8 айда билим берүүгө 11 миллиард, саламаттыкты сактоого 6 миллиард, социалдык коргоого 16 миллиард сом жумшалды

Быйылкы жылдын 8 айында республикалык бюджеттен социалдык чөйрөгө 36 миллиард 426 миллион сом жумшалды, бул республикалык бюджеттин жалпы чыгымынын 57,4 пайызы. Каржы министрлигинин билдиришинче, мурунку жылга салыштырмалуу социалдык тармактын чыгымы 2 миллиард 346 миллион сомго көбөйгөн.

"Аталган мезгилде социалдык коргоого республикалык бюджеттен 16 миллиард 316 миллион 200 миң сом жумшалды, былтыркыдан 1 миллиард 154 миллион 700 миң сомго көп. Билим берүү тармагына 11 миллиард 989 миллион 900 миң сом жумшалды, былтыркыдан 625 миллион 600 миң сомго жогору. Саламаттыкты сактоо тармагынын чыгымы үчүн 6 миллиард 600 миллион 300 миң сом берилди, былткыркыдан 386 миллион 700 миң сомго көп. "Эс алуу, маданият жана дин" бөлүмү боюнча чыгым 1 миллиард 519 миллион сомду түздү",- деп айтылат маалыматта.

2015-жылдын республикалык бюджетинде социалдык коргоого 28 миллиард сом, саламаттыкты сактоого 13 миллиард 800 миллион сом, билим берүүгө 21 миллиард 300 миллион сом каралганы айтылды.

Автор: Автандил Добулбеков