Алина Шаикова: "Бүгүн оң рулдуу унааларды каттоо акыркы кардарга чейин өтөт"

Бүгүн оң рулдуу унааларды каттоо акыркы кардарга чейин өтөт. Бул тууралуу бүгүн, 3-июнда Жогорку Кеңештин жыйынында Мамлекеттик каттоо кызматынын башчысы Алина Шаикова билдирди.

Анын айтымында, айрым жарандар көптөгөн оң рулдуу унааларды сатып алып, берилген 3 айлык мөөнөттүн ичинде каттоодон өткөрүүгө жетишкен эмес. "Кээ биринде 100дөй унаа бар экен. Алардын баарын каттоого ээлеринин акча каражаттары жетпей калууда",- деди Шаикова.

Вице-премьер-министр Абдырахман Маматалиев бул маселенин үстүнөн өкмөт иштеп чыгарын баса белгиледи. "Бул оор маселе. Эгер кайрылган жарандардын саны көп болсо, тиешелүү иш-аракеттер жүргүзүлөт",- деп кошумчалады Маматалиев.

Айта кетсек, бүгүн, 3-июнда оң рулдуу унааларды кыргыз өлкөсүнө алып кирүүгө тыюу салган мыйзам күчүнө кирди. Ага ылайык, оң рулдуу унааларды каттоодон өткөрүү жана өлкөгө алып кирүү токтотулат.

Автор: Нургазы Аматов