Укук коргоочу №50-СИЗОдон кармалгандарды качыруу кандай максат менен уюштурулганы тууралуу өз пикирин айтты

№50-СИЗОдон кармалгандарды качырууну өлкөнүн бийлигиндеги айрым күчтөр милициянын тиешелүү өкүлдөрүнүн жардамы менен уюштурушкан. Бул тууралуу бүгүн, 17-ноябрда тегерек столдун жүрүшүндө укук коргоочу, адвокат Токтайым Үмөталиева билдирди.

Анын айтымында, аталган операцияны уюштургандар учурда тергөөнү өзүнө керектүү нукка буруп жатышат. “Биздин милдетибиз - тергөөнү башка жакка бурдурбоо. Түрмөдөн качкандардын туугандарына жана жакындарына басым жасалып, аларды жалган маалымат берүүгө түртүшүүдө. Мындан тышкары Эдил Абдрахмановду тирүү карматкан милиционерлерге да басым көрсөтүлүп жатат”,- деди укук коргоочу.

Андан соң ал түрмөдөн качыруу кандай максат менен уюштурулганы тууралуу өз пикирин билдирди. “№50-СИЗОдон Азамат Мусуралиевди жана Абдулла Юсуповду качырып, кийин өлтүрүү максаты менен операция уюштурулган. Анткени булар мародёрчулук тууралуу документтерди уурдоо кылмыш иши боюнча негизги айыпталуучулар болушкан”,- деген оюн айтты Үмөталиева.

Эскерте кетсек, 11-октябрдан 12-октябрга караган түнү Чүй облусунун Төмөнкү-Нооруз айылындагы №50-түзөтүү колониясынан 9 кылмышкер абактын кызматкерлерин муунтуп өлтүрүп, качып кеткен. Булардын ичинен 5 кылмышкер ошол эле түнү МАИ тарабынан колго түшүрүлгөн.

16-октябрда качкын кылмышкерлердин бири Данияр Кадыралиев түшкө маал Дордой конушунда өлтүрүлгөн. 20-октябрда кылмышкерлердин экинчиси Азамат Мусуралиев Сокулук районунун Арал айылы тараптан жок кылынган.

22-октябрда Чүй облусунун Аламүдүн районундагы Ала-Тоо айыл аймагында Эдил Абдрахманов тирүү кармалган. Ушул эле күнү кечинде Бишкектеги Достук конушунда Алтынбек Итибаев 2 саатка созулган атышуу учурунда ок тийип каза тапкан.

Мындан тышкары аталган абактан качып баратканда кармалгандар: Таалайбек Жуманов, Бакыт Кенжегулов жана Муратбек Жумалиев 21-22-октябрь күндөрү түрмөдө каза болушкан.