап кетпениздер, ар бир адамдын өзүнүн ойу бар дегендей... мага жаккан жок кайрымдуулук, сүрөттө кишинин алдында арак бөтөлкөлөр турат, эптеп кардын тойгузуп күнүн өткөргөн адамдарго
Dorukchum, Ооба, бүтеле көчөдө үйү жок калган полу бомждарды киргизип алган окшойт, эгер норма адамдар болсо иштерин таап, кв снимат этип кетишмек, мындай жерде жашаганга эркектик намыстары жол бербейчи, тем более эркектер экен, аялдар болсо бир жөн.
Короче супер.инфо, болбоду бул жаңылыгыңар!
Dorukchum,Туура, бул аял жон гана кызматын корот окшойт ботолко тердиртип иштетип, селсаяк болсо эмне жээрге тамагы жата турган жайы болсо журо беришет да. Тем более озунун балдары студент болсо ботолко тербесе керек.
Чооң эле киши таенесинин төрүндө отургансып отурат го. Бекер тамакты жеп тиги аялды мактап койсо багып жатат да. Көчүккө тээп иште деш керек. Майыптар бир нерселерди жасап сатып жан багып жатышпайбы
Байлар мечит курганы туураго, бирок ушундай уй булолорго да чакан там салып берсе, хотя бы беш жуз тоок алып берип ферма ачып берсе иштешип кетмек.
Сынтага албайм. Сын да айта албайм. Ар кимдин жашоосу озундо
katerina.li,акылдуу экенсин,Бактылуу бол
Баарын Аллах билет..бирок тиги эже.ботолко чогултуп эки студент баласынын контрагын толоп жатканына ишенбей кеттим...чон эле кишилерди Бекер бакпайтта тирилигин откоргон ошолор окшойт
Булардын жашоосу бир аз башкачараак.Тиги эркектер желим ботолко чогултуп келет кунуго,аны тиги эже Кытайга откоруп турат.Айына эн аз дегенде 40минге откоруп турчу,азыр чек аралар жабылып калып токтоп калды да.Андан тушкон акчаны эже алып тиги кишилерди арак,тамак менен камсыздайт болгону.Ал эми вагонго киргизип алганын себеби мындай.Ботолко терген кишилерди абдан талашышат,терип келген ботолконду мага откоз деп бомжтарды паралап арактан кобуроок куюп берип турушат.
fanatka19,Себеби аларга арак,тамак болсо болду чогулткан ботолкосу канча тураары менен деле иштери жок.Тан атпай баштары ооруган немелер терип келип ким алса ошого откоруп жиберип арак ичишет да.Ал эми эже постоянный клиент болсун деп буларды киргизип алган,бул кишилер терип келгенин эжеден башкага откорушпойт.
fanatka19, сен кайдан билесиң мунун баарын? Же тааныйсыңбы эжеңди?))
Анда ошентип эле айтпайбы, типа колумда иштеген ишчи балдарым деп)).
Да по виду не похожа на того,кто живет в вагончике... кол алдымдагы адамдар деп эле айтпайбы,чондорго окшоп " жумуш, турак-жай мн камсыз кылдым" деп, эми граница жабык киреше булагы азаыйп, олумуштонбой
