Асылбек Жээнбеков депутаттарды Июнь окуяларын саясатташтырбоого чакырды

Бүгүн, 17-июнда Жогорку Кеңештин жыйынында төрага Асылбек Жээнбеков 2010-жылдагы Июнь окуяларын саясатташтырбоого чакырды.

"Айрым депутаттар "мен Ошко барып, эскерүү иш-чарасына катыштым, парламенттен башка эч ким барган жок" деп мактанып жатышат. Бул туура эмес. Азыркы бийлик 5 жылдан бери ошол окуялардын кесепеттерин жоюу, шаарларды калыбына келтирүү, тынчтыкты куруу боюнча иш жүргүзүп жатат. Эбегейсиз жумуш болду. Ошол окуяларды эч ким унуткан жок. Президент 10-июнь күнүн Эскерүү күнү деп жарыялады. Ар жыл сайын өлкө боюнча тиешелүү иш-чаралар уюштурулууда. 11-июнда Бириккен Улуттар Уюмунун Башкы катчысы Пан Ги Мун келип, эскерүү иш-чарасына катышты",- деди төрага.

"Июнь окуяларынын пайдубалы 1990-жылы салынган. Ошондон бери туура эмес саясат жүргүзүлүп, ушундай кайгылуу жыйынтыкка алып келди. Ошол окуяларды реваншисттер, үчүнчү күчтөр уюштурушту. Дүйнө эмне болуп жатканын көрүп жатабыз. Өлкөбүздү Кудай сактады. Азыркы бийлик улуттар ортосундагы ынтымакты бекемдөө боюнча концепцияны кабыл алды. Жумуш жүрүп жатат. Муну көрбөгөн адам сокур болуп калат го!"- деп кошумчалады Жээнбеков.

Автор: Нургазы Аматов