Шаардык сот абактан качкандардын иши боюнча райондук соттун чечимин күчүндө калтырды

Эдил Абдрахманов

Музаффар Уринов

Болот Курбанахунов

Бишкек шаардык соту №50-абактан качкандардын иши боюнча райондук соттун чечимин күчүндө калтырды. Бул тууралуу бүгүн, 17-октябрда Бишкек шаардык сотунан билдиришти.

Маалыматка караганда, шаардык сот тиешелүү чечимди 15-октябрда чыгарган. Чечимге ылайык, Свердлов райондук сотунун чечими күчүндө калтырылган.

Буга чейин Свердлов райондук соту Эдил Абдрахмановду, Болот Курбанахуновду жана Музаффар Уриновду өмүр бою эркинен ажыратып, Максат Абдрахманов менен Нурсият Рысбекованы “кылмышты жашыруу” беренеси боюнча айыптап, 4 жылга кескен.

Эске салсак, 12-октябрга караган түнү Төмөнкү-Нооруз айылында жайгашкан №50-абактан жалпы 9 адам качып чыккан. Абактан качкан кылмышкерлердин колунан Жаза аткаруу мамлекеттик кызматынын кызматкерлери Таалайбек Өмүрзаков, Туратбек Садыбакасов, Орозбек уулу Фархат ошол күнү каза болушса, оор жаракат алган Тилек Абылгазиев ооруканада өзүнө келбей жатып жан берген.

Качып чыккан кылмышкерлердин бешөөсү ошол эле түнү МАИ кызматкерлери тарабынан колго түшүрүлгөн. Кармалгандардын арасынан үч кылмышкер: Муратбек Жумалиев, Таалайбек Жуманов жана Бакыт Кенжегулов жүрөк оорусу, дем алуу органдарынын жабыркашынан жана баш сөөгүнөн алган жаракатынан түрмөдө каза болушту.

Качып чыгып издөөдө жүргөн Данияр Кадыралиев Дордой конушунда 16-октябрда, 28 жаштагы Азамат Мусуралиев 20-октябрда Сокулукта өлтүрүлгөн. Издөөдө жүргөн кылмышкерлердин бири Эдил Абдрахмановду 22-октябрда кармоо учурунда анын бутуна ок тийген эле. Ага Чүй облустук ооруканасында операция жасалды. 22-октябрда Алтынбек Итибаевди Достук кичи районундагы №8-Б көп батирлүү үч кабаттуу үйдө кармоо операциясынын жүрүшүндө ал курал колдонуп каршылык көрсөткөн. Ок атышуу болуп, А.Итибаев өлтүрүлгөн.

Автор: Бекжан Рыскулов