ЖЫЛНААМА, 8-ЯНВАРЬ: 11 жыл мурун балбан Раатбек Санатбаевди атып кетишкен

Мындан 11 жыл мурун, 2006-жылдын 8-январь күнү балбан Раатбек Санатбаевди Бишкектин 7-кичи районундагы күркөлөрдүн биринен сүт алып чыгып келе жаткан жеринен атып кетишкен. Балбан ооруканага жетпей каза болгон. Бүгүнкү күнгө чейин кылмыштын бети ачыла элек.

Раатбек Санатбаев 1969-жылы 7-майда Жалал-Абад облусунда үй-бүлөдөгү экинчи уул болуп төрөлгөн. 5-6-классында борбордогу спорттук мектеп-интернатта окуп калып, аны аяктаган соң Бишкектеги Кыргыз мамлекеттик дене тарбия институтуна тапшырган. Ошентип, спорт дүйнөсүнө аралашып, көптөгөн ийгиликтерге жетишкен.

1994-жыл. “Vaanta” Эл аралык мелдеши, Гран-при.

1994-жыл. Хиросима (Япония). XII Азия оюндарында күмүш медаль, 2-орун.

1995-жыл. Манила (Филиппин аралдары). Азия чемпиондугунда 2-орун.

1996-жыл. Атланта (АКШ). XXVI Олимпиада оюндары.

1998-жыл. Бангкок (Таиланд). XIII Азия оюндарында күмүш байге.

1999-жыл. Афины (Греция). “Акропольс” Эл аралык мелдеши, алтын медаль.

1999-жыл. Ташкент (Өзбекстан). Азия чемпиондугунда алтын медаль.

2000-жыл. Сеул (Түштүк Корея). Азия чемпиондугунда алтын медаль.

Раатбек Санатбаев 1998-1999-жылдары FILA рейтинги боюнча планетанын үчилтигине кирген. Ал эми 2000-жылы Кыргыз-Орус Славян университетинин юриспруденция факультетин бүтүргөн.

8-январга карата жылнаама.

Автор: Бекжан Рыскулов