Мектеп бүтүрүүчүлөрүнө аттестаттар 22-июнда тапшырылат

Билим берүү жана илим министрлигинин буйругуна ылайык, жалпы негизги жана жалпы билим берүүчү орто мектептердин бүтүрүүчүлөрүнө билими жөнүндөгү документтер 22-июнда тапшырылат. Бул тууралуу 12-июнда Билим берүү жана илим министрлигинин басма сөз кызматынан билдиришти.

Аталган буйруктун негизинде документтерди тапшыруу салтанаттуу түрдө жергиликтүү өз алдынча башкаруу, укук коргоо органдарынын жана ата-энелер коомчулугунун катышуусу менен өткөрүлөт. Ал эми 9-класстын бүтүрүүчүлөрүнө жалпы негизги билими жөнүндөгү күбөлүктөрү жалпы билим берүүчү мектептерде 20-июнда тапшырылат.

Эскерте кетсек, бүтүрүүчүлөргө арналган иш-чараларды мектептин аймагында, оюн-зоок жайларда, кафелерде, ресторандарда жана жаратылышта кечки жана түнкү мезгилдерде өткөрүүгө тыюу салынган. Ошондой эле мектептин жетекчилеринин класс жетекчилерден, ата-энелерден жана мугалимдерден мыйзамсыз түрдө акча чогултуу фактылары катталса, кызмат орундарынан бошотууга чейинки тартиптик жаза көрүлөт жана жоопко тартылат.

Автор: Айпери Ганыжан кызы
Фото: Динара Абдыкадырова