Бишкек шаарынын тургуну граната жана ок-дары менен кармалды

Бишкекте 1 даана граната жана 51 даана ок менен көчөдө бараткан 25 жаштагы жаран кармалды. Бул тууралуу бүгүн, 11-октябрда Бишкек шаардык ички иштер башкы башкармалыгынан билдиришти.

Аталган башкармалыктын Уюшкан кылмышкерлерге каршы күрөшүү башкармалыгынын ыкчам кызматкерлери тарабынан кечээ, 10-октябрда саат 16:00 чамасында Чапаев-Гагарин көчөлөрүнүн кесилишинен 25 жаштагы А.Э. аттуу жаран кармалган. Анын өздүгүн текшерип, тинтүү иштерин жүргүзүү маалында колундагы көк түстөгү пакеттин ичинен Ф-1 үлгүсүндөгү 1 даана граната, Макаров үлгүсүндөгү тапанчанын 51 даана огу табылган. Учурда аталган жаран убактылуу кармоочу жайга киргизилип, бул факт боюнча иликтөө иштери жүрүүдө.

Автор: Мальвина Уметбекова