“Кыргыз-казак бажы бекеттеринен товар алып өтүүдө жаралган кыйынчылыктар жоюлуп жатат” деди министр Панкратов

“Кыргыз-казак бажы бекеттеринен товар алып өтүүдө жаралган кыйынчылыктар жоюлуп жатат”,- деди экономика министри Олег Панкратов. Министр бул тууралуу бүгүн, 27-августта Кыргыз Республикасынын ЕАЭБге кирүүсүнө байланышкан маселелер боюнча өтүп жаткан брифингде айтты.

Анын билдиришинче, учурда чек арадан товар алып өтүү ЕАЭБ мыйзамдарына ылайык жүргүзүлүп жатат.

"Кыргыз-казак чек арасындагы бажы бекеттери алынгандан кийин ал жайга барып келгенбиз. Чынында эле товар алып өтүүдө ишкерлер кыйынчылыктарга кабылып жатышканын билдиришкен. Кечээ, 26-августта да барып, андагы абал менен таанышып келдик. Көпчүлүгү жеңил кирип-чыгып жаткандарын айтышты, анткени биринчи ирет өтүп жатышканда товар боюнча иш кагаздарды толтуруу кыйынчылык жаратчу. Азыр бир кыйла жеңилдеп калды",- деди министр.

Автор: Жамалидин Парманкулов