Санкт-Петербург шаарында унаанын көтөргүчү кулап, 3 кыргыз жараны жабыркады

Орусиянын Санкт-Петербург шаарында унаанын көтөргүчү кулап, 3 кыргыз жараны жабыркады. Бул тууралуу орусиялык маалымат каражаттары жазып чыгышты.

Маалыматка ылайык, кырсык 2-октябрда саат 16:30да Ленин кең көчөсүндө жайгашкан үйдө жарнамалык конструкцияларды алмаштыруу учурунда болгон.

“Белгисиз себептер менен “Строй-Сервис” ишканасына таандык КамАЗ унаасынын көтөргүчү жерге кулап түшкөн. Кырсыктан улам Кыргыз Республикасынын 3 жараны жаракат алып, ооруканага жеткирилди. Жабыркагандар “Свободные руки” ишканасында эмгектенишет. Учурда текшерүү иштери жүрүп жатат”, - деп айтылат орусиялык маалымат каражаттарында.

Автор: Саадат Токтоболот кызы
Фото: Интернеттен алынган